Pemungkal
37 Jakop terus diau ba menua Kanaan, endur alai apai iya kala diau nyadi orang asing.
2 Tu cherita pasal ruang bilik Jakop.*
Lebuh Josep agi biak, iya nya lebuh iya beumur 17 taun, iya enggau bala anak Bilhah enggau bala anak Silpah nyaga raban jelu sida. Bilhah enggau Silpah nya bini apai iya. Josep lalu madahka apai iya utai jai ke dikereja bala menyadi iya. 3 Israel sayauka Josep lebih agi ari anak iya ke bukai laban Josep diadaka lebuh umur Israel nyau tuai. Iya meri ngagai Josep siti baju jubah ke amat manah. 4 Lebuh bala menyadi Josep ke bukai meda apai sida sayau agi ke iya, sida berengkah begedika iya lalu suah bejaku kasar enggau iya.
5 Bisi sekali, Josep bemimpi. Udah nya, iya madahka mimpi nya ngagai bala menyadi iya. Ketegal nya, sida balat agi begedika iya. 6 Ku iya madah ngagai sida: “Dinga kita mimpi aku. 7 Maya nya, kitai benung nanchang tangkai gandum ba tengah ladang. Udah nya, tangkai gandum aku angkat lalu bediri lurus. Tangkai gandum kita ngelingi tangkai gandum aku, lalu meremi ngagai iya.” 8 Ku bala menyadi iya nyaut: “Nama? Nuan deka nyadi raja lalu bekuasa atas kami pia?” Ketegal mimpi enggau utai ke disebut Josep, bala menyadi iya majak agi begedika iya.
9 Udah nya, iya bemimpi baru lalu madahka mimpi nya ngagai bala menyadi iya. Ku iya: “Aku bemimpi baru. Ba mimpi nya, aku meda mata panas, bulan, enggau 11 igi bintang meremi ngagai aku.” 10 Iya mega nusui mimpi nya ngagai apai iya enggau bala menyadi iya. Apai iya lalu ngerara iya: “Nama reti mimpi nuan nya? Enda patut aku, indai nuan, enggau bala menyadi nuan meremi ngagai nuan!” 11 Nya alai, bala menyadi iya dengki ngagai iya. Tang apai iya majak berundingka utai ke disebut Josep.
12 Bisi sekali, bala menyadi Josep mai raban bedus enggau kambin apai sida makai rumput semak Shikem. 13 Udah nya, Israel lalu bejaku enggau Josep: “Bala menyadi nuan benung nyaga raban bedus enggau kambin semak Shikem. Alai, kin nuan ngabas sida.” Ku Josep nyaut iya: “Au, apai.” 14 Ku Israel: “Alai, mupuk nuan lalu abas bala menyadi nuan enggau raban jelu ke diibun sida. Udah nya, pulai baru lalu padah ngagai aku gaya sida ba din.” Nya alai, Israel ngasuh iya mupuk ari Lebak Hebron lalu mansang ngagai Shikem. 15 Udah nya, siku lelaki meda iya bejalai ba sebelah padang. Ku lelaki nya nanya: “Nama utai digiga nuan?” 16 Disaut Josep: “Aku ngiga bala menyadi aku. Nemu nuan dini sida nyaga raban jelu sida?” 17 Ku lelaki nya nyaut: “Sida udah mupuk. Aku ninga sida deka ngagai Dotan.” Nya alai, Josep pan nitihka bala menyadi iya, lalu tetemuka sida ba Dotan.
18 Ari jauh, sida meda Josep mansang ngagai sida. Tang sebedau iya datai, sida bepakat deka munuh iya. 19 Ku sida bejaku enggau pangan diri: “Nyin bujang ke udu bemimpi datai. 20 Aram kitai munuh iya lalu nikauka bangkai iya ngagai lubang!* Udah nya, kitai madahka iya udah mati diempa jelu liar. Kitai deka meda, nama penyadi ngagai mimpi iya.” 21 Lebuh Reuben ninga nya, iya nguji deka nyelamatka Josep. Ku iya: “Anang munuh iya.” 22 Ku Reuben agi: “Buai aja iya ke dalam lubang ba menua puang tu. Tang anang munuh tauka ngemediska iya.” Reuben bejaku munyi nya laban iya deka nyelamatka Josep lalu mai Josep pulai ngagai apai sida.
23 Maya Josep datai, bala menyadi iya muka baju jubah ke dikena iya. Maya nya, iya ngena baju jubah ke amat manah. 24 Udah nya, sida muai iya ngagai siti lubang. Lubang nya rangkai, nadai ai.
25 Pengudah nya sida pan makai. Lebuh sida benung makai, sida tepedaka seraban orang Ismail ari Gilead mansang ngagai Ejip. Bala unta sida mai getah ke bebau rengut, minyak balsam,* enggau kulit kayu.* 26 Ku Judah bejaku ngagai bala menyadi iya ke bukai: “Nama penguntung iya enti kitai munuh menyadi kitai lalu ngelalaika pemati iya? 27 Aram kitai nyual iya ngagai orang Ismail nya. Anang ngemediska iya laban iya menyadi kitai, bela kitai sebilik.” Sida pan setuju enggau iya. 28 Lebuh orang Ismail, iya nya orang dagang ari Midian, mansa sida, sida mansutka Josep ari lubang nya lalu nyual iya ngagai orang Ismail enggau rega 20 singkap pirak. Josep lalu dibai ngagai Ejip.
29 Lebuh Reuben pulai baru ngagai lubang nya lalu nadai meda Josep ba dia, iya pan nyarikka gari diri laban iya kelalu tusah ati. 30 Lebuh iya betemu baru enggau bala menyadi iya, ku iya madah: “Menyadi kitai nadai ba lubang nya! Nama patut digaga aku?”
31 Sida lalu munuh siku kambin, lalu nyepuhka baju jubah Josep ke dalam darah kambin nya. 32 Udah nya, sida nganjung baju jubah nya ngagai apai sida. Ku sida madah: “Kami bisi tetemuka gari tu. Kati tu gari anak nuan tauka ukai?” 33 Jakop meresa baju jubah nya, lalu ku iya madah: “Tu baju jubah anak aku! Iya tentu udah dibunuh lalu diempa jelu ti liar.” 34 Jakop lalu nyarikka gari diri, lalu ngena kain guni ba punggung iya. Lama amat iya balat tusah ati ke pemati anak iya. 35 Semua anak lelaki enggau anak indu iya nguji deka ngelantangka ati iya, tang iya enggai. Ku iya madah: “Sampai mati pan aku enggai ngetu nyabakka anak aku.” Lalu Jakop enda ngetu-ngetu nyabakka anak iya Josep.
36 Lebuh orang ari Midian datai ba Ejip, sida nyual Josep ngagai Potipar. Potipar nya siku pegawai ba istana Firaun sereta ketuai soldadu ke nyaga Firaun.