Isaiah

64 Enti sema Nuan nyarikka langit lalu nurun,

Ngambika gunung-gunung begegar ketegal Nuan;

 2 Enti sema Nuan nurun baka api ke nganguska dan kayu,

Sereta baka api ke ngasuh ai melidih,

Nya baru bala munsuh Nuan nemu nama Nuan,

Lalu mayuh bansa deka getar-getar takut ba depan Nuan!

 3 Lebuh Nuan ngereja utai ti luar biasa ke enda berani dikearapka kami,

Nuan nurun lalu gunung-gunung begegar ba depan Nuan.

 4 Kenyau ari kelia menya, nadai orang kala ninga tauka mending,

Lalu nadai orang kala meda Petara ke baka Nuan,

Ke ngereja utai ke orang ti arapka* Nuan.

 5 Nuan udah betemu enggau orang ke rindu ngereja utai ti betul,

Orang ke ingatka Nuan sereta ke nitihka jalai Nuan.

Tang Nuan ringat laban kami majak bedosa,

Kami udah lama bedosa.

 6 Semua kami nyau baka orang ke enda tuchi,

Lalu semua pengawa kami ti lurus nyau baka kain ti kamah.*

Semua kami deka layu baka daun,

Lalu kami deka dikebuka penyalah kami, baka daun ke dikebuka angin.

 7 Nadai orang ngangauka nama Nuan,

Nadai orang nguji deka bepegai rat ba Nuan,

Laban Nuan udah ngelalaika mua Nuan ari kami,

Lalu Nuan nejuka kami luluh ketegal penyalah kami empu.

Kami tu tanah liat, lalu Nuan meh Tukang Periuk Tanah kami;*

Semua kami tu asil ari pengawa jari Nuan.

 9 O Jehovah, anang kelalu ringat,

Anang ngingatka penyalah kami belama iya.

11 Rumah* kami ti kudus sereta bemulia,

Iya nya rumah alai aki ini kami muji Nuan,

Udah abis angus diempa api,

Lalu semua utai ke berega ba kami udah nyadi tembawai magang.