Isaiah
3 Peda! Jehovah, Tuan ti bendar, ketuai soldadu serega,
Deka muai semua jenis bantu ari Jerusalem enggau Judah,
Iya nya pemakai* enggau ai irup,
2 Orang ti kering enggau pahlawan,
Hakim enggau nabi, orang ke nemu meramal enggau bala tuai,
3 Ketuai atas 50 iku orang, orang ke tinggi pangkat, enggau penasihat,*
Orang ke nemu sihir* sereta dukun.
4 Aku* deka ngasuh bala nembiak nyadi tuai sida;
Orang ke selalu berubah runding deka merintah sida.
5 Orang deka merinsaka pangan diri,
Tiap iku orang deka ngenusahka pangan diri,
Nembiak mit deka nyerang orang ke tuai,
Lalu orang biasa ngelaban orang ke dipebasa.
6 Tiap iku orang deka megai menyadi iya ba rumah apai iya empu lalu madahka:
“Nuan bisi baju jubah. Nuan meh ke nyadi pemerintah kami.
Atur meh utai ke bekaul enggau endur ke udah runtuh tu.”
7 Tang menyadi iya nyaut:
“Enggai aku ngubat abi nuan ke bakal;
Aku empu pan nadai pemakai tauka gari ba rumah.
Anang ngasuh aku nyadi pemerintah kita.”
8 Jerusalem udah tumbang,
Lalu Judah udah labuh,
Ketegal sida bejaku sereta ngereja utai ke ngelaban Jehovah;
Ba depan Petara* ti bemulia, sida enda belalai ngelaban Iya.
9 Gamal sida mantaika penyai sida,
Lalu sida nusui dosa sida baka orang Sodom;
Sida enda ngelalaika dosa diri.
Tulah meh sida, laban sida mai penusah ngagai diri empu!
10 Padah ngagai orang ke lurus, sida deka mujur;
Sida deka diberekat ketegal utai ke digaga sida.*
11 Tulah meh orang ke jai!
Penusah deka ninggang iya,
Laban utai ke dikereja jari iya deka nyadi ba iya empu!
12 Bala mandur kasar amat ngagai bansa aku,
Lalu bala indu deka bekuasa atas sida.
O bansa aku, bala tuai kita udah nesatka kita,
Ngambika kita enda nemu ni bagi jalai ke patut ditengah kita.
13 Jehovah udah besedia deka madahka jaku tuduh Iya;
Iya bediri deka madahka pemutus pechara Iya ke deka ninggang mayuh bansa.
14 Jehovah deka ngakim bala tuai enggau bala pegawai nembiak Iya.
“Abis kebun anggur ditunu kita,
Lalu utai ke dichuri kita ari orang ke miskin bisi ba rumah kita.”
15 Ku Jehovah, Tuan ti Pemadu Tinggi, ketuai soldadu serega madahka:
“Berani kita nganchurka nembiak Aku. Kita ngansarka mua orang ke miskin ba tanah.”
16 Ku Jehovah madahka: “Naka meh penyumbung bala anak indu Sion,
Sida melenggika pala lebuh bejalai,
Sida bemain mata nguntik orang, bejalai linggang-lingguk,
Ngambika gelang ba kaki sida bekeranding.
17 Tang Aku, Jehovah, deka ngasuh pala bala anak indu Sion bekuris,
Lalu Aku, Jehovah, deka ngasuh begian depan pala sida nadai buk.
18 Ba hari nya, Aku, Jehovah, deka ngerampas utai kena sida ngias diri:
Gelang kaki, sekang buk, barang kemas ke bentuk bulan sabit,
19 Antin, gelang jari, kain kena nutup mua,
20 Utai kena ngias pala, rantai kena ngias kaki, kain kena ngias dada,
Sarang minyak wangi, jimat,
21 Tinchin jari, antin idung,
22 Baju jubah kena berami, gari luar, baju jubah, beg duit,
23 Cheremin mit, gari linin,
Serban, enggau kain kena nutup mua.
24 Diatu, sida bebau minyak balsam,* tang dudi hari ila, sida deka bebau but;
Tali pinggang deka diganti enggau tali;
Pala sida ke bisi stail buk ti lawa deka nyadi botak;
Gari sida ti lawa deka diganti enggau kain guni;
Lalu pemajik sida deka diganti enggau abi betu.*
25 Bala lelaki kita deka mati dibunuh pedang,
Lalu bala pahlawan kita deka lenyau nyawa maya beperang.
26 Pintu penama kuta deka nyadi baka siku indu,
Ke benung duduk ba tanah sereta nyabak tusah ati.”