Isaiah
31 Tulah meh orang ke mansang ngagai Ejip minta tulung,
Orang ke andalka bala kuda,
Ke arapka kerita kuda ti mayuh,
Sereta ke arapka kuda perang* ti kering.
Tang sida enda malik ngagai Petara Israel ti Kudus,
Lalu sida nadai ngiga Jehovah.
2 Taja pia, Petara nya bepenemu-dalam lalu deka ngenataika penulah;
Jaku ke disebut Iya tentu deka nyadi.
Iya deka angkat ngelaban raban orang ke jai,
Lalu ngelaban orang ke nulung orang ke jai.
3 Orang Ejip nya semina mensia aja, ukai Petara;
Bala kuda sida semina jelu aja, ukai kuasa ke enda ulih dipeda.
Lebuh Jehovah ngunjurka jari Iya,
Sapa-sapa ke meri tulung deka teterap,
Lalu sapa-sapa ke bulih tulung deka labuh.
Semua sida deka dipunaska ba maya ti sama.
4 Tu meh utai ke udah dipadahka Jehovah ngagai aku:
“Baka singa ti biak sereta kering, ke merengung lebuh nyaga mansa iya,
Ke enda takutka seraban pengibun bedus ke diasuh muru iya,
Sereta enda takutka munyi nyawa sida,
Tauka rari ninga sida rauh-rauh,
Baka nya mega Jehovah, ketuai soldadu serega, maya Iya nurun beperang
Ngarika bukit enggau Gunung Sion.
5 Baka burung ke terebai ba atas bala anak iya, Jehovah, ketuai soldadu serega, deka ngelindung Jerusalem.
Iya deka ngelindung lalu nyelamatka Jerusalem.
Iya deka ngayanka pengasih lalu ngelepaska Jerusalem.”
6 “O orang Israel, pulai meh baru ngagai Iya, taja pan kita udah terang-terang ngelaban Iya. 7 Kita udah bedosa lalu ngaga bala petara ti nadai guna ari pirak enggau emas. Tang ba hari nya, semua kita deka muai petara nya.
8 Orang Asiria deka dibunuh ngena pedang, tang ukai pedang mensia;
Siti pedang ti ukai pedang mensia deka ngemunaska sida.
Sida deka rari ketegal pedang nya,
Lalu bala sida ke agi biak deka dipaksa gawa nyadi ulun.
9 Orang ke dipechayaka sida* deka rari ketegal balat takut,
Lalu bala tuai sida deka berasai balat amat takut lebuh meda tiang ke meri tanda,” ku Jehovah,
Ke bisi api ba Sion sereta bisi serumbung api ba Jerusalem.