Jaku-Dalam

Anak ke bepenemu-dalam ngagaka ati apai iya,

Tang anak ke beli ngenusahka ati indai iya.

 2 Pengaya ke diulih nengah chara ti jai nadai mai penguntung,

Tang pengelurus deka nyelamatka orang ari pemati.

 3 Jehovah enda nejuka orang ke lurus lapar;

Iya enggai ngemuaska pengingin orang ke jai.

 4 Orang ke buruk gawa deka miskin,

Tang orang ke rajin deka nyadi kaya.

 5 Anak ke nemu berunding enggau dalam ngumpul asil tanam maya musin panas,

Tang anak ke tinduk maya musin ngetau ngemaluka diri empu.

 6 Orang ke lurus deka nerima berekat,

Tang mulut orang ke jai ngelalaika ulah sida ti kejam.

 7 Orang ke lurus deka dikenang sereta diberekat,

Tang nama orang ke jai deka lenyau.

 8 Orang ke bepenemu-dalam deka nerima jaku ajar,

Tang orang ke tambab bejaku deka diindik.

 9 Orang ke bejalai dalam pengelurus deka diau likun,

Tang orang ke rindu nipu enda ulih ngelalaika pengawa diri.

10 Orang ke rindu nipu* ngasuh orang bukai merinsa;

Orang ke tambab bejaku deka diindik.

11 Mulut orang ke lurus nya pun pengidup,

Tang mulut orang ke jai ngelalaika ulah sida ti kejam.

12 Ati ti begedi ngasuh laya nyadi,

Tang pengerindu ngelamun semua penyalah.

13 Penemu-dalam bisi ba mulut orang ke bisi runding ti dalam,

Tang orang ke beli deka diukum ngena rutan.

14 Penemu berega ba orang ke bepenemu-dalam,

Tang mulut orang ke beli mai penusah.

15 Ba orang ke kaya, pengaya* baka kuta ti bekubu,

Lalu penyeranta ngasuh orang miskin merinsa.

16 Utai ke digaga orang ke lurus nuju ngagai pengidup,

Tang utai ke digaga orang ke jai nuju ngagai dosa.

17 Orang ke nerima disiplin nulung orang bukai nuju ngagai jalai pengidup,*

Tang orang ke nulak jaku ajar ngasuh orang bukai limpang.

18 Orang ke ngelalaika ati diri ti begedi nya orang ke bula,

Lalu orang ke betenahka* orang bukai nya orang ke beli.

19 Orang ke mayuh jaku tentu deka bedosa,

Tang orang ke nyaga mulut diri dikumbai bepenemu-dalam.

20 Dilah orang ke lurus baka pirak ti tulin,

Tang ati orang ke jai nyauka nadai rega.

21 Jaku orang ke lurus ulih ngiring mayuh orang,

Tang orang ke beli mati ketegal enda entu nemu berunding.

22 Berekat ari Jehovah ngasuh orang nyadi kaya,

Lalu berekat Iya nadai mai pemedis.*

23 Orang ke beli ngumbai ngereja pengawa ti ngemaluka baka utai ke dimain,

Tang penemu-dalam enggi orang ke bisi runding ti dalam.

24 Utai ti diketakutka orang ke jai deka nuntung iya,

Tang utai ti dikinginka orang ke lurus deka diberi ngagai iya.

25 Lebuh kabut mansa, orang ke jai deka nadai agi,

Tang orang ke lurus baka asas ti tegap belama iya.

26 Baka chuka ba ngeli enggau asap ba mata,

Baka nya meh orang ke buruk gawa ba mata tuke iya.

27 Nangika Jehovah ngasuh umur panjai,

Tang orang ke jai deka pandak umur.

28 Harapan orang ke lurus deka mai pengaga ati,

Tang harapan orang ke jai deka anchur.

29 Jalai Jehovah ngelindung orang ke nadai bepenyalah,

Tang ba orang ke jai, jalai Iya mai penusah.

30 Orang ke lurus deka seruran diau likun,

Tang orang ke jai enda agi ditejuka diau ba dunya.

31 Mulut orang ke lurus bejaku pasal penemu-dalam,

Tang dilah orang ke jai deka ditetak.

32 Mulut orang ke lurus nyebut utai ti ngelantangka ati,

Tang mulut orang ke jai nyebut utai ti jai.