Matthew

14 Maya nya, Herod* ke merintah menua nya, ninga berita pasal Jesus. 2 Ku iya bejaku enggau bala ulun iya: “Iya tu John Pemaptisa ke udah diangkatka ari mati. Nya kebuah iya bisi kuasa ngaga kereja ajih baka nya.” 3 Sebedau nya, Herod udah nangkap John, ngerantai iya, lalu nutup iya dalam rumah jil, ketegal Herodias, bini menyadi iya Philip. 4 John udah suah madah ngagai Herod: “Nuan salah jadi enggau iya.” 5 Taja pan Herod bisi ati deka munuh John, iya takutka orang mayuh, laban sida ngumbai John nabi. 6 Tang maya pengerami hari pengada Herod, anak indu Herodias betanda ba mua bala temuai, lalu Herod gaga amat ati. 7 Nya alai, iya besemaya ngena sumpah deka meri sebarang utai ti dipinta indu nya. 8 Indu nya nitihka jaku indai iya lalu minta: “Beri ngagai aku pala John Pemaptisa ba atas talam.” 9 Raja nya lalu tusah ati, tang ketegal iya udah besemaya ba mua semua bala temuai iya, iya lalu meri pesan ngasuh pala John diberi ngagai indu nya. 10 Iya ngasuh orang mumpung pala John dalam rumah jil. 11 Pala John dibai ngena talam, lalu disuaka ngagai indu nya. Indu nya lalu mai pala nya ngagai indai iya. 12 Pengudah nya, bala murid John datai ngambi bangkai iya, lalu nguburka iya. Udah nya sida mupuk lalu madah ngagai Jesus. 13 Lebuh Jesus ninga rita pasal John, iya mupuk kediri ari endur nya ngena perau ngagai endur ti sunyi. Tang lebuh orang mayuh nemu pasal nya, sida bedarat nitihka iya ari nengeri sida empu.

14 Lebuh Jesus datai ba tebing, iya meda mayuh amat orang. Iya kasihka sida, lalu ngeraika sida ke sakit. 15 Lebuh hari nyau lemai, bala murid iya datai lalu bejaku enggau iya: “Endur tu jauh lalu hari pan nyau udah laun. Asuh orang mayuh tu mupuk, ngambika sida bejalai ngagai endur ke bisi genturung pendiau, lalu meli pemakai ke diri empu.” 16 Tang ku Jesus bejaku: “Sida enda ibuh mupuk. Kita empu meri sida utai diempa.” 17 Ku sida nyaut: “Kami semina bisi lima iti tuku roti, enggau dua iku ikan aja.” 18 Ku Jesus: “Bai pemakai nya ngagai aku.” 19 Udah nya, iya ngasuh orang mayuh duduk ba rumput. Iya ngambi lima iti tuku roti enggau dua iku ikan nya, engkadah ke langit, lalu besampi meri terima kasih.* Pengudah mechahka roti nya, iya nyuaka roti nya ngagai bala murid iya, lalu sida nyadung roti nya ngagai orang mayuh. 20 Semua orang bela makai lalu kenyang magang. Udah nya, bala murid iya ngumpul 12 bakul ti penuh laban teda pemakai nya. 21 Pemayuh orang ke makai nya kira 5,000 iku lelaki. Tu enda nyengkaum pemayuh bala sida ke indu enggau bala anak mit. 22 Sepengudah nya, Jesus ngasuh bala murid iya nepan perau lalu mupuk dulu ke seberai danau nya. Lalu iya empu ngasuh orang mayuh pulai.

23 Pengudah ngasuh orang mayuh pulai, iya niki ngagai bukit kediri, deka besampi. Lebuh hari nyau malam, semina Jesus aja bisi ba dia. 24 Tang ba urung maya nya, perau ke ditepan bala murid iya nyau udah beratus meter* ari tebing. Perau sida dipangkaka gelumbang, laban sida nanjak ribut. 25 Maya tumu pagi,* Jesus mansang ngagai sida, bejalai ba atas ai. 26 Tang lebuh sida meda iya bejalai ba atas ai, sida balat amat takut, lalu nyerauh: “Bisi ayas utai!” 27 Jesus lalu ngangau: “Anang takut! Anang irau! Aku tu.” 28 Peter lalu bejaku: “Tuan, enti nya amat nuan, asuh aku bejalai ba atas ai ngagai nuan.” 29 Ku Jesus: “Kitu ke nuan!” Peter angkat ari perau lalu bejalai ba atas ai mansang ngagai Jesus. 30 Tang lebuh iya malik ngagai ribut ti balat, iya lalu takut. Maya iya belabuh tengelam, iya lalu nyerauh: “Tuan, selamatka aku!” 31 Jesus jampat nangkap jari iya, lalu bejaku: “Mit amat pengarap nuan. Nama kebuah nuan kakang?” 32 Pengudah seduai iya nepan perau, ribut lalu teduh. 33 Bala murid Jesus ke dalam perau nya lalu besugang ngagai iya. Ku sida: “Nuan endang amat Anak Petara.” 34 Sida pan datai ba seberai lalu sangkai ba Genesaret.

35 Lebuh orang ba dia nemu iya nya Jesus, sida lalu nesau orang ari serata endur nya. Sida mai semua orang ke sakit ngagai Jesus. 36 Sida minta kasih ngambika iya nejuka sida negu ujung gari luar iya. Semua orang ke negu ujung gari iya, gerai magang.