1 Samuel
18 Enda lama pengudah David bejaku enggau Saul, Jonatan enggau David nyadi kaban ti rapat. Jonatan belabuh rinduka David baka iya ke rinduka diri empu. 2 Kenyau ari sehari nya, Saul ngasuh David tetap gawa ke iya, lalu iya enda ngasuh David pulai ngagai rumah apai iya. 3 Ketegal Jonatan rinduka David baka iya ke rinduka diri empu, seduai iya ngaga sempekat enggau pangan diri. 4 Jonatan lalu muka baju jubah ke enda belengan ke dikena iya lalu meri baju nya ngagai David. Iya mega meri baju perang, pedang, panah, enggau tali pinggang iya ngagai David. 5 Kenyau ari nya, David belabuh enggau beperang. Enda ngira kini ke tunga Saul nganjung iya, iya sigi mujur.* Nya alai, Saul ngasuh iya nguluka bala soldadu, lalu tu ngasuh semua orang Israel enggau bala pegawai Saul gaga ati.
6 Lebuh David enggau bala soldadu Israel pulai ari munuh orang Pilistin, bala indu pan pansut ari semua kuta Israel laban deka nyambut penatai Raja Saul. Sida betanda lalu belagu enggau gaga ati sambil nebah tamborin enggau perengka musik ke betali. 7 Bala indu ke ngerami pengawa nya belagu munyi tu:
“Saul munuh beribu iku orang,
Lalu David munuh bepuluh ribu iku orang.”
8 Saul enda rinduka lagu nya, lalu iya balat amat ringat. Ku iya: “Sida madahka David udah munuh bepuluh ribu iku orang, tang aku semina munuh beribu iku orang aja. Enda lama da agi sida deka ngasuh iya nyadi raja.” 9 Kenyau ari sehari nya, Saul enggai agi pechayaka David.
10 Ba hari siti, Petara nejuka runding Saul empu* ngasuh Saul merinsa, lalu Saul pan nyau baka orang gila* ba dalam rumah iya. Maya nya, David benung nebah belikan* baka selama. Saul megai sangkuh 11 lalu nikauka sangkuh nya ngagai David. Saul bejaku dalam ati diri: ‘Aku deka ngentumka David ngagai dinding!’ Tang dua kali David ulih nyeliahka diri. 12 Saul takutka David laban Jehovah bisi enggau David lalu udah ninggalka iya. 13 Nyadi, Saul ngelantik David nyadi ketuai atas seribu iku soldadu, ngambika David enda agi gawa ke iya ba istana. Nya alai, David nguluka bala soldadu iya beperang. 14 David selalu mujur* dalam semua utai ke dikereja iya, laban Jehovah bisi enggau iya. 15 Lebuh Saul meda David selalu mujur, iya pan takutka David. 16 Tang, semua orang Israel enggau Judah rinduka David laban iya nguluka sida beperang.
17 Udah nya, Saul bejaku enggau David: “Tu Merab, anak indu aku ke tuai agi. Aku deka meri iya nyadika bini nuan. Tang, nuan mesti terus ngayanka pemerani ngagai aku sereta belaban ba perang Jehovah.” Tang dalam ati Saul: ‘Awakka David mati ba jari orang Pilistin ngambika aku enda ibuh munuh iya.’ 18 Disaut David: “Sapa meh aku tu, lalu sapa meh ruang bilik apai aku ba Israel, alai aku tu tau layak nyadi menantu raja?” 19 Tang lebuh maya alai Merab, iya nya anak indu Saul, patut diberi ngagai David, Merab lalu diberi ngagai siku lelaki ke benama Adril, iya nya orang Meholah, nyadika bini.
20 Mikal, anak indu Saul, jatuh cinta ngagai David. Bisi orang madah ngagai Saul pasal pekara nya, lalu Saul pan gaga ati. 21 Nya alai, Saul bejaku dalam ati diri: “Aku deka meri Mikal ngagai David ngambika David kena panjuk lalu dibunuh orang Pilistin.” Tu kedua kali Saul nyebut ngagai David: “Seharitu, nuan deka nyadi menantu aku.” 22 Saul bejaku enggau bala pegawai iya: “Kita patut bejaku kediri enggau David lalu madah ngagai iya: ‘Raja rinduka nuan, lalu semua pegawai iya mega rinduka nuan. Kawin meh enggau anak iya.’” 23 Pengudah bala pegawai Saul bejaku munyi nya ngagai David, ku David madahka: “Kati kita ngumbai nya senang ka nyadi menantu raja? Aku tu orang miskin sereta orang ke enda dikelala.” 24 Udah nya, bala pegawai Saul lalu madahka jaku David ngagai Saul.
25 Disaut Saul: “Padah ngagai David: ‘Raja enda minta mas kawin. Raja semina minta 100 iti kulit tutus orang Pilistin kena malas dendam ngagai munsuh raja.’” Kebendar iya, Saul ngaga pelan ngambika David dibunuh orang Pilistin. 26 Bala pegawai lalu madahka jaku raja ngagai David. David gaga ati deka nyadi menantu raja. Nya alai, sebedau maya nya datai, 27 David enggau bala soldadu iya mupuk lalu munuh 200 iku orang Pilistin. Iya ngambi kulit tutus semua sida, lalu mai nya ngagai raja ngambika iya ulih kawin enggau anak raja. Udah nya, Saul meri anak indu iya, Mikal, nyadika bini David. 28 Saul sedar Jehovah bisi enggau David, lalu anak iya, Mikal, sayauka David. 29 Tu ngasuh Saul balat agi takutka David, lalu David nyadi munsuh iya sepemanjai pengidup iya.
30 Tiap kali orang Pilistin mansang beperang, David mujur* agi ari bala pegawai Saul ke bukai, lalu nama David tebilang.