Surat Kereja Rasul
3 Kira-kira pukul tiga ngalih hari,* iya nya maya alai besampi, Peter enggau John mansang ngagai Rumah Sembiang. 2 Ba semak pintu Rumah Sembiang ke dikumbai Pintu Manah, bisi siku lelaki ke mati kaki kenyau ari ada. Ninting hari, iya dibai kia ngambika minta sedekah ari orang ke tama ngagai Rumah Sembiang. 3 Lebuh iya meda Peter enggau John deka tama ngagai Rumah Sembiang, iya lalu minta sedekah ari seduai iya. 4 Tang Peter enggau John malik ngagai iya lalu bejaku: “Peda kami duai.” 5 Lelaki nya pan merening lalu ngarapka diri bulih utai ari seduai iya. 6 Tang Peter madahka: “Aku nadai pirak enggau emas. Tang aku deka meri nuan utai ke dikemisi aku. Dalam nama Jesus Kristus, orang Nasaret, bejalai meh nuan!” 7 Udah nya, Peter megai jari kanan iya lalu nulung iya bediri. Maya nya mega, kaki enggau buku ali lelaki nya nyadi kering. 8 Iya lalu beguai bediri sereta bejalai. Lebuh iya bejalai enggau seduai iya ngagai Rumah Sembiang, iya engkejuk muji Petara. 9 Semua orang ba dia meda lelaki nya bejalai sereta muji Petara. 10 Lebuh sida sedar lelaki nya meh ke selalu duduk minta sedekah ba pintu Rumah Sembiang ke dikumbai Pintu Manah, sida balat iran sereta alit ati meda utai ke udah nyadi ba iya.
11 Lebuh lelaki nya agi bepegai ba Peter enggau John, semua orang ba dia beguai mansang ngagai sida ba Serambi* Solomon. Semua sida balat alit ati enggau utai ke udah nyadi. 12 Lebuh Peter meda nya, iya bejaku ngagai sida: “Orang Israel, nama kebuah kita balat alit ati enggau utai tu. Nama kebuah kita merening ngagai kami baka nya? Baka meh kami tu ke bisi kuasa ulih ngasuh orang tu bejalai? Kati kita ngumbai kami ulih ngereja nya ketegal kami enda bebagi ati nyembah Petara? 13 Petara Abraham, Isak, enggau Jakop, iya nya Petara aki ini kitai, udah ngemuliaka Ulun Iya, Jesus. Iya nya meh orang ke udah disangkal kita ba mua Pilate, lalu kita udah nyerahka iya ngagai munsuh, taja pan Pilate mutuska deka ngelepaska iya. 14 Kita nyangkal orang ke kudus enggau lurus nya, lalu minta Pilate ngelepaska siku pemunuh ke kita. 15 Kita munuh Ketuai ke Dipilih Meri Pengidup, tang Petara udah ngangkatka iya idup baru ari mati, lalu kami nyadi saksi ke pekara tu. 16 Lelaki ke mati kaki ke dipeda sereta dikelala kita tu, udah nyadi kering ketegal nama Jesus sereta ketegal kami arapka nama iya. Pengarap ke diulih kami nengah Jesus meh ke udah ngeraika lelaki tu ba mua kita. 17 Bala menyadi, aku nemu kita enda sedarka utai ke udah digaga diri, baka bala ketuai kita. 18 Tang Petara udah madah nengah semua nabi, Kristus ke dipilih Iya deka merinsa. Baka nya meh utai ke dipadah Petara nya dikeamatka.
19 “Nya alai, nesal ati meh kita, lalu pulai baru ngagai Petara, ngambika dosa kita dibuai. Enggau nya, Jehovah Empu deka meri kita maya alai kita bulih pengering baru. 20 Lalu Iya deka ngirumka Jesus, iya nya Kristus ke udah dipilih Iya ke kita. 21 Jesus deka diau ba serega nyentuk ngagai maya semua utai diaduka baru, baka ke udah dipadah Petara nengah bala nabi ti kudus kelia menya. 22 Indah Moses kala madahka: ‘Petara kita, Jehovah, deka milih siku nabi baka aku ari bansa kita. Kita patut ningaka semua utai ke dipadah iya ngagai kita. 23 Ba bala nembiak Petara, barang sapa ke enda ngasika Nabi nya, deka dipunaska abis lengis.’ 24 Kebendar iya, semua nabi berengkah ari Nabi Samuel enggau bala nabi bukai ke datai pengudah iya, mega udah madahka enggau terang utai ke nyadi ba jeman tu. 25 Bala nabi nya bejaku pasal semaya ke digaga Petara enggau aki ini kita, lalu semaya nya mega ke kita. Petara besemaya ngagai Abraham: ‘Nengah peturun nuan, semua ruang bilik ba dunya deka diberekat.’ 26 Pengudah Petara milih Ulun Iya, Iya dulu ngirumka Ulun nya ngagai kita, ngambika tiap iku kita nesal ati ke pengawa kita ti jai. Tu meh berekat ke kita.”