Isaiah
32 Peda! Siku raja deka merintah enggau lurus,
Lalu bala tuai deka merintah enggau adil.
2 Tiap iku sida baka endur belindung ari ribut,
Baka endur beteduh ari kabut,
Baka ai ke mengalir ba menua ti rangkai,
Sereta baka ayuk batu ti besai ba menua puang.
3 Mata orang ke ulih meda enda agi ditutup,
Lalu pending orang ke ulih ninga deka mending enggau manah.
4 Ati orang ke kelalu berumban deka berundingka penemu ke diulih iya,
Lalu dilah orang ke katat-katat deka bejaku enggau lanchar sereta terang.
5 Orang ke beli enda agi dikumbai orang ke gerah jari,
Lalu orang ke nadai prinsip enda agi dikumbai orang ke dipebasa;
6 Orang ke beli deka nyebut utai ngapa,
Lalu ati iya deka ngaga pelan ti jai,
Ngambika meransang orang limpang* sereta nyebut utai ti bula ngelaban Jehovah.
Orang ke lapar enda diberi iya pemakai,
Lalu orang ke aus enda diberi iya ai irup.
7 Pelan orang ke nadai prinsip nya jai;
Iya mai orang ngereja ulah ti ngemaluka.
Taja pan orang ke miskin nyebut utai ti amat,
Iya ngena pemula ngenusahka orang ke merinsa nya.
8 Tang, orang ke gerah jari bisi pengingin deka ngayanka pengerah jari,
Lalu iya empu mega deka seruran ngayanka pengerah jari.
9 “O indu ke enda kiruhka utai, angkat meh lalu dingaka nyawa aku!
O anak indu ke idup lantang senang, pendingka utai ke disebut aku!
10 Kira-kira setaun da agi, kita ke idup lantang senang deka getar-getar takut,
Laban nadai buah ke ulih digumpul kita lebuh musin ngetau anggur abis.
11 O indu ke enda kiruhka utai, kita patut berasai takut!
O kita ke idup lantang senang, kita patut getar-getar takut!
Buka gari kita,
Lalu rasukka kain guni ba punggung kita.
12 Pandam dada kita maya kita besebana
Pasal ladang enggau kebun anggur ti subur,
13 Laban tanah orang ari bansa aku deka penuh enggau babas ti beduri;
Nya deka ngelamun semua rumah ke kala penuh enggau pengaga ati.
Au, ngelamun kuta ke kala lantang ati,
14 Laban menara ti teguh udah ditinggalka;
Kuta ti chapuh udah dilengkaka.
Opel enggau menara jaga udah nyadi menua puang belama iya.
Endur nya ngerinduka ati keledai ti liar,
Sereta nyadi padang rumput ke jelu tupi.
15 Nya deka nyadi baka nya nyentukka kuasa kudus dituangka ngagai kitai.
Udah nya, baru menua puang deka nyadi kebun buah,
Lalu kebun buah nya deka nyadi baka utan.
16 Atur ti adil deka bisi ba menua puang,
Lalu pengelurus deka diau ba kebun buah.
17 Asil ari pengelurus ti bendar nya pengelantang,
Lalu kesan ari pengelurus ti bendar nya pengelantang sereta pengelikun ti meruan.
18 Bansa aku deka diau ba endur ti likun,
Ba endur ti selamat sereta lantang.
19 Tang ujan batu deka nganchurka utan,
Lalu kuta deka dirataka magang.
20 Gaga ati meh kita ke nanam benih ba endur ke bisi ai,
Ke ngelepaska sapi lelaki enggau keledai.”