Pemungkal
23 Sarah idup pengelama 127 taun. 2 Udah nya Sarah mati ba Kiriat-arba, iya nya Hebron, ba menua Kanaan. Abraham tusah ati lalu nyabakka Sarah. 3 Udah nya, Abraham ninggalka endur alai iya ngengkahka bangkai bini iya, ngambika iya ulih bejaku enggau orang Het. Ku iya: 4 “Aku nemu aku semina orang asing ke diau begulai enggau kita. Awakka aku meli tanah ari kita nyadika pendam, ngambika aku ulih nguburka bini aku ba dia.” 5 Ku sida nyaut iya: 6 “Tuan, dinga meh utai ke disebut kami. Ba kami, nuan ketuai ke dipilih Petara.* Nuan ulih nguburka bini nuan ba pendam kami ti pemadu manah. Semua kami sanggup meri nuan endur alai nuan ulih nguburka bini nuan.”
7 Nya alai, Abraham angkat lalu ngendukka pala ngagai orang Het ke diau ba menua nya. 8 Ku iya bejaku ngagai sida: “Enti kita setuju aku nguburka bini aku, aku minta kita bejaku enggau Epron anak Sohar, ngambika iya 9 nyual gua ba Makpelah ke ba ujung ladang iya ngagai aku. Awakka iya nyual nya ngagai aku ba mua bala kita. Aku sanggup meli nya enda ngira berapa rega iya, ngambika aku bisi endur nyadika pendam.”
10 Epron, orang Het nya, bisi duduk begulai enggau sida. Ku iya nyaut Abraham ba mua bala sida sereta semua orang ke tama nengah pintu penama kuta nya: 11 “Enggai aku nyual nya ngagai nuan, tuan. Dinga nuan utai ku aku. Ba mua bala aku ke bisi ditu, aku deka meri gua enggau ladang nya sekali ngagai nuan. Kuburka meh bini nuan dia.” 12 Udah nya, Abraham ngendukka pala ba mua bala orang ke ba dia, 13 lalu bejaku ngagai Epron ba mua sida: “Dinga nuan utai ku aku. Aku deka meli ladang nya enda ngira berapa rega iya. Terima meh pirak ari aku ngambika aku ulih nguburka bini aku dia.”
14 Udah nya, Epron nyaut Abraham: 15 “Tuan, dinga nuan. Rega tanah tu 400 shekel* pirak. Tang, enda ibuh meh tua bekira enggau pangan diri. Kuburka aja bini nuan ba dia.” 16 Abraham setuju enggau Epron. Baka ke disebut Epron ba mua orang Het ke bisi ba dia, Abraham lalu nimbang 400 shekel pirak, nitihka atur pemerat ti dikena orang ke bedagang. 17 Baka nya meh ladang ke diempu Epron ba Makpelah, semak Mamre, nyengkaum gua enggau semua pun kayu ba ladang nya, sah nyadi enggi 18 Abraham, ke dibeli iya ba mua bala orang Het sereta semua orang ke tama nengah pintu penama kuta nya. 19 Udah nya, Abraham nguburka bini iya Sarah ba dalam gua di ladang Makpelah semak Mamre, iya nya ba Hebron, di menua Kanaan. 20 Baka nya meh chara ladang enggau gua nya diserahka orang Het ngagai Abraham, ngambika iya bisi tanah nyadika pendam.