Pemansut

37 Udah nya, Bezalel ngaga peti lampang batu Adat ngena kayu akasia. Pemanjai iya kira-kira 111 sentimeter, buka iya kira-kira 67 sentimeter, lalu peninggi iya kira-kira 67 sentimeter.* 2 Iya ngelapis begian dalam enggau begian luar peti nya ngena emas ti tulin. Iya mega ngaga bingkai emas ba semua tisi peti nya. 3 Iya lalu ngaga empat iti gelang emas, lalu masangka gelang nya ba empat iti kaki peti nya. Dua iti gelang ba sepiak, lalu dua iti gelang ba sepiak da agi. 4 Iya ngaga kayu ngena kayu akasia, lalu ngelapis kayu nya ngena emas. 5 Udah nya, iya ngerasukka kayu nya ke dalam gelang ba tisi peti nya kena ngesan peti nya.

6 Iya ngaga penutup peti nya ngena emas ti tulin. Pemanjai iya kira-kira 111 sentimeter, lalu buka iya kira-kira 67 sentimeter. 7 Udah nya, iya ngaga dua iti cherub emas ngena tukul ba kedua-dua ujung penutup peti nya. 8 Siti cherub digaga iya ba ujung penutup peti nya, lalu siti agi cherub ba ujung siti da agi. Iya ngaga cherub ba kedua-dua ujung penutup peti nya. 9 Dua iti cherub nya betunga enggau pangan diri. Mua seduai iya malik ke baruh ngagai penutup peti nya. Kedua-dua sayap seduai iya ngerembai ke atas, lalu ngelindung peti nya.

10 Iya ngaga siti mija ngena kayu akasia. Pemanjai iya 89 sentimeter, buka iya 44.5 sentimeter, lalu peninggi iya kira-kira 67 sentimeter.* 11 Iya ngelapis mija nya ngena emas ti tulin, lalu ngaga lilit emas ngelingi tisi mija nya. 12 Udah nya, iya ngaga bingkai ngelingi mija nya, lalu buka iya 7.4 sentimeter.* Iya mega ngaga lilit emas ngelingi bingkai nya. 13 Iya ngaga empat iti gelang emas, lalu masangka gelang nya ba empat iti kaki mija ke ba sukut mija nya. 14 Iya masang gelang nya semak enggau bingkai mija nya. Kayu deka dirasuk ke dalam gelang nya kena ngesan mija nya. 15 Kayu nya digaga iya ngena kayu akasia, lalu dilapis iya ngena emas. Kayu nya dikena ngesan mija nya. 16 Udah nya, iya ngaga pinggai, cawan, sereta jag enggau mangkuk kena nuang pemeri wain. Semua utai nya digaga iya ari emas ti tulin, lalu deka diengkahka ba atas mija nya.

17 Iya mega ngaga penuduk lampu ngena emas ti tulin, lalu iya ngaga nya ngena tukul. Pelasar penuduk lampu nya, batang iya, sepal bungai, kuntum bungai, enggau serindak bungai digaga iya ngena siti tekang emas, ukai digaga siti-siti. 18 Batang penuduk lampu nya bisi enam iti cabang. Tiga iti cabang ba sepiak kanan, lalu tiga iti cabang ba sepiak kiba. 19 Tiap iti cabang bisi tiga iti sepal bungai ke baka bentuk bungai almond, lalu tiap iti sepal nya ditusun beselang-seli enggau kuntum bungai sereta serindak bungai. Baka nya meh keenam-enam iti cabang ke pansut ari batang penuduk lampu nya digaga. 20 Ba batang penuduk lampu nya bisi empat iti sepal bungai ke baka bentuk bungai almond, lalu tiap iti sepal nya ditusun beselang-seli enggau kuntum bungai sereta serindak bungai. 21 Siti kuntum bungai ba baruh dua iti cabang ti keterubah, siti kuntum bungai ba baruh dua iti cabang ti kedua, lalu siti kuntum bungai ba baruh dua iti cabang ti ketiga. Baka nya meh keenam-enam iti cabang nya pansut ari batang penuduk lampu nya. 22 Kuntum bungai, cabang, enggau semua begian penuduk lampu digaga ari emas ti tulin, lalu digaga ngena tukul. Semua begian nya digaga ngena siti tekang emas, ukai digaga siti-siti. 23 Udah nya, iya ngaga tujuh iti lampu kelita. Sepit enggau pekekas endur engkah bara api digaga iya ngena emas ti tulin. 24 Iya ngaga penuduk lampu nya enggau semua pekekas iya ngena 34.2 kilogram* emas ti tulin.

25 Iya ngaga siti alta ngena kayu akasia nyadi endur alai nunu menyan. Bentuk alta nya segi empat. Pemanjai iya 44.5 sentimeter, buka iya 44.5 sentimeter, lalu peninggi iya 89 sentimeter.* Iya mega ngaga tanduk alta nya ari kayu ke dikena ngaga alta nya empu. 26 Iya ngelapis begian atas alta nya, semua tisi iya, enggau tanduk iya ngena emas ti tulin. Iya mega ngaga bingkai emas ngelingi alta nya. 27 Ba baruh bingkai alta nya, iya masangka dua iti gelang emas, lalu iya mega masangka dua iti gelang emas ba sepiak da agi. Kayu ke dikena ngesan alta nya ulih dirasukka ke dalam gelang nya. 28 Udah nya, iya ngaga kayu ngena kayu akasia, lalu ngelapis kayu nya ngena emas. 29 Iya mega ngaga minyak ti kudus enggau menyan ti tulin ke bebau rengut. Iya ngaga semua utai nya, sama baka chara siku tukang ti landik ngaga utai nya.