Pemansut

36 “Bezalel deka gawa begulai enggau Oholiab sereta semua sida ke landik. Jehovah udah meri sida penemu-dalam sereta pemereti ati, ngambika sida ulih ngereja semua utai ke bekaul enggau pengawa ti kudus, baka ke udah dipadahka Jehovah.”

2 Moses pan ngangauka Bezalel, Oholiab, enggau semua sida ke landik. Jehovah udah meri sida penemu-dalam, lalu ati sida meransang sida ngereja pengawa nya. 3 Sida pan ngambi ari Moses semua pemeri ke dibai orang Israel kena bejalaika pengawa ti kudus. Ba maya ti sama, orang Israel majak mai pemeri ngagai Moses ninting pagi.

4 Bala pekereja ke landik nya pan berengkah ngereja pengawa ti kudus. Udah nya, siku-siku sida datai 5 ngagai Moses lalu madahka: “Pemeri ke dibai orang kena bejalaika pengawa ke diasuh Jehovah nyau lebih ari chukup.” 6 Moses pan ngasuh orang ngirumka pesan tu ngagai serata kem: “Anang agi mai pemeri kena ngaga Langkau Sembiang.” Nya alai, sida pan badu agi meri utai. 7 Pemeri ke udah dibai kia nyau lebih ari chukup kena nembuka semua pengawa nya.

8 Semua pekereja ke landik nya ngaga 10 iti kain ke Langkau Sembiang. Kain nya digaga ari ubung linin ti alus, ubung biru, ubung ungu ke digaga ari bulu bedus, enggau ubung mirah. Bezalel nyulam gambar cherub ba kain nya. 9 Pemesai tiap iti kain nya mesti sama. Pemanjai iya 12.5 meter, lalu buka iya 1.8 meter.* 10 Iya nyambungka lima iti kain nya nyadi siti kain ti besai. Iya mega ngaga utai ti sama ngagai lima iti kain da agi. 11 Udah nya, iya ngaga gelung ba tisi siti ari kain ti besai nya ngena ubung biru, lalu iya mega ngaga utai ti sama ba kain ke siti da agi, ngambika dua iti kain nya ulih disambung. 12 Iya ngaga 50 iti gelung ba tisi siti ari kain nya, lalu ngaga 50 iti gelung ba tisi kain ke siti da agi, ngambika lebuh kedua-dua iti kain nya disambung, gelung nya bisi pasangan iya empu. 13 Kepenudi iya, iya ngaga 50 iti pengait emas kena nyambung kedua-dua iti kain nya, ngambika kain nya nyadi siti kain ti besai ke Langkau Sembiang.

14 Udah nya, iya ngaga 11 iti kain ari bulu kambin kena nutup Langkau Sembiang. 15 Pemesai 11 iti kain nya mesti sama. Pemanjai iya 13.4 meter, lalu buka iya 1.8 meter.* 16 Iya pan nyambung lima iti kain nya nyadi siti kain ti besai. Iya mega ngaga utai ti sama ngagai enam iti kain da agi. 17 Udah nya, iya ngaga 50 iti gelung ba tisi siti ari kain nya, lalu ngaga 50 iti gelung ba tisi kain ke siti da agi, ngambika dua iti kain ti besai nya ulih disambung. 18 Iya ngaga 50 iti pengait temaga kena nyambung kedua-dua iti kain nya nyadi siti kain ti besai.

19 Iya ngaga siti tudung ke Langkau Sembiang ngena kulit bedus ti lelaki ke udah digaga nyadi warna mirah. Iya mega ngaga siti da agi tudung ngena kulit anjing laut ke patut diengkahka ba atas tudung ke digaga ari kulit bedus nya.

20 Udah nya, iya ngaga langkar ngena kayu akasia lalu nirika langkar nya kena ngaga dinding Langkau Sembiang. 21 Peninggi tiap iti langkar nya 445 sentimeter, lalu buka iya kira-kira 67 sentimeter.* 22 Tiap iti langkar nya bisi dua iti kaki,* lalu kaki nya digaga berimbai enggau pangan diri. Baka nya meh chara iya ngaga semua langkar Langkau Sembiang. 23 Iya ngaga 20 iti langkar ba begian selatan Langkau Sembiang. 24 Udah nya, iya ngaga 40 iti pelasar pirak, lalu ngengkahka pelasar nya ba baruh 20 iti langkar nya. Tiap iti langkar bisi dua iti pelasar, endur ngengkahka kaki langkar nya. 25 Iya mega ngaga 20 iti langkar ba begian utara Langkau Sembiang. 26 Iya ngaga 40 iti pelasar pirak, lalu ngengkahka 2 iti pelasar ba baruh tiap iti langkar nya.

27 Iya ngaga enam iti langkar ba begian barat, iya nya begian belakang Langkau Sembiang. 28 Dua iti langkar digaga iya kena ngetanka kedua-dua sukut begian belakang Langkau Sembiang. 29 Langkar nya bisi dua batang kayu, lalu begian atas dua iti kayu nya disambungka ba gelang ti keterubah. Iya ngaga utai ti sama ba sukut ke siti da agi. Baka nya meh chara iya ngaga dua iti langkar nya kena ngetanka kedua-dua sukut begian belakang Langkau Sembiang. 30 Semua sekali bisi lapan iti langkar sereta 16 iti pelasar pirak. Dua iti pelasar diengkahka ba baruh tiap iti langkar nya.

31 Udah nya, iya ngaga palang ngena kayu akasia kena nyambung langkar Langkau Sembiang. Lima iti palang ke langkar ba begian selatan, 32 lima iti palang ke langkar ba begian utara, lalu lima iti palang ke langkar ba begian barat, iya nya begian belakang Langkau Sembiang. 33 Iya ngaga palang ba tengah langkar nya lalu masang palang nya ari ujung siti ngagai ujung siti. 34 Iya ngelapis semua langkar enggau palang ngena emas. Iya mega ngaga gelang emas endur ngerasukka palang nya.

35 Iya ngaga kain tirai ngena ubung biru, ubung ungu ke digaga ari bulu bedus, ubung mirah, enggau ubung linin ti alus. Iya mega nyulam gambar cherub ba kain tirai nya. 36 Udah nya, iya ngaga empat iti tiang kena ngantung kain tirai nya. Tiang nya digaga iya ngena kayu akasia ke dilapis ngena emas. Pengait tirai nya digaga iya ari emas, lalu iya mega ngaga empat iti pelasar pirak ke tiang nya. 37 Iya lalu nenun kain tirai ke pintu penama langkau nya ngena ubung biru, ubung ungu ke digaga ari bulu bedus, ubung mirah, enggau ubung linin ti alus. 38 Iya ngaga lima iti tiang enggau pengait ke tirai nya. Begian atas tiang nya enggau penyambung* tiang nya dilapis iya ngena emas. Iya mega ngaga lima iti pelasar temaga ke tiang nya.