Pemansut
4 Tang ku Moses nyaut: “Baka ni enti sida enda pechayaka aku deh, lalu enggai ninga utai ku aku, lalu madahka: ‘Ni bisi Jehovah ngayanka Diri ngagai nuan?’” 2 Udah nya, Jehovah nanya iya: “Nama utai ke dipegai nuan nya?” Ku iya nyaut: “Tungkat.” 3 Ku Petara madah: “Tikauka tungkat nya ke tanah.” Iya pan nikauka tungkat nya ke tanah, lalu tungkat nya nyadi siku ular. Moses pan ngenyauhka diri ari ular nya. 4 Udah nya, Jehovah madah ngagai Moses: “Tangkap ular nya ba iku iya.” Iya pan nangkap ular nya, lalu ular nya berubah nyadi tungkat baru. 5 Ku Petara bejaku baru: “Tu deka nyadi bukti ngambika sida pechaya Aku, Jehovah, iya nya Petara aki ini sida, Petara Abraham, Isak, enggau Jakop, udah ngayanka Diri ngagai nuan.”
6 Ku Jehovah madah ngagai iya: “Engkahka jari nuan ke dalam baju nuan.” Iya pan ngengkahka jari iya ke dalam baju iya. Lebuh iya mansutka jari iya, jari iya nyadi burak baka seleju ketegal penyakit kulit ti balat.* 7 Udah nya, Petara madahka: “Engkahka jari nuan baru ke dalam baju nuan.” Nyadi, iya pan ngengkahka jari iya ke dalam baju iya. Lebuh iya mansutka jari iya, penyakit kulit nya pan nadai agi ba jari iya. 8 Ku Petara madah: “Enti sida enda pechayaka nuan tauka sida enda pedulika utai ti luar biasa ti keterubah nya, sida tentu deka pechaya lebuh sida meda utai ti luar biasa ti kedua nya. 9 Tang, enti sida agi enda pechaya pengudah meda dua iti utai ti luar biasa nya, lalu sida enggai ningaka utai ku nuan, ambi ai ari Sungai Nil lalu tuangka ai nya ba tanah ti rangkai. Ai nya deka berubah nyadi darah.”
10 Ku Moses madah ngagai Jehovah: “Minta ampun, Jehovah. Aku enda lanchar bejaku kenyau ari suba. Pengudah nuan bejaku enggau aku pan, aku agi enda lanchar bejaku. Aku ukai orang ke pandai bejaku.” 11 Ku Jehovah nyaut iya: “Sapa ke ngaga mulut mensia, tauka ke ngasuh mensia nyadi bisu, bengal, meda enggau lansik, tauka buta? Endaka Aku, Jehovah, ke ulih ngereja nya? 12 Nya alai, mupuk nuan. Aku deka nulung nuan lebuh nuan bejaku, lalu Aku deka ngajar nuan utai ke patut disebut nuan.” 13 Tang ku Moses bejaku: “Ampunka aku, Jehovah. Anjung meh orang bukai. Sapa-sapa aja ke dipilih Nuan.” 14 Jehovah pan lalu ringat ngagai Moses. Ku Iya madahka: “Baka ni enggau menyadi nuan Aron deh, ke ari raban bansa Lewi nya? Aku nemu iya pandai amat bejaku. Diatu iya benung bejalai kitu deka betemu enggau nuan. Lebuh iya meda nuan, iya tentu gaga ati. 15 Nuan mesti bejaku enggau iya, lalu padah ngagai iya utai ke dipadahka Aku ngagai nuan. Aku deka nulung seduai lebuh seduai bejaku, lalu Aku deka ngajar seduai utai ke patut dikereja seduai. 16 Iya deka bejaku ngagai orang ngarika nuan, lalu nuan deka nyadi baka Petara* ke iya. 17 Bai tungkat tu, lalu nuan deka ngereja pengawa ti luar biasa ngena tungkat tu.”
18 Moses pan pulai ngagai entua iya ke lelaki, Jetro, lalu madah ngagai iya: “Ulih aku pulai ngagai bala menyadi aku ba Ejip? Aku deka meda baka ni gaya sida ba din.” Ku Jetro madah ngagai Moses: “Alai meh. Bejimat au.” 19 Udah nya, Jehovah bejaku ngagai Moses ba Midian: “Pulai meh ngagai Ejip, laban semua orang ke deka munuh nuan udah mati magang.”
20 Udah nya, Moses nulung bini enggau bala anak lelaki iya nepan siku keledai, lalu sida pan mupuk ngagai Ejip. Moses mega mai tungkat Petara ti bendar. 21 Jehovah lalu bejaku ngagai Moses: “Pengudah nuan pulai ngagai Ejip, tentuka nuan ngaga semua pengawa ti luar biasa nya ba depan Firaun. Aku udah meri nuan kuasa kena ngereja nya. Tang Aku deka nejuka ati iya degil, lalu iya enggai ngasuh bala nembiak Aku mupuk. 22 Nuan mesti madah ngagai Firaun: ‘Tu meh utai ke dipadahka Jehovah: “Israel nya anak lelaki Aku, anak tuai Aku. 23 Awakka anak Aku mupuk ngambika iya ulih nyembah Aku. Tang enti nuan enggai, Aku deka munuh anak lelaki nuan, iya nya anak nuan ke tuai.”’”
24 Ba endur sida bemalam ba rantau jalai, Jehovah* betemu enggau iya lalu deka munuh iya.* 25 Nya alai, Sipora ngambi batu ti tajam lalu nyunat anak lelaki iya, lalu udah nya nikauka kulit tutus nya ngagai kaki iya.* Ku Sipora madahka: “Nengah darah tu, nuan nyadi pengantin lelaki aku.” 26 Nya alai, Petara mupuk ari iya. Ba maya nya, ketegal pengawa sunat nya, Sipora madahka, “Nengah darah, nuan nyadi pengantin lelaki aku.”
27 Udah nya, Jehovah madah ngagai Aron: “Alai nuan mansang ngagai menua puang lalu betemu enggau Moses.” Aron pan mupuk lalu betemu enggau Moses ba gunung Petara ti bendar. Lebuh betemu enggau Moses, iya nyium Moses. 28 Moses madah ngagai Aron semua utai ke udah dipadahka Jehovah. Iya mega madahka semua utai ti luar biasa ke mesti digaga iya. 29 Udah nya, Moses enggau Aron lalu ngempuruka semua tuai orang Israel. 30 Aron madah ngagai sida, semua utai ke udah dipadahka Jehovah ngagai Moses, lalu Moses ngaga utai ti luar biasa ba depan orang Israel. 31 Sida pan lalu pechaya. Lebuh orang Israel ninga Jehovah udah beratika sida lalu udah meda pemerinsa sida, sida pan besugang.