Pengajar

12 Kala nuan agi biak, kingatka Petara ti bemulia ke udah ngaga nuan, sebedau hari penusah ti besai datai sereta sebedau taun-taun ti deka datai lebuh nuan nyebut: “Aku enda lantang enggau pengidup aku.” 2 Maya nya, penampak mata panas, bulan, enggau bintang nyau enda terang agi, lalu mua hari betumpuk baru pengudah hari ujan.* 3 Ba hari nya, orang ke nyaga rumah berengkah getar-getar; bala lelaki ti kering deka bungkuk; bala indu ngetu ngisar utai laban penyampau sida nyau mimit, lalu sida ke indu ke meda ngagai luar jenila semina meda pemetang. 4 Maya nya, pintu-pintu ke nuju ngagai jalai udah ditutup; bunyi kisar nyau enda entu didinga; orang tedani lebuh ninga bunyi burung, lalu munyi nyawa bala indu ke belagu nyau enda entu didinga agi. 5 Maya nya, orang deka rawan lebuh ba endur ti tinggi, lalu nangika bahaya ti deka nyadi lebuh ba jalai; pun almond bebungai, buntak ngirit tubuh diri empu, lalu buah berri* pechah, laban mensia bejalai nuju ngagai rumah tetap sida, lalu orang ke balat tusah ati* bejalai kulu-kili ba sebelah jalai. 6 Pengujung iya, rantai pirak deka putus, mangkuk emas deka pechah, tempayan ba mata ai deka anchur, lalu roda ke dikena narit beledi ba telaga deka rusak. Sebedau semua nya nyadi, ingat meh ke Petara ti udah ngaga nuan. 7 Udah nya, debu deka pulai baru ngagai tanah baka asal. Seput pengidup deka pulai baru ngagai Petara ti bendar ke udah meri seput nya ngagai mensia.

8 Ku pengajar nya: “Semua utai nadai guna magang! Semua utai nadai guna.”

9 Pengajar nya ukai semina bepenemu-dalam, tang iya mega enda ngetu ngajar orang pasal utai ke udah ditemu iya. Iya mega berunding enggau dalam sereta bebendar ngaga pansik, ngambika iya ulih ngumpul mayuh jaku-dalam. 10 Iya bebendar ngiga jaku ti ngenyamaika ati, lalu nuliska jaku ti betul sereta bendar.

11 Jaku ke disebut orang ke bepenemu-dalam baka tungkat ke dikena pengibun jelu, lalu jaku ke dipilih sida baka paku lawang ke dipantang tegut. Semua nya datai ari siku pengibun bedus. 12 Anak, bisi siti agi utai ke patut dikingatka nuan: Pengawa betuliska bup endang enda nemu abis, lalu enti orang kelalu bendar macha bup, iya deka ngelelakka diri empu.

13 Pengudah nuan ninga semua utai ke dipadahka aku ngagai nuan, tu utai ke patut dikingatka nuan: Nangi meh ke Petara ti bendar lalu ngasika pesan Iya, laban nya meh utai ke patut digaga tiap iku mensia. 14 Petara ti bendar deka ngakim tiap iti pengawa, sekalika pengawa nya manah tauka jai, nyengkaum pengawa ke dikereja belalai.