John

4 Lebuh Tuan Jesus nemu orang Parisi udah ninga iya bulih mayuh agi murid ari John lalu maptisa sida 2 (taja pan ukai Jesus empu ke maptisa orang, tang bala murid iya ke ngereja nya), 3 iya angkat ari Judea lalu mupuk baru ngagai Galili. 4 Tang iya patut nengah Samaria. 5 Iya pan datai ba siti nengeri ke dikumbai Saikar, ba Samaria. Nengeri nya semak enggau tanah ke udah diberi Jakop ngagai anak iya Josep. 6 Telaga Jakop bisi ba dia. Ketegal Jesus berasai lelak pengudah bejalai, iya pan duduk ba telaga* nya. Maya nya urung pukul 12 tengah hari.*

7 Siku indu Samaria datai nyauk ai. Jesus lalu bejaku ngagai iya: “Beri aku ai irup.” 8 Maya nya, bala murid Jesus udah mupuk ke nengeri meli pemakai. 9 Indu Samaria nya bejaku ngagai iya: “Nuan orang Judah, lalu aku tu indu orang Samaria. Nya alai, nama kebuah nuan minta ai irup ari aku?” (Orang Judah enda begulai enggau orang Samaria.) 10 Ku Jesus nyaut: “Enti nuan nemu pasal pemeri pechuma ari Petara, lalu ngelala sapa ke nyebut ngagai nuan, ‘Beri aku ai irup,’ nuan tentu deka minta ai ari iya, lalu iya deka meri nuan ai pengidup.” 11 Indu nya bejaku ngagai iya: “Tuan, nuan nadai beledi kena nyauk ai, lalu telaga tu dalam. Nya alai, ari ni nuan tau bulih ai pengidup nya? 12 Kati nuan besai agi ari aki kami Jakop? Iya ke meri kami telaga tu, lalu iya, bala anak iya, enggau jelu tupi iya mega ngirup ai ari telaga tu.” 13 Ku Jesus nyaut iya: “Semua orang ke ngirup ai tu deka aus baru. 14 Tang barang sapa ke ngirup ai ti deka diberi aku, enda agi aus. Dalam orang nya, ai nya deka nyadi baka pun penatai ai* ke meri pengidup ti meruan belama iya.” 15 Ku indu nya bejaku ngagai iya: “Tuan, beri aku ai nya ngambika aku enda agi aus, lalu enda ibuh agi kitu nyauk ai.”

16 Ku iya bejaku ngagai indu nya: “Alai, kangauka laki nuan lalu asuh iya kitu.” 17 Indu nya lalu nyaut iya: “Aku nadai laki.” Disaut Jesus: “Betul jaku nuan ke madahka diri nadai laki. 18 Nuan udah lima kali belaki, lalu lelaki ke enggau nuan begulai diatu ukai laki nuan. Utai ke disebut nuan endang betul.” 19 Indu nya lalu bejaku ngagai iya: “Tuan, diatu aku nemu nuan endang nabi. 20 Aki ini kami nyembah Petara ba bukit tu, tang bansa kita madahka orang semina tau nyembah Petara ba Jerusalem.” 21 Ku Jesus bejaku ngagai iya: “Pechaya meh ke aku. Maya deka datai alai orang enda agi nyembah Apai ba bukit tu tauka ba Jerusalem. 22 Kita enda ngelala sapa ke disembah kita, tang kami ngelala sapa ke disembah kami, laban pengelepas dulu berengkah ari orang Judah. 23 Taja pia, maya deka datai, indah maya nya udah datai, alai bala penyembah ti bendar deka nyembah Apai nitihka iring kuasa kudus Iya sereta sejalai enggau pemendar. Kebendar iya, Apai benung ngiga orang ke baka nya ngambika nyembah Iya. 24 Petara enda ulih dipeda,* lalu semua penyembah Iya patut nyembah Iya nitihka iring kuasa kudus Iya sereta sejalai enggau pemendar.” 25 Indu nya bejaku ngagai iya: “Aku nemu Messiah ke dikumbai Kristus deka datai. Lebuh iya datai, iya deka madahka semua utai ngagai kami.” 26 Ku Jesus nyaut: “Aku meh iya, ke benung bejaku enggau nuan.”

27 Maya nya, bala murid Jesus pan datai. Sida tekenyit meda iya bejaku enggau siku indu. Tang nadai siku ari sida nanya Jesus: “Nama utai ke diguna nuan?” tauka “Nama kebuah nuan bejaku enggau iya?” 28 Udah nya, indu nya ninggalka kebuk* ai iya lalu pulai ngagai nengeri. Ku iya madah ngagai orang: 29 “Aram kitai meda orang ke udah madah ngagai aku semua utai ke udah dikereja aku. Kada enda iya Kristus?” 30 Sida pan pansut ari nengeri nya, lalu mansang ngagai Jesus.

31 Maya nya, bala murid Jesus bejaku ngagai iya: “Rabbi,* aram makai.” 32 Tang ku iya bejaku ngagai sida: “Aku bisi pemakai ke enda ditemu kita.” 33 Nya alai, bala murid iya lalu bejaku enggau pangan diri: “Nadai orang udah meri iya pemakai, enda pia?” 34 Jesus madah ngagai sida: “Pemakai aku nya ngereja peneka Iya ke ngirumka aku, lalu nembuka pengawa ke diberi Iya. 35 Endaka kita nyebut bisi empat bulan da agi sebedau maya ngetau? Tang aku madah ngagai kita: Peda! Ladang udah mansau,* lalu sedia deka diketau. 36 Orang ke ngetau udah nerima gaji lalu benung ngumpul utai ke diketau, iya nya orang ke deka nerima pengidup ti meruan belama iya. Nya alai, orang ke nabur benih enggau orang ke ngetau deka sama gaga ati. 37 Ba pekara nya, jaku tu endang amat: ‘Siku naburka benih lalu siku da agi ngetau.’ 38 Aku nganjung kita ngetau utai ke enda ditanam kita. Orang bukai gawa lalu kita bulih penguntung ketegal sida bebendar gawa.”

39 Mayuh orang Samaria ari nengeri nya arapka Jesus, ketegal saksi ke diberi indu nya lebuh iya nyebut: “Iya madah ngagai aku semua utai ti udah dikereja aku.” 40 Nya alai, lebuh orang Samaria betemu enggau Jesus, sida minta iya diau enggau sida. Iya pan diau ba dia pengelama dua hari. 41 Pengujung iya, mayuh agi orang arap pengudah ninga utai ke diajar iya. 42 Sida madah ngagai indu nya: “Diatu kami arap ukai semina laban utai ke disebut nuan, tang laban kami empu udah ninga. Lalu kami nemu iya endang penyelamat dunya.”

43 Pengudah dua hari, iya mupuk ari endur nya ngagai Galili. 44 Jesus empu kala madah nabi enda dibasa ba menua diri. 45 Lebuh iya datai ba Galili, orang Galili nyambut penatai iya. Laban lebuh sida datai ngagai pengerami ba Jerusalem, sida udah meda semua utai ke dikereja iya ba din.

46 Udah nya, iya pulai baru ngagai Kana ba Galili, alai iya kala nukar ai nyadi wain. Ba dia bisi siku pemesai ke gawa ke raja. Anak lelaki pemesai nya benung sakit ba Kapernaum. 47 Lebuh iya ninga Jesus bisi datai ari Judea ngagai Galili, iya lalu mansang ngagai Jesus. Iya minta Jesus datai lalu ngeraika anak iya ke nyauka mati. 48 Tang Jesus madah ngagai iya: “Kita tentu enda arap enti kita enda meda tanda enggau kereja ajih.” 49 Pemesai nya lalu bejaku ngagai iya: “Tuan, aram mupuk enggau aku sebedau anak aku mati.” 50 Ku Jesus bejaku ngagai iya: “Mupuk meh nuan. Anak nuan udah gerai.” Lelaki nya arapka jaku Jesus, lalu iya pan mupuk. 51 Lebuh iya benung ba rantau jalai, bala ulun iya datai lalu madahka anak iya udah gerai. 52 Iya lalu nanya sida pukul berapa anak iya gerai. Ku sida nyaut iya: “Ba urung pukul satu ngalih hari* kemari, iya nyau badu agi chelap angat.” 53 Apai anak nya nemu, nya meh maya Jesus madah ngagai iya: “Anak nuan udah gerai.” Nya alai, iya enggau semua sida sebilik arapka Jesus. 54 Nya meh kereja ajih ti kedua ke digaga Jesus lebuh iya datai ari Judea ngagai Galili.