Kara nongamburiro kutja Jehova we ku isira

1-2. Indu tji twa munu kutja Jehova we tu isire omauvi wetu, otjiṋa ho tji tu ṱuna vi? (Wina tara kotjiperendero.)

OMBARA David wa ri nomuhihamwatima ohunga noviṋa ovivi mbya tjita. (Eps. 40:12; 51:3; omambo wokombanda) Posi ya, eye we ritanaura nu Jehova we mu isira. (2 Sam. 12:13) Ku nao, David wa ri nondjoroka indu tja muna kutja Jehova we mu isira.—Eps. 32:1.

² Eṱe wina matu yenene okukara nondjoroka indu tji twa munu kutja Jehova we tu raisire otjari nu wa isire omauvi wetu. Nandarire kutja twa tjiti ouvi ounene, tji tu huhumiṋa okutjiwa kutja Jehova me tu isire indu tji twe ritanaura tjiri, tji twa kumbu ku ye okutuisira, tji twa hungire ku novanene vombongo, na tji twa kondjo pu matu yenene okuhinokutjita ouvi mbwo rukwao. (Omiano 28:13; Oviung. 26:20; 1 Joh. 1:9) Nu tji tu etera ondjoroka okutjiwa kutja Jehova tja isire ouvi wetu eye u zemba oparukaze, nu kamaa roro okutupa ondjo poo okutuverera wo rukwao.—Esek. 33:16.

3-4. Omukazendu umwe omukambure wa ri noumune uṋe indu tja za nokupapitisiwa, nu matu kahungirira ku ye morupa ndwi?

³ Povikando tjiva, mape ya atu munu kutja Jehova kee tu isira. Tara kotjihorera tja Jennifer, ngwe kurira mouatjiri. Indu tja ri omutanda, eye wa uta okutjita oviṋa ovivi nokuvihoreka kovanene ve. Posi ya kombunda yozombura, eye wa tjita omarundurukiro, we riyandja omuini ku Jehova, na papitisiwa. Eye wa tja: “Ami mba suverere oviṋa, ee tjiti oruvakiro, ee nuu otjikariha tjinene, nu mba ri nomazenge. Ami ee tjiwa kutja Ombeibela i tja Jehova ma yenene okuisira omauvi wetu mena rombunguhiro ya Kristus. Posi ya ami hee munu kutja Jehova we ndji isira.”

⁴ Ngahino povikando tjiva u muna kutja Jehova ka isira ozondataiziro nḓu wa tjita morukapitaveze. Posi ya, zemburuka kutja Jehova u vanga kutja u kare nongamburiro kutja me ku isire tjimuna tja isira David. Morupa ndwi, matu katara kutja omena raye tje ri ounanḓengu okukambura kutja Jehova we tu isira, nokutja ovikwaye mbi mavi tu vatere okutjita nao.

ONGWAYE TJI TU SOKUKAMBURA KUTJA TWA ISIRWA?

5. Satan u vanga kutja tu kambure mu ye? Yandja otjihorera.

⁵ Indu tji tu nongamburiro kutja Jehova we tu isira, eṱe kamaatu kambura motjizeze tja Satan. Zemburuka kutja Satan ma yenene okutjita ngamwa otjiṋa kutja tu ise okukarera Jehova. Otjotjihorera, Satan mape ya a kondjo kutja tu kambure kutja Jehova ke nokuyenena okuisira ozondjo zetu. Ripura na imbi mbya tjitwa komurumendu moKorinte ngwa tjita oruvakiro nu ngwa isamewa mombongo. (1 Kor. 5:​1, 5, 13) Eye kombunda we ritanaura, posi ya Satan aa vanga kutja imba mbe ri mombongo ve panḓe okumuisira nave he mu yakura rukwao mombongo. Satan wina aa vanga kutja omurumendu ngo ma “ṱoruhoze tjinene” nga tji ma isa okukarera Jehova. Satan ke ya rundurura ondando ye ndjo. Posi ya “eṱe ouripura we tu u i nawa,” ku nao matu tjiwa kutja Satan matu mu rwisa vi.—2 Kor. 2:​5-11.

6. Ovikwaye mbi mavi yenene okutuvatera indu tji matu munu kutja Jehova kee tu isira?

⁶ Indu tji tu nongamburiro kutja Jehova we tu isira, eṱe matu yenene okukara nondjoroka rukwao. Indu tji twa tjiti ouvi, eṱe tu kara nomuhihamwatima. (Eps. 51:17) Nu iho otjiṋa otjiwa. Mena rokutja indu tji tu nomuhihamwatima matji tu hingi okutjita omarundurukiro nokutjita imbi mbi ri ovisemba. (2 Kor. 7:​10, 11) Posi ya indu tji twa kayenda komurungu okumuna kutja Jehova kee tu isira, eṱe matu yenene okuwa momuinyo natu isa okukarera Jehova. Indu tji tu nongamburiro kutja Jehova tjiri we tu isira, eṱe katu rimunu ondjo rukwao. Tu kayenda komurungu okumukarera nomeritjiviro womomutima omakohoke nondjoroka. (Kol. 1:​10, 11; 2 Tim. 1:3) Posi ya, hapo omomuano uṋe mu matu yenene okukara nongamburiro kutja tjiri Jehova we tu isira.

OVIKWAYE MBI MAVI TU VATERA OKUKARA NONGAMBURIRO KUTJA JEHOVA WE TU ISIRA?

7-8. Ovikwaye Jehova mbya hungira ku Moses ohunga na ye omuini, nu omambo ngo maye tu hongo tjike? (Eksodus 34:​6, 7)

⁷ Ripura noviṋa Jehova mbya hungira ohunga na ye omuini. Otjotjihorera, zemburuka imbi Jehova mbya hungira indu Moses tjaa vanga okumutjiwa nawa.a (Lesa Eksodus 34:​6, 7.) Nandarire kutja Jehova u novikaṋena ovingi oviwa, eye wa toorora okuraera Moses kutja eye “omunaunyaṋutima nomunatjari.” Hapo mo munu kutja omundu ngwa suvera Jehova tja tjiti ouvi nu tje ritanaura, Jehova kamaa isire omundu ngo? Ndoovazu Jehova ke nokuisira omundu ngo, eye ma rire omukukutu nu ngu hi notjari. Posi ya Jehova ke ri nao.

⁸ Eṱe matu yenene okukara nongamburiro kutja indu Jehova tja tja u notjari, eye ma hungire ouatjiri mena rokutja ka wovisa. (Eps. 31:5) Ku nao, eṱe matu yenene okukara nongamburiro momambo we. Indu tje ri ouzeu kove okuriisira omuini, ripura omuini kutja: ‘Hapo mbi kambura kutja Jehova tjiri u notjari nu ma yenene okuisira omundu ngamwa auhe ngwe ritanaura komauvi we?’ Indu tji u kambura nao, ove mo yenene okukara nongamburiro kutja eye wina we ku isira.

9. Epsalme 32:5 mari tu hongo ye ohunga nomuano Jehova me isira omauvi wetu?

⁹ Ripura noviṋa Jehova mbye tu honga mOmbeibela ohunga nomuano mbwe tu isira. Otjotjihorera, tara komuano omutjange wOmbeibela David ma hungira ohunga nomuano Jehova me isira. (Lesa Epsalme 32:5.) Eye wa tja: ‘Ove we ndji isira omauvi wandje aehe.’ Embo ndi “okuisira” mOtjiheberi wina ri he ya “okuisa po.” Ku nao indu Jehova tja isira David, eye aa fula tjimuna Jehova wa isa po omutwaro omuzeu mbwaa tjindi. David wa ri nondjoroka mena rokutjiwa kutja Jehova we mu isira oparukaze. (Eps. 32:​2-4) Eṱe wina matu yenene okukara nondjoroka tjingeyo ndjo. Indu tji twe ritanaura komauvi wetu, eṱe katu nokuhepa okurimuna ondjo mena roviṋa ovivi mbi twa tjita, nungwari matu yenene okukara nondjoroka mena rokutja Jehova wetu isira oparukaze.

10-11. Omambo nga “u isira” maye tu hongo tjike ohunga na Jehova? (Epsalme 86:5)

¹⁰ Lesa Epsalme 86:5. David wa hungira ohunga na Jehova kutja eye u isira. Ihi matji hee kutja Jehova ka hakahana okupindika indu tji matu tjiti ozondataiziro, nu aruhe u nonḓero okuisira imba mbe ritanaura. Omena raye Jehova tje tjita nao? Ezeva ndo komurungu ri tja: “Ove u nounyaṋutima ouingi ku avehe mbe kumba kOve.” Morupa ndwa kapita twe rihongere kutja Jehova wa kwizika okuraisa ounyaṋutima poo orusuvero oruṱakame ku imba mbe mu suvera nu ke mee vesa ko. Ku nao indu tji va tjiti ouvi nave ritanaura, eye ma kayenda komurungu okuveraisira orusuvero oruṱakame nu me ve isire oparukaze. (Jes. 55:7) Indu tje ri ouzeu kove okuyakura ondjesiro ya Jehova, ripura omuini kutja: ‘Hapo mbi kambura kutja Jehova u isira imba avehe mbe ritanaura nu mba ningire ondjesiro?’ Indu tji u kambura nao, ove mo yenene okukara nongamburiro kutja eye wina we ku isira indu tji wa ningira ondjesiro ku ye.

¹¹ Ombeibela wina i tu honga kutja Jehova u tjiwa omuano mbu twa ungurwa nokutja oweṱe ovanauvi. Otjiṋa ho tji tu huhumiṋa. (Eps. 139:​1, 2) Ngatu tare koviṋa David mbya hungira mEpsalme rarwe, nokutja omomuano uṋe oviṋa mbyo mu mavi yenene okutuvatera okukara nongamburiro kutja Jehova u vanga okutuisira.

OVIKWAYE JEHOVA MBYE ZEMBURUKA OHUNGA NA EṰE?

12-13. Otja kEpsalme 103:​14, ovikwaye Jehova mbye zemburuka ohunga na eṱe, nu iho tji mu hinga kutja me tu tjinde vi?

¹² Lesa Epsalme 103:14. David wa tja Jehova “u zemburuka kutja oweṱe oruuma.” Nomambo ngo, David wa kahurura kutja omena raye Jehova tje ri kamwaha okuisira ovakarere ve mbe ritanaura. Eye u tjiwa kutja oweṱe ovanauvi. Kutja tu zuve nawa, ngatu tare kutja omambo wa David ngo maye hee tjike.

¹³ David wa tja Jehova “u tjiwa kutja eṱe twa ungurwa pu tjike.” Jehova wa ungura Adam “poruuma rwehi.” Ku nao, eye ma tjiwa omuano ovandu mu va ungurwa noviṋa mbi ve hepa. Otjotjihorera, owo ve hepa okurya, nokurara, nokusuvana. (Gen. 2:7) Posi ya indu Adam na Eva tji va tjita ouvi, va tjita kutja tu kare noungundipare mena rouvi mbu twa rumata ku wo nokutjita kutja i rire ouzeu okupirukira oviṋa ovivi. Jehova u tjiwa otjiṋa ho nawa. Posi ya indu David tja tja Jehova u zemburuka kutja oweṱe oruuma, eye wina a hee kutja oweṱe ovanauvi, nu aruhe u tu raisira otjari. Eye u tjiwa kutja povikando tjiva matu tjiti ozondataiziro nu tja munu kutja eṱe twe ritanaura tjiri, eye u tu raisira otjari nokutuisira.—Eps. 78:​38, 39.

14. (a) Ovikwaye vyarwe David mbya hungira ohunga nomuano Jehova me tu isira? (Epsalme 103:12) (b) Matu yenene okurihongera ko ye komuano Jehova mai isira David? (Tara kokawongo nga “Omuano Jehova me isira nokuhinokuzemburuka ouvi.”)

¹⁴ Ovikwaye vyarwe mbi matu yenene okurihongera kEpsalme 103 ohunga nomuano Jehova me tu isira? (Lesa Epsalme 103:12.) David wa tja indu Jehova tje tu isire, u twa po omauvi wetu kokure “otja omukuma wokomuhuka punga au ri kokure na imbwi wokongurova.” Omukuma wokongurova nomukuma wokomuhuka vi ri kokure nokokure nu kavi hakaene. Hapo ihi matji tu raere tjike ohunga nomauvi Jehova nge isira? Embo rimwe ra hungirira kezeva ndo kutja Mukuru u isa po ouvi wetu na twara kokure na eṱe, nu i ri tjimuna omuṋuko wotjiṋa mbwa ri mau ṋuka tji wa zu po nu tji u hi nokuṋuka rukwao. Povikando tjiva omuṋuko wovikurya poo woviṋa vyarwe, u tu zemburukisa otjiṋa tji tja tjitwa morukapitaveze. Posi ya indu Jehova tja zu nokuisira ouvi, kape notjiṋa tji tji tjita kutja me ripure na wo nu ke tu pe ondjo poo okutuverera wo rukwao.—Esek. 18:​21, 22; Oviung. 3:19.

15. Matu yenene okutjita vi indu tji tu kayende komurungu okurimuna ondjo mena rozondataiziro nḓu twa tjita morukapitaveze?

¹⁵ Omambo wa David nge ri mEpsalme 103 maye tu vatere vi okuyakura kutja Jehova we tu isira? Ripura ohunga nomuano Jehova me fula. Eye u zemburuka kutja oweṱe ovanauvi. Nu Jehova u isira avehe mbe nomuhihamwatima ohunga noviṋa mbi va tjita nave ritanaura komauvi wawo. Nu ove wa tjita nao. Wina zemburuka kutja Jehova wa tya okuhinokuripurira ko poo okukuzemburukisa omauvi eye nge ku isira rukuru. Ku nao, eye ke nokukupa ondjo poo okukuverera wo rukwao. Jehova ka yandja ombango komauvi ngu twa tjita morukapitaveze. Ku nao, eṱe wina katu sokuyandja ombango ku wo. (Eps. 130:3) Indu tji twa kambura kutja Jehova tjiri we tu isira, matu yenene okuisa okurimuna ondjo nu matu yenene okukayenda komurungu okukarera Jehova nondjoroka.

16. Yandja otjihorera kutja oumba waye mbu mape ya au ya indu tji twa kayenda komurungu okuripura ohunga nomauvi Jehova nga isira. (Wina tara kotjiperendero.)

¹⁶ Ripura notjihorera tji. Indu omundu tji ma hingi ohauto, eye mape ya a ungurisa otjispili okutara kutja ovikwaye mbi ri kongotwe ye. Eye mape ya a tjiti nao povikando, posi ya maku eta oumba indu tji ma kayenda komurungu okutara motjispili oruveze aruhe. Eye u sokuyandja ombango ku mai kutja ma hinge nongengezero. Momuano tjingewo, onawa povikando okuripura nozondataiziro nḓu twa tjita. Okuripurira ko, maku tu vatere kutja atu ha tjiti ozondataiziro nḓo rukwao. Posi ya indu tji twa kayenda komurungu okuripura ohunga nouvi Jehova mbwa isira, mape ya atu pandjara ondjoroka yetu natu he mu karere momuano mbu matu sokumukarera. Nungwari ngatu yandje ombango kokukarera Jehova nokukayenda komurungu okuripura ohunga noruyaveze ndwe tu kwizikira, indu ‘ovitjitwa vyoruveze ndwa kapita tji mavi zembwa.’—Jes. 65:17; Omiano 4:25.

KAYENDE KOMURUNGU OKUKARA NONGAMBURIRO MU JEHOVA

17. Omena raye tji tu hepa okukayenda komurungu okukara nongamburiro morusuvero nondjesiro ya Jehova?

¹⁷ Eṱe matu hepa okukayenda komurungu okukara nongamburiro morusuvero nondjesiro ya Jehova. (1 Joh. 3:19) Omena raye? Mena rokutja Satan u kondja kutja tu mune kutja oweṱe ovanauvi tjinene nu Jehova ke mee tu suvere poo okutuisira. Imbi omiano Satan mbye ungurisa okututjaera okukarera Jehova. Otja omaandero wouye tji maye ya popezu, eye ma kondjo okutjita nao mena rokutja ma tjiwa kutja u noruveze orusupi uriri. (Omavan. 12:12) Posi ya matu sokupirukira Satan nokukayenda komurungu okukarera Jehova nouṱakame.

18. Ovikwaye mbi mo yenene okutjita okukara nongamburiro kutja Jehova we ku suvera, nu u vanga okukuisira?

¹⁸ Orupa ndwa kapita rwa raisa oviṋa mbi mo hepa okutjita okukara nongamburiro kutja Jehova we ku suvera. Nu orupa ndwi rwe ku hongo omuano mu mo yenene okukara nongamburiro kutja tjiri Jehova we ku isira. Otjotjihorera, tara ku imbi Jehova mbya hungira ohunga na ye omuini. Ripurira oukoto ku imbi Ombeibela mbi hungira ohunga nomuano Jehova me isira. O zembi kutja eye u tjiwa nawa kutja oove omunauvi nu me ku raisire otjari, nu zemburuka kutja eye tja isire u tjita nao oparukaze. Ove mo kara nondjoroka mena rokutja mo tjiwa kutja Jehova we ku raisire otjari. Nu tjimuna David ove mo yenene kutja, “Ndangi Jehova kokuisira ‘omauvi wandje aehe.’”—Eps. 32:5.