Pemansut
31 Ku Jehovah bejaku ngagai Moses: 2 “Aku udah milih Bezalel ari raban bansa Judah. Iya anak Uri, lalu iya mega uchu Hur. 3 Aku deka meri iya kuasa kudus Aku, ngambika iya bepenemu-dalam, ulih meretika utai, sereta bisi penemu pasal semua macham pengawa betukang. 4 Enggau nya, iya ulih ngaga bemacham reka bentuk, ngaga utai ari emas, pirak, enggau temaga, 5 netak enggau masang batu ti berega, sereta ngaga bemacham utai ari kayu. 6 Aku mega deka ngelantik Oholiab anak Ahisamak, ke ari raban bansa Dan, kena nulung iya. Aku deka meri penemu-dalam ngagai semua pekereja ke landik, ngambika sida ulih ngaga semua utai ke udah dipadahka Aku ngagai nuan: 7 Langkau gempuru, peti lampang batu Adat enggau penutup iya, semua pekekas ke ba langkau nya, 8 mija enggau pekekas iya, penuduk lampu ke digaga ari emas ti tulin enggau semua pekekas iya, alta endur alai nunu menyan, 9 alta pemeri tunu enggau semua pekekas iya, bisin enggau kaki iya, 10 gari ke ditenun enggau lawa, gari ti kudus ke Imam Aron, gari ke bala anak lelaki iya ke gawa nyadi imam, 11 minyak ti kudus, sereta menyan ti bebau rengut ba endur ti kudus. Sida deka ngaga semua utai ke udah dipadahka Aku ngagai nuan.”
12 Ku Jehovah nampung jaku Iya ngagai Moses: 13 “Padah ngagai orang Israel: ‘Ari generasi ke generasi,* kita mesti ngintu Hari Sabat laban nya meh tanda sempekat ke digaga entara Aku enggau kita, ngambika kita nemu Aku tu meh Jehovah, ke udah nguduska kita. 14 Kita mesti ngintu Hari Sabat, laban nya hari ti kudus ke kita. Barang sapa ke ngelanggar adat Sabat mesti diukum bunuh. Enti bisi orang ke gawa ba hari nya, orang nya mesti diukum bunuh. 15 Kita ulih gawa dalam enam hari, tang hari ketujuh nya Hari Sabat. Nya hari kita ulih berehat. Hari nya kudus ba Aku, Jehovah. Enti bisi orang ke gawa ba Hari Sabat, orang nya mesti diukum bunuh. 16 Orang Israel mesti ngintu Hari Sabat. Ari generasi ke generasi, sida mesti ngintu hari nya. Tu meh sempekat ti meruan belama iya. 17 Hari Sabat nya deka nyadi tanda ti meruan belama iya entara Aku enggau orang Israel, laban dalam enam hari Aku, Jehovah, udah ngaga langit enggau dunya. Tang ba hari ti ketujuh, Aku berehat lalu puas ati enggau pengawa Aku.’”
18 Pengudah Petara bejaku enggau Moses ba Gunung Sinai, Iya meri ngagai Moses dua iti lampang batu ke ngembuan pesan Iya.* Petara nulis pesan nya ngena jari* Iya Empu.