Jehova we tu kwizikira kutja ma tjiti ehi ri rire Oparadisa

1. Ombuze yomuprofete Jesaja kOvaisrael ovakwao ya ri iṋe?

OMUPROFETE Jesaja wa tja Jehova ‘oNdjambi Omuṱakame.’ Embo ndi “omuṱakame” poo ouatjiri ri nomaheero yemwe nembo ndi “amen.” (Jes. 65:16) Embo ndi “amen” ri heya kutja “nga pe kare nao” poo “otjiperi.” Embo ndi “amen” potuingi ri ungurisiwa mOmbeibela okuraisa kutja imbi Jehova poo Jesus mbi va hungire poo mbi va tjiti ouatjiri. Ku nao, ombuze ya Jesaja kOvaisrael ya ri ndji: Indu Jehova tja hunganeke otjiṋa, aruhe tji yenenisiwa. Ouatjiri owombwi wokutja Jehova aruhe u yenenisa omakwizikiro we.

2. Omena raye tji matu sokukara nongamburiro momakwizikiro wa Jehova woruyaveze, nu matu katara komapuriro yeṋe?

² Hapo eṱe matu yenene okukara nongamburiro tjingeyo kutja Jehova ma yenenisa omakwizikiro we ohunga noruyaveze rwetu? Ozombura ape 800 kombunda yaindu Jesaja tja ri nomuinyo, omuapostele Paulus wa kahurura kutja omena raye tji matu yenene okukambura kutja omakwizikiro wa Mukuru aruhe ma ye yenenisiwa. Paulus wa tja: “Ndjambi ka wovisa.” (Hebr. 6:18) Tjimuna ondjombo yomeva omawa tji i ha yenene okukara nomeva womongwa, momuano tjingewo Jehova ngu ri Omburo youatjiri ka kora ovizeze. Mena ranao, eṱe matu yenene okukara nongamburiro okuura momambo ayehe wa Jehova ngu maye kamburire mo omakwizikiro we ohunga noruyaveze rwetu. Morupa ndwi, matu katara komapuriro nga: Otjikeṋa Jehova tje tu kwizikira okutupa moruyaveze? Nu omomuano uṋe Jehova me tu kwizikira kutja ma yenenisa omakwizikiro we?

JEHOVA WA KWIZIKA OHUNGA NA TJIKE?

3. (a) Omakwizikiro yeṋe nga suverwa i yovakarere va Mukuru? (Omavandururiro 21:3, 4) (b) Hapo tjiva ve tja vi indu tji matu zuvarisa omakwizikiro nga ku wo?

³ Omakwizikiro ngu matu kahungirira ko ya suverwa i yovakarere va Mukuru mouparanga wouye. (Lesa Omavandururiro 21:3, 4.) Jehova wa kwizika oruveze indu ‘onḓiro tji hi nakukara po rukwao; noruhoze nomaririro, nomuhihamo tji vi hi nakukara po rukwao.’ Ovengi vetu tu lesa omazeva ngo, okuzeuparisa ovandu ku matu zuvarisa ko nokuveraisira kutja ehupo mari kasana pi mOparadisa. Ovandu tjiva ve tja vi indu tji matu haṋasana omakwizikiro nga ku na wo? Owo mape ya ave tja, “Inga omakwizikiro omawa, posi ya hi nokukambura kutja maye yenenisiwa.”

4. (a) Indu Jehova tja tjita omakwizikiro wOparadisa aa tjiwa kutja mape katjitwa ye moruveze rwetu? (b) Jehova tja tjita omakwizikiro, otjikeṋa tjarwe tja tjita?

⁴ Otjingaperi kutja, indu Jehova tja hinga omuapostele Johanes okutjanga omakwizikiro we ohunga nOparadisa, eye aa tjiwa kutja ndino eṱe matu yenene okuzuvarisa omaundjiro ohunga nombuze yOuhona wa Mukuru ku varwe. Jehova wina aa tjiwa kutja ma rire ouzeu kovengi okukambura momarundurukiro ngu maye ya moruyaveze. (Jes. 42:9; 60:2; 2 Kor. 4:3, 4) Omomuano uṋe mu matu yenene okukara nongamburiro nokuvatera varwe kutja ve kare nongamburiro yokutja ozondaya nḓa tamunwa mOmavandururiro 21:3, 4 maze yenenisiwa tjiri? Jehova wa yandja omapu omasemba wokutja omena raye tji matu yenene okukara nongamburiro kutja eye ma yenenisa omakwizikiro nga. Omapu yeṋe eye nga yandja?

JEHOVA WE TU KWIZIKIRA KUTJA OMAKWIZIKIRO WE NGO MA YENENISA

5. Omazeva yeṋe nge tu pa ongamburiro momakwizikiro wa Mukuru, nowo ye tja vi?

⁵ Eṱe tu nomapu ngu maye tjiti kutja tu kare nongamburiro momakwizikiro wa Jehova wOparadisa nge ri momazeva ngu maye kongorere ko. Owo maye tja: “Nu Ingwi ngu ri kotjihavero tjouhona arire tja tja: ‘Tara, Ami me yarura avihe koupe!’ Eye wina wa tjere ku ami: ‘Tjanga omambo nga, owo tjinga aye ri omauatjiri nomaṱakame.’ NEye wa hungirire rukwao ku ami a tja: ‘Tja tjitwa, pa pu. OwAmi Omutenga nOmusenina, Ombutiro nOndjandero.’”—Omavan. 21:5, 6a.

6. Omena raye omambo nga tjangwa mOmavandururiro 21:5, 6 tji ye kurisa ongamburiro yetu momakwizikiro wa Mukuru?

⁶ Ongwaye omambo ngo tji maye kurisa ongamburiro yetu momakwizikiro wa Mukuru? Momazeva nga, imbi Jehova mbi ma katjita mavi sasanekwa ku na okutwa ko omunwe kembo, mbu mau tjiti kutja tu kare nongamburiro yokutja eye tjiri ma yenenisa omakwizikiro we. Omakwizikiro wa Mukuru ngo ya tjangwa mOmavandururiro 21:3, 4. Nu mezeva oritjatano noritjahamboumwe, eye wa twa ko omunwe kembo okutjita kutja tu kare nongamburiro yokutja eye tjiri ma yenenisa omakwizikiro we ngo. Ngatu katare komambo Jehova nga ungurisa momakwizikiro we ngo.

7. Ouṋe ngu uta okuhungira mezeva oritjatano, nu ongwaye otjiṋa hi tji tji ri otjiṋa tjapeke?

⁷ Omakwizikiro wa Mukuru ya uta nomambo nga mezeva oritjatano: “Nu Ingwi ngu ri kotjihavero tjouhona arire tja tja.” (Omavan. 21:5a) Omambo nga i yemwe yovikando vitatu mbi ri membo rOmavandururiro indu Jehova tji ma hungire movirimunikise. Omakwizikiro ngo kaye yandjerwe i yomuengeli omunamasa poo i Jesus ngwa pendurwa, nungwari ya yandjewa i Jehova omuini. Iho tji raisa kutja omambo nga kongorera ko matu yenene okukambura mo. Omena raye? Mena rokutja Jehova ‘oNdjambi ngu ha wovisa.’ (Tit. 1:2) Ku nao, omambo nge ri mOmavandururiro 21:5, 6 tjiri maye yenenisiwa.

“TARA, AMI ME YARURA AVIHE KOUPE!”

8. Otjikeṋa Jehova tja hungira tji tji ṋunisa kutja omakwizikiro we maye yenenisiwa? (Jesaja 46:10)

⁸ Okuzambo Jehova wa tja: “Tara.” (Omavan. 21:5) Embo rOtjigrike ku kwa za embo ndi “tara” ra ungurisiwa povikando ovingi membo rOmavandururiro. Embo rimwe ra tja, embo ndi “tara” ri ungurisiwa “otjomuano wokuraera omulese kutja ma yandje ombango ku imbi mbi mavi kongorere ko.” Omambo yeṋe nga kongorera ko? Eye wa tja: “Ami me yarura avihe koupe!” Otjiperi kutja Jehova ma hungire ohunga nomarundurukiro ngu ma katjita moruyaveze. Posi yokutja, ku ye omakwizikiro ngo tjiri maye yenenisiwa, neye opa zokuhungira aayo omakwizikiro ngo ya yenenisiwa rukuru.—Lesa Jesaja 46:10.

9. (a) Omambo nga “me yarura avihe koupe!” maye hungirire ku ye? (b) Maku katjitwa ye ‘keyuru’ “nehi” mbi ri ko nai?

⁹ Ngatu kakonḓonone omambo ngu maye kongorere ko mOmavandururiro 21:5 ngu maye tja: “Me yarura avihe koupe!” Mekondwa ndi, omambo nga maye hungirire koviṋa vivari Jehova mbi ma katjita. Eye ma kaisa po nu ma kayarura po. Rutenga otjikeṋa Jehova tji ma kaisa po? Omavandururiro 21:1 mari tja: “Eyuru etenga nehi etenga tjandje ya zenga.” “Eyuru etenga” mari hee ozohoromende nḓe honaparerwa po i Satan nozondemone ze. (Mat. 4:8, 9; 1 Joh. 5:19) Otja kOmbeibela, “ehi” mari yenene okuheya ovature vokombanda yehi. (Gen. 11:1; Eps. 96:1) Ku nao, “ehi etenga” mari hee ovandu ovarunde ndino. Jehova ke nokuṱuna ‘eyuru nehi’ mbi ri ko nai, nungwari me vi nyono oparukaze. Okuzambo eye me vi pingenisa ‘neyuru epe nehi epe’ pu mape hee kutja eye ma twa po ohoromende ombe ndji mai honaparere po ovandu ovasemba.

10. Ovikwaye Jehova mbi ma yarura koupe?

¹⁰ MOmavandururiro 21:5 tu lesa omambo wa Jehova ohunga noviṋa mbi ma yarura koupe. Jehova ka tjere: “Ami me utu avihe ovipe!” Nungwari eye wa tja: “Ami me yarura avihe koupe!” Jehova ma yarura ehi koupe nu ma tjiti kutja ovandu ve rire ohomonena rukwao. Otja Jesaja pa hunganeka, Jehova ma tjiti kutja ehi arihe ri rire oruveze oruwa tjimuna otjikunino tja Eden. Neye me tu yarura koupe mokutuverukisa oparukaze. Ovaremane, ovapoṱu ozomboro mave verukisiwa nu nandarire ovaṱi mave kotorwa komuinyo.—Jes. 25:8; 35:1-7.

“OMAMBO NGA, OWO TJINGA AYE RI OMAUATJIRI NOMAṰAKAME. . . . TJA TJITWA, PA PU”

11. Jehova wa raera Johanes kutja nga tjite vi nu omena raye?

¹¹ Otjikeṋa tjarwe Mukuru tja hungira kutja tu kare nongamburiro mu ye? Jehova wa raera Johanes kutja: “Tjanga omambo nga, owo tjinga aye ri omauatjiri nomaṱakame.” (Omavan. 21:5) Jehova ke mu rakizire kutja “tjanga” uriri nungwari eye wina we mu pa epu ku ma tjangere. Eye wa tja: “Omambo nga, owo tjinga aye ri omauatjiri nomaṱakame.” Pu mape hee kutja omambo wa Mukuru kaye wovisa nu matu yenene okukambura mo. Eṱe tu nondangi konḓuviro Johanes ndja raisa indu tja rakiziwa kutja “tjanga.” Mena ranao, eṱe matu yenene okulesa ohunga nomakwizikiro wa Mukuru wOparadisa nokuripurira ko oukoto kozondaya ozombwa nḓu tu undja.

12. Omena raye Jehova tja hungira omambo nga: “Tja tjitwa, pa pu”?

¹² Okuzambo Mukuru wa tja vi? “Tja tjitwa, pa pu.” (Omavan. 21:6) Nambano Jehova aa hungire aayo oviṋa avihe mbya tamunwa ohunga nomakwizikiro wOparadisa vya yenenisiwa rukuru. Neye ma yenene okuhungira momuano mbo mena rokutja kape notjiṋa tji matji mu tjaere okuyenenisa ondando ye. Okuzambo Jehova wa hungira omakwizikiro warwe nga kwizika kutja ma yenenisa. Hapo eye wa tja vi?

“OWAMI ALFA NA OMEGA”

13. Omena raye Jehova tja hungira omambo nga: “Owami Alfa na Omega”?

¹³ Otja tji pa tamunwa rukuru, Jehova omuini wa hungira ovikando vitatu movirimunikise ku na Johanes. (Omavan. 1:8; 21:5, 6; 22:13) Otjikando atjihe, Jehova aa tja, “Owami Alfa na Omega,” poo aa tja, “OwAmi Omutenga nOmusenina.” Embo ndi alfa mOtjingrike ri heya oletera ondenga yoalfabet nu omega i heya oletera osenina. Indu tji ma tja eye ‘oAlfa na Omega,’ Jehova me tu vatere okutjiwa kutja eye tja utu otjiṋa, me tji yenenisa nondoṋeno.

14. (a) Yandja otjihorera indu Jehova tja tja “Alfa” na indu tji ma katja “Omega.” (b) Omambo nge ri mu Genesis 2:1-3 maye tu pe ongamburiro yaye?

¹⁴ Kombunda yaindu Jehova tja za nokumema Adam na Eva, eye we ve raera ondando ye kovandu na kehi. Ombeibela i tja: “Nu Ndjambi we ve sera ondaya na tja ku wo: ‘Kwatasaneye, takavareye nu mu urise ehi, noro ngari kare kehi yeṋu.’” (Gen. 1:28) Oruveze ndwo, Jehova wa raisa kutja ondando ye kehi na kovandu oyaye, indjo ondja ri ombutiro poo “Alfa.” Indu ondando ye tji ya yenenisiwa oparukaze na indu ozondekurona za Adam na Eva nḓe nonḓuviro tji ze urisa ehi na ze tjiti kutja ririre oparadisa, ingo maye rire omaandero poo “Omega.” Kombunda yaindu Jehova tja mana okumema “eyuru nehi noviṋa avihe, mbi ri mu vyo,” eye wa hungira otjiṋa okuraisa kutja ondando ye mai yenenisiwa tjiri. Omambo ngo ye ri mu Genesis 2:1-3. (Lesa.) Jehova wa yapura eyuva oritjahambombari. Iho matji hee tjike? Ihi matji raisa kutja ondando ya Jehova kovandu na kehi mai yenenisiwa komaandero weyuva oritjahambombari.

15. Ongwaye Satan tjaa munu kutja ma yenene okutjaera Jehova kutja a ha yenenisa ondando ye?

¹⁵ Kombunda yaindu Adam na Eva tji ve ha karere nonḓuviro, owo va rira ovanauvi na ve rumatisa ouvi nonḓiro kozondekurona zawo. (Rom. 5:12) Ku nao, atja pe munika aayo Satan wa tjita kutja ondando ya Mukuru yokuurisa ehi novandu ohomonena mbe nonḓuviro ai ha yenenisiwa. Hapo Satan wa yenena okutjita kutja Jehova a ha yenenisa omakwizikiro we? Satan mape ya ee ripura kutja Jehova kama yenene okuyenenisa omakwizikiro we. Eye mape ya ee ripura kutja Mukuru ma zepa Adam na Eva na meme omukazendu nomurumendu warwe ohomonena okuyenenisa ondando ye kovandu. Posi yokutja andakuzu Mukuru wa tjita nao, Satan etje mu kuminina kutja omunavizeze. Omena raye? Mena rokutja, otja tji pa tjangwa mu Genesis 1:28, Jehova wa raera Adam na Eva kutja ozondekurona zawo maze urisa ehi.

16. Ongwaye Satan tjaa munu kutja eye ma yenene okukuminina Jehova kutja kama yenenisa imbi mbya kwizika?

¹⁶ Hapo Satan mape ya ee ripura kutja Mukuru ma toora omukambo uṋe warwe? Ngahino Satan ee ripura kutja Jehova ma yandjere Adam na Eva okukara novanatje mbe hi na maave yenene okukarira ohomonena. (Omuzuv. 7:20; Rom. 3:23) Momuano mbwo, Satan katja keyakeya okukuminina Jehova kutja ka yenenisire ondando ye. Omena raye? Mena rokutja omukambo mbo katja u tjita kutja Mukuru ma yenenise ondando ye yokuurisa Oparadisa nozondekurona za Adam na Eva ohomonena nu nḓe nonḓuviro.

17. Omomuano uṋe Jehova ma zengurura omapirukiro wa Satan na inga wovandu ovatenga, nu omaandero maye kasana pi? (Wina tara kotjiperendero.)

¹⁷ Jehova wa zengurura omapirukiro wa Satan na inga wovandu ovatenga momuano Satan mbwaa ha undjire ko. (Eps. 92:5) Jehova wa yandjera Adam na Eva okukara novanatje nu momuano mbwi omambo wa Jehova ya rira ouatjiri, eye kamunavizeze. Jehova wa raisa kutja eye tja tja ma tjiti otjiṋa, kape notjiṋa tji matji mu tjaere. Eye wa tjita kutja ondando ye irire ouatjiri indu tja yandja ‘ondekurona’ ndji mai sokuyama ozondekurona za Adam na Eva nḓe nonḓuviro. (Gen. 3:15; 22:18) Ondekurona ndji aai sokuyandja omuinyo wawo otjotjisuta tjonguturiro okuyama ovandu. Satan kena pa undjira ko omazengururiro nga. Omena raye? Mena rokutja otjisuta tjonguturiro tja zikamena korusuvero ndu hi notjavivi. (Mat. 20:28; Joh. 3:16) Satan ke notjikaṋena ho, eye u ripurira ku ye omuini. Ku nao, otjikeṋa tji matji tjitwa mena rotjisuta tjonguturiro? Komaandero wozombura eyovi zomananeno wa Kristus, ozondekurona za Adam na Eva ohomonena nu nḓe nonḓuviro maze rumata ehi otja kondando ya Jehova okuza kombutiro. Moruveze ndo, Jehova ma katja “Omega” okutja ondjandero.

OMUANO MU TU KURISA ONGAMBURIRO YETU MOMAKWIZIKIRO WA JEHOVA WOPARADISA

18. Jehova we tu pa omapu yeṋe yetatu ngu maye tu vatere okukara nongamburiro momakwizikiro we? (Wina tara kokawongo nga “Omapu yetatu ngu maye tu vatere okukara nongamburiro momakwizikiro wa Jehova.”)

¹⁸ Morupa ndwi, twa tara komapu ngu maye tu vatere kutja omena raye tji matu yenene okukara nongamburiro kutja ehi mari rire Oparadisa. Ovikeṋa mbi matu yenene okuraera varwe kutja ve kare nongamburiro yokutja oviṋa mbi mavi tjitwa tjiri? Otjitenga, Jehova omuini ongwa tjita omakwizikiro. Embo rOmavandururiro ri tja: “Nu Ingwi ngu ri kotjihavero tjouhona arire tja tja: ‘Tara, Ami me yarura avihe koupe!’” Eye u nounongo nomasa nonḓero yokutjita kutja omakwizikiro we ye rire ouatjiri. Otjitjavari, Jehova wina u tjiwa kutja imbi mbya hungire mavi tjitwa tjiri. Eye opa zokutja: “Omambo nga, owo tjinga aye ri omauatjiri nomaṱakame. . . . Tja tjitwa, pa pu.” Wina, kape notjiṋa tji matji yenene okutjita kutja Jehova a ha mana otjiṋa tja utu. Eye opa zokutja: “Owami Alfa na Omega.” Jehova ma raisa kutja Satan omunavizeze nu kama yenene okumutjaera okuyenenisa ondando ye.

19. Hapo ove mo yenene okutjita vi indu ovandu tji mave keyakeya okukambura momakwizikiro wa Mukuru wOparadisa?

¹⁹ Zemburuka kutja indu tji mo raere ovandu ohunga na imbi Jehova mbya hungira kutja omakwizikiro we maye rire ouatjiri, ove u kurisa ongamburiro yoye omuini mu ye. Ku nao, otjikando tjarwe tji mo lese omakwizikiro omatunduuze ohunga nOparadisa ndji mai ya otja tji ya tjangwa mOmavandururiro 21:4 nu omundu umwe atja, “Imbi mavi pose nawa okurira ouatjiri,” hapo ove mo tjiti vi? Ove mo yenene okulesa nokuvekahururira ezeva oritjatano noritjahamboumwe. Raisa omuano Jehova ma raisa kutja omakwizikiro we maye rire ouatjiri, aayo wa twa ko omunwe kembo neke re omuini.—Jes. 65:16.