Isaiah
47 O indu dara Babilon,
Nurun meh lalu duduk ba debu.
O anak indu orang Kaldea,
Duduk meh ba tanah, kerusi diraja udah nadai agi.
Nadai agi orang deka ngumbai nuan lembut sereta manja.
2 Ambi batu kisar* lalu kisar bijirin nyadi tepung.
Buka tudung pala nuan.
Kelisi jubah nuan nyentukka kaki nuan dipeda,
Lalu meraka sungai.
3 Nuan deka telanjai.
Nuan deka dikemaluka.
Aku deka malas, lalu nadai orang ulih nagang Aku.*
4 “Nama Iya ke nebus kitai nya
Jehovah, ketuai soldadu serega.
Iya meh Petara Israel ti Kudus.”
5 O anak indu orang Kaldea,
Duduk jenuh lalu tama meh ngagai pemetang.
Nadai agi orang ngangauka nuan Kuin Perintah.
6 Aku ringat ngagai bala nembiak Aku.
Aku ngamahka pesaka Aku,
Lalu Aku nyerahka sida ngagai jari nuan.
Tang nuan enda kasihka sida.
Nuan indah ngasuh orang ke tuai ngesan tangkun ti berat.
7 Ku nuan madahka: “Aku deka nyadi Kuin belama iya.”
Nuan enda beratika semua utai tu,
Lalu enda berundingka nama deka nyadi pengujung iya.
8 Dingaka tu, nuan ke rindu ngelantangka ati,
Ke ngumbai diri likun, ke bejaku dalam ati diri:
“Aku aja ke penting, lalu nadai orang ke penting agi ari aku.
Aku enda nyadi indu balu,
Lalu aku tentu enda ngasai baka ni asai mati anak.”
9 Tang dua iti utai tu deka ngenyit ninggang nuan dalam sehari:
Anak nuan deka mati lalu nuan deka nyadi balu.
Utai nya deka balat ninggang nuan,
Laban* nuan ngereja mayuh pengawa sihir* sereta ngena jaku puchau ti bisa.
10 Nuan arapka penyai nuan.
Ku nuan madah: “Nadai orang meda aku.”
Penemu-dalam enggau penemu nuan ngasuh nuan limpang,
Lalu nuan madah dalam ati diri: “Aku aja ke penting, lalu nadai orang ke penting agi ari aku.”
11 Tang penulah deka nuntung nuan,
Lalu nadai siti pan pengawa sihir nuan ulih nagang nya.*
Penusah deka mangka nuan, lalu nuan enda ulih nagang nya.
Nuan deka dianchurka enggau ngenyit lalu nya enda disadang nuan.
12 Alai meh, kena jaku puchau nuan enggau semua sihir nuan,
Ke udah bendar dipelajarka nuan kenyau ari maya nuan agi biak.
Ni nemu nya ulih nulung nuan;
Ni nemu nya ulih ngasuh orang takut.
13 Nuan nyau lelak laban nuan bisi mayuh penasihat.*
Sida ke nyembah langit,* ke beratika bintang,
Sida ke meri penemu maya bulan baru
Pasal utai ke deka nyadi ngagai nuan,
Awakka sida mansang lalu nyelamatka nuan.
14 Peda! Sida baka rumput ti rangkai.
Api deka nganguska sida.
Sida enda ulih nyelamatka diri empu ari api ti mau.
Api nya ukai bara api kena ngangatka tubuh,
Ukai api kena bekindu.*
15 Nya meh penyadi ngagai bala dukun nuan,
Ke udah bebendar gawa enggau nuan kenyau ari maya nuan agi biak.
Sida deka segau-segau sereta ngachir ba dini-dini endur.*
Nadai siku pan deka nyelamatka nuan.