Surat Kereja Rasul

18 Pengudah nya, Paul mupuk ari Atens lalu mansang ngagai Korint. 2 Ba dia, iya betemu enggau siku lelaki bansa Judah ke benama Akuila. Akuila ada ba Pontus. Akuila enggau bini iya, Prisila, baru datai ari Italia, laban Klaudius udah ngasuh semua orang Judah mupuk ari Rome. Nya alai, Paul nemuai ngagai seduai iya. 3 Ketegal Akuila enggau Prisila mega gawa ngaga langkau kain baka Paul, nya alai Paul diau enggau seduai iya lalu sama gawa enggau seduai iya. 4 Ninting Hari Sabat, Paul deka meri cheramah* ba balai gempuru, lalu bebendar deka nguji ngubah runding orang Judah sereta orang Gerika ngambika sida pechayaka utai ke dipadah iya.

5 Lebuh Silas enggau Timoti datai ari Masedonia, Paul ngena mayuh awak ngerembaika jaku Petara. Iya meri saksi ngagai orang Judah kena nunjukka Jesus nya Kristus. 6 Tang ketegal sida majak ngelaban sereta ngeleseka iya, iya nesaika gari iya lalu madahka: “Enti kita enda diselamatka, nya salah kita empu, ukai salah aku. Berengkah ari diatu, aku deka mupuk ngagai orang bansa bukai.” 7 Nya alai, Paul mupuk ari nya lalu mansang ngagai rumah siku lelaki ke benama Titius Justus. Iya penyembah Petara, lalu rumah iya sepiak balai gempuru. 8 Krispus ke nyadi tuai balai gempuru nya enggau sida ke serumah enggau iya arapka Tuan. Mayuh orang Korint ke ninga Berita Manah pan arap lalu dibaptisa. 9 Nyadi sekali, maya malam hari, Tuan bejaku enggau Paul dalam genera: “Anang takut. Anang enda bemunyi, tang terus meh bejaku, 10 laban aku bisi enggau nuan. Nadai orang deka nyerang sereta ngemediska nuan laban mayuh orang ba nengeri tu deka arapka aku.” 11 Nya alai, pengelama setaun setengah, Paul diau ba dia sereta ngajar jaku Petara ngagai orang mayuh.

12 Lebuh Galio nyadi gabenor Akaya, orang Judah besaup nyerang Paul lalu mai iya ngambika diakim. 13 Ku sida madahka: “Lelaki tu ngasut* orang mayuh nyembah Petara ngena chara ti ngelaban undang-undang.” 14 Tang lebuh Paul baru deka bejaku, Galio madah ngagai orang Judah: “Enti lelaki tu ngereja penyalah tauka ngelaban undang-undang, nya baru aku bisi kebuah deka mendingka kita. 15 Tang enti utai nya bekaul enggau laya pasal jaku, gelar, enggau adat kita, kita empu meh ke patut mutarka nya. Aku enggai ngakim utai ke baka nya.” 16 Galio lalu muru sida ari endur pechara nya. 17 Nya alai, sida nangkap Sostenis, tuai balai gempuru nya, lalu malu iya ba mua endur pechara nya. Tang Galio enggai masuk champur ba pekara nya.

18 Pengudah Paul diau beberapa hari ba dia, iya meri selamat tinggal ngagai bala menyadi lalu belayar ngagai Siria begulai enggau Prisila seduai Akuila. Lebuh Paul ba Kenkria, iya nguntin buk iya pandak nyadika tanda iya udah besumpah ngagai Petara. 19 Lebuh sida datai ba Epesus, Paul ninggalka Prisila enggau Akuila. Iya tama ngagai balai gempuru lalu besilih penemu enggau orang Judah. 20 Sida majak ngasuh iya diau lama agi ba dia. Tang iya enggai. 21 Iya meri selamat tinggal ngagai sida lalu madahka: “Aku deka datai baru ngagai kita enti nya peneka Jehovah.” Udah nya, iya pan belayar ari Epesus 22 ngagai Kaisaria. Iya nemuai ngagai raban gempuru ba Jerusalem. Udah nya, iya mupuk ngagai Antiok.

23 Pengudah Paul diau ba dia enda lama, iya angkat lalu mupuk ngagai mayuh nengeri ba Galatia enggau Prigia kena ngeringka pengarap semua murid Jesus.

24 Siku lelaki bansa Judah ke benama Apollos datai ba Epesus. Iya ada ba Aleksandria. Iya landik bejaku sereta amat meretika ayat Bup Kudus. 25 Iya kala diajar pasal jalai Jehovah. Nengah bantu ari kuasa kudus Petara, iya ransing bejaku sereta ngajar utai ti betul pasal Jesus. Tang, iya semina nemu pasal baptisa John. 26 Apollos belabuh bejaku enggau berani ba balai gempuru. Lebuh ningaka iya bejaku, Prisila enggau Akuila mai iya enggau seduai iya, lalu nerangka jalai Petara ti betul agi ngagai iya. 27 Udah nya, Apollos deka mupuk ngagai Akaya. Nya alai, bala menyadi nulis surat ngagai bala murid ba dia ngambika sida nerima penatai Apollos enggau gaga ati. Lebuh iya datai ba dia, iya mayuh nulung orang ke udah arap nengah pemanah ati Petara ti besai. 28 Enggau ati ti ransing, iya mantaika bukti ti terang ngagai orang mayuh ke nunjukka utai ke diajar orang Judah nya salah. Iya mandangka ayat Bup Kudus ngagai sida kena nunjukka Jesus nya Kristus.