Ozongendo—“Tu ṋiṋikiziwa mu avihe”

OZONGENDO ze ṱuna kovandu avehe, nandarire kovakarere vaMukuru. Omutjange wEpsalme wa tja: “Mba ri nomeripura omazeu morukoro rwandje.” (Epsalme 94:19) Nu Jesus wa tja momayuva omasenina, ‘ozongendo zouye mbwi’ maze tjiti kutja i rire ouzeu kovandu okukarera Jehova. (Lukas 21:34) Ove u muna nao? Ove u rikenda ohunga nouzeu wotjimariva, omauzeu meṱunḓu poo ouveruke woye? Jehova me ku vatere vi okutjinda omauzeu nga?

“Omasa nge kapita avihe”

Eṱe kamaatu yenene okutjinda ozongendo zetu oveni. Omuapostele Paulus wa tja: ‘Tu ṋiṋikiziwa mu avihe, tu kara mokuivaiva nu tu vandwa pehi.’ Nungwari eye wina wa tja: ‘Katu pama omuinyo, katu yaraara nu katu hahauka.’ Otjikeṋa tji tji tu vatera? “Omasa nge kapita avihe,” nge za ku Mukuru wetu omunamasaaehe Jehova.—2 Ovakorinte 4:7-9.

Ripurira komuano mbu wa muna “omasa nge kapita avihe” morukapitaveze. Ove mo zemburuka omuano ehungi eyanḓiparise mu re kurisa ondangi yoye korusuvero rwaJehova oruṱakame? Ongamburiro yoye momakwizikiro waJehova aai kurire ko indu tjoo hongo varwe ohunga nomaundjiro wOparadisa? Tji matu i kozombongarero zombongo nokuzuvarisa ombuze ombwa ku varwe, tu muna omasa nge tu vatera kutja tu tuurunge ozongendo zouye mbwi nu tu muna ohange ndji tjita kutja tu karere Jehova nenyando.

“Roreye nu mu rimunine ouwa waMuhona”

Otjingaperi kutja porumwe tu rimuna tjimuna matu nanwa minda vivari. Okutara kotjihorera, Jehova u tu ningira kutja rutenga tu pahe Ouhona nokuzikamisa oprograma ombwa yoviṋa oviyapuke. (Mateus 6:33; Lukas 13:24) Nambano mo sokutjita vi indu tji u ha yenene okuungura ovingi mena romapirukiro, ouvere poo ouzeu meṱunḓu? Poo mo sokutjita vi indu oviungura vyoye tji vi kambura oruveze oruingi kutja o ha kara noruveze rwokukara pu novakambure ovakweṋu? Mape ya orimunu okungundipara tji we ripurire koviṋa ovingi mbi kambura oruveze rwoye nokuhina omasa nga yenene okuvitjinda. Ove mape ya oripura kutja Jehova u undjira ovingi kove.

Jehova u tjiwa ozongaro zetu. Eye kaundjire ko kutja tu tjite oviṋa mbi tu hina okuyenena okutjita. Nu eye u tjiwa kutja tu hepa oruveze rwokuveruka morutu nokukuturwa kozombameno zetu.—Epsalme 103:13, 14.

Okutara kotjihorera, ripura nomuano Jehova ma vatera omuprofete Elia. Indu Elia tja ri nombameno onene nemuma nga tja tupuka mokuti ongaango, Jehova u na pa vera omuprofete we, nokumurakiza kutja ma yaruke motjiungura tje? Kako. Jehova wa hinda omuengeli povikando vivari okupendura Elia kaṱiṱi nokuhina okumuhanduza ne mu pe ovikurya ma rye. Nandarire ngunda Jehova a za nokutjita nao, omayuva 40 kombunda yanao, Elia ngunda wa ri nombameno nemuma. Otjikeṋa tjarwe Jehova tja tjita okumuvatera? Rutenga, Jehova wa raisira Elia kutja eye ma yenene okumuyama. Otjitjavari, Jehova wa huhumiṋa Elia [‘neraka etarazu,’ NW]. Korusenina, Jehova we mu raera kutja pe novandu varwe omayovi omengi mbaave rikotamene ku ye nouṱakame. Tjimanga Elia wa hara omasa rukwao nu a utu okuungura otjiungura tje tjouprofete. (1 Ozombara 19:1-19) Matu rihongere ko tjike? Jehova wa tjinda Elia nomuretima notjari indu tja havererwe i ozongendo. Jehova ngamba otjinga e ri. Eye u rikendera ku eṱe momuano otjingewo.

Tji mo ripurire koviṋa mbi mo yenene okuungurira Jehova, o undjire ko ovingi kove omuini. O sasaneke oviṋa mbyoo tjiti rukuru kuna imbi mbi mo yenene okuungura nai. Okutara kotjihorera: Omutupuke wotjikara tja isa okurirongerisa oure womieze poo ozombura zorive, kamaa yenene okuuta okutupuka tjimanga momuano mbwaa tjiti rukuru. Nungwari, eye ma utu mokurizikamisira ozondando ozonḓiṱi nḓu maze mu pe omasa nonḓaro orure. Ovakriste ve ri tjimuna ovatupuke votjikara. Owo ve rirongerisa nondando. (1 Ovakorinte 9:24-27) Ongwaye tji u hina okukara nondando imwe nai ndji mo munu kutja mo yenene okuyenenisa? Okutara kotjihorera, mo yenene okurizikamisira ondando yokuyenda kombongarero yombongo. Ningira Jehova kutja me ku vatere okuyenenisa ondando yoye ndji. Otja tji mo hara omasa mongamburiro yoye rukwao, ove mo ‘roro nu o rimunine ouwa waMuhona.’ (Epsalme 34:8) Tjiwa kutja otjiṋa ngamwa atjihe tji mo tjiti okuraisa orusuvero rwoye ku Jehova, nandarire kutja otjiṱiṱi, otjinanḓengu ku Jehova.—Lukas 21:1-4.

“Oomasa ngee hepa”

Jehova wa vatera vi June kutja ma kotoke ku Ye? Eye wa tja: “Ami ee kumbu ku Jehova eyuva arihe kutja me ndji vatere. Okuzambo omukazendu womuatje wandje we ndji raera ohunga nomaworonganeno nga ri motjihuro mu mba tura. Ami mba tya kutja me kakara po eyuva rimwe. Tjiri ya ri otjiṋa otjiwa okukara pu novakarere vaJehova rukwao! Omaworonganeno ngo oomasa ngee hepa. Nambano mbi karera Jehova nondjoroka rukwao. Ehupo randje nambano ra hara omuhunga. Nai mbi tjiwa kutja mbi hepa ovakambure ovakwetu nokutja me sokuyakura ombatero yawo. Me tja okuhepa kutja mba ri noruveze rwokukotoka ku Jehova.”