Pemungkal

7 Udah nya Jehovah bejaku enggau Noah: “Alai bai kita sebilik tama ngagai bandung, laban nuan enda baka orang ba jeman tu. Semina nuan aja ke ngereja utai ti betul ba mata Aku. 2 Bai tujuh iku* ari tiap bansa jelu ti tuchi, ti lelaki enggau indu. Lalu ari tiap bansa jelu ti enda tuchi, bai sepasang aja. 3 Bai mega tujuh iku* ari tiap bansa utai idup ti besayap, ti lelaki enggau indu, ngambika sida ulih terus idup sereta beranak enggau mayuh ba serata dunya. 4 Tujuh hari da agi, Aku deka ngasuh hari ujan pengelama 40 hari 40 malam, lalu Aku deka ngemunaska semua utai ti idup ke udah digaga Aku.” 5 Noah lalu ngereja semua utai ke diasuh Jehovah.

6 Noah beumur 600 taun lebuh ai bah ngampuhka dunya. 7 Noah enggau bini iya, bala anak iya enggau bini sida tama ngagai bandung sebedau ai bah datai. 8 Tiap bansa jelu ti tuchi enggau jelu ti enda tuchi, utai idup ti besayap enggau utai idup ke ba tanah mega tama ngagai bandung nya. 9 Semua sida tama ngagai bandung nya sepasang-sepasang, baka ke dipadah Petara ngagai Noah. 10 Tujuh hari udah nya, ai bah pan ngampuhka dunya.

11 Lebuh Noah beumur 600 taun, kena hari ke-17 dalam bulan kedua, pintu ai ba langit tebuka lalu mayuh ai labuh ari langit. 12 Lalu hari ujan 40 hari 40 malam. 13 Ba hari nya mega, Noah enggau bini iya, enggau bala anak iya, Sem, Ham, enggau Japet sereta bala bini sida, tama ngagai bandung nya. 14 Sida mai semua macham bansa jelu: Jelu liar, jelu tupi, jelu ti ngerayap, enggau utai idup ti besayap, iya nya burung enggau utai bukai ke besayap. 15 Semua jelu nya mansang ngagai Noah ke ba dalam bandung. Sida tama sepasang-sepasang. 16 Semua jelu nya tama ngagai bandung, jelu ti lelaki enggau ti indu, baka ke diasuh Petara kereja Noah. Udah nya, Jehovah nutup pintu bandung nya.

17 Hari lalu ujan enda ngetu-ngetu 40 hari, lalu ai majak niki sereta dalam nyentukka bandung nya nyau melepung ba ai ke udah ngampuhka semua utai ba dunya tu. 18 Ai majak niki lalu ngampuhka serata dunya. Tang bandung nya mengkang melepung ba ai. 19 Ai majak mayuh ba dunya nyentukka gunung ke pemadu tinggi pan ampuh laban ai. 20 Ai majak niki lalu penalam iya tujuh meter* ari tuchung gunung.

21 Nya alai semua utai ti idup ba dunya mati magang: Utai idup ti besayap, jelu tupi, jelu liar, utai idup ti mit,* enggau semua mensia. 22 Semua utai ke enseput ba darat, mati magang. 23 Petara ngemunaska semua utai idup ba dunya nyengkaum mensia, jelu, jelu ti ngerayap, enggau utai idup ti besayap. Semua nya nadai agi. Semina Noah enggau semua sida ke enggau iya dalam bandung nya ke agi idup. 24 Ai nya terus ngampuhka dunya pengelama 150 hari.