Bansa Israel ti Kedua
35 Josiah ngintu Pengerami Paska ke Jehovah ba Jerusalem, lalu sida nyayat korban Paska ba hari ti ke-14 ba bulan ti keterubah. 2 Iya ngasuh bala imam bejalaika pengawa sida, lalu meransang sida gawa ba Rumah Jehovah. 3 Udah nya, iya bejaku ngagai orang Lewi, iya nya bala pengajar orang Israel ke udah dikuduska ke Jehovah: “Simpan peti lampang batu Adat ti kudus nya dalam Rumah Petara ke udah digaga Solomon anak David, raja Israel. Kita enda ibuh agi ngesan peti nya. Diatu, awakka kita gawa ke Jehovah, Petara kita sereta ke bala nembiak iya, orang Israel. 4 Besedia meh ngereja pengawa kita nitihka suku enggau raban kita, nitihka utai ke udah ditulis Raja David enggau anak iya, Solomon. 5 Kita orang Lewi, bediri meh ba endur ti kudus nitihka suku kita empu. Enggau nya, tiap iti suku orang Lewi ke udah dibagi nitihka raban ulih nulung tiap iti suku Israel ke datai. 6 Sayat korban Paska lalu kuduska diri empu. Sediaka utai ngambika bala menyadi kita ulih nitihka asuh Jehovah ke dipadahka nengah Moses.”
7 Raja Josiah ngambi 30,000 iku anak bedus lelaki enggau anak kambin lelaki, sereta 3,000 iku sapi iya empu. Udah nya, iya meri semua jelu nya ngagai bala rayat ke datai ngambika sida ulih nyerahka korban Paska. 8 Bala pegawai mega meri pemeri enggau sukarela ngagai rayat, bala imam, sereta orang Lewi. Bala tuai ba Rumah Petara ti bendar, iya nya Hilkiah, Sekariah enggau Jehiel meri 2,600 iku korban Paska enggau 300 iku sapi ngagai bala imam. 9 Kelimpah ari nya, bala tuai orang Lewi, iya nya Konaniah enggau bala iya Semayah enggau Netanel, sereta Hasabiah, Jiel enggau Josabat, meri 5,000 iku korban Paska enggau 500 iku sapi ngagai orang Lewi.
10 Lebuh semua utai udah disediaka magang, bala imam pan bediri ba endur sida empu, lalu orang Lewi mega bediri nitihka raban sida, baka ke udah diasuh raja. 11 Orang Lewi nyayat korban Paska, lalu bala imam mechikka darah jelu ke diberi orang Lewi nya ngagai sida. Ba maya ti sama, orang Lewi niti kulit semua jelu nya. 12 Udah nya, sida nyediaka pemeri tunu ke bala rayat ke udah begempuru nitihka suku sida empu. Enggau nya, bala rayat ulih nyerahka semua pemeri nya ngagai Jehovah, nitihka utai ke udah ditulis ba bup Moses. Sida mega ngereja utai ti sama ngagai semua sapi nya. 13 Sida manduk* pemeri Paska nitihka adat. Sida mega manduk pemeri ti kudus dalam periuk mit, periuk besai, enggau kali ti rata, lalu berumban mai pemeri nya ngagai bala rayat. 14 Udah nya, orang Lewi nyediaka korban Paska ke sida empu sereta ke bala imam ari peturun Aron, laban bala imam nya nyerahka pemeri tunu enggau lemak jelu nyentukka hari nyau malam. Nya alai, orang Lewi nyediaka pemeri ke sida empu sereta ke bala imam ari peturun Aron.
15 Bala penyanyi, iya nya bala peturun Asaf, gawa ba endur sida empu, baka ke udah diasuh David, Asaf, Heman, enggau Jedutun. (Jedutun nya orang ke madahka utai ti dipandangka Petara dalam runding iya ngagai raja.) Bala sida ke nyaga pintu bisi ba pintu-pintu penama. Sida enda ibuh ninggalka pengawa sida laban bala sida, iya nya orang Lewi udah nyediaka utai ke sida. 16 Ba hari nya, sida nembuka semua pengawa ti dikedekaka Jehovah kena ngintu Paska sereta kena nyerahka pemeri tunu ba alta Jehovah. Semua pengawa nya dipejalaika nitihka asuh Raja Josiah.
17 Maya nya, orang Israel datai ngintu Pengerami Paska. Udah nya, sida mega ngintu Pengerami Roti ti Enda Beragi pengelama tujuh hari. 18 Sida bedau kala ngintu Pengerami Paska ke baka nya kenyau ari jeman Nabi Samuel, lalu nadai raja Israel ke bukai ke kala ngintu Pengerami Paska baka ke digaga Josiah, bala imam, orang Lewi, semua orang Judah enggau orang Israel ke datai, sereta semua rayat Jerusalem. 19 Pengerami Paska nya diintu ba taun ke-18 Josiah merintah.
20 Pengudah semua nya, lebuh Josiah udah ngaduka baru Rumah Petara, raja Ejip ke benama Neko, datai deka beperang ba Karkemis, ke semak enggau Sungai Eupratis. Josiah pan mupuk nyerang iya. 21 Nya alai, Neko nganjung pesan ngagai Josiah. Ku iya: “O raja Judah, nama kebuah nuan datai kitu deka nyerang aku? Aku datai seharitu ukai deka beperang ngelaban nuan, tang beperang ngelaban bansa bukai. Petara udah ngasuh aku ngereja nya enggau lengkas. Anang ngelaban Petara ke bisi enggau aku. Nya deka pulai ke penguntung nuan empu. Enti enda, Iya deka ngemunaska nuan.” 22 Tang, Josiah bekeras deka nyerang Neko. Iya menyamar lalu mupuk ngagai Dataran Megido deka beperang ngelaban Neko. Iya enggai mendingka pesan Petara ke dipadah nengah Neko.
23 Bala soldadu ke besenyataka panah nimbak Raja Josiah. Ku Josiah madah ngagai bala soldadu iya: “Bai aku pansut ari endur tu. Aku udah balat amat bakal.” 24 Nya alai, sida mindahka iya ari kerita kuda iya ngagai kerita kuda ke siti da agi, lalu mai iya ngagai Jerusalem. Pengujung iya, iya mati lalu dikuburka ba pendam aki ini iya. Serata Judah enggau Jerusalem tusah ati ke pemati Josiah. 25 Jeremiah belaguka lagu sabak ke Josiah, lalu semua penyanyi lelaki enggau indu belaguka lagu sabak pasal Josiah nyentukka seharitu. Sida ngaga pemutus ngambika semua lagu nya dinyanyika ba Israel, lalu semua lagu nya bisi ditulis ba bup sabak.
26 Sejarah bukai pasal Josiah enggau baka ni iya ngayanka pengerindu ti setia lebuh iya nitihka utai ke ditulis ba Adat Jehovah, 27 nyengkaum semua utai dikereja iya ari pun sampai ujung, bisi ditulis dalam Bup Bala Raja Israel enggau Judah.