Epesus

6 Kita ke anak, ngasika apai indai kita baka ke dikedekaka Tuan, laban nya utai ti lurus. 2 “Bebasaka apai enggau indai nuan.” Nya pesan ti keterubah ti diseretaka enggau semaya tu: 3 “Ngambika nuan mujur* sereta panjai umur ba dunya.” 4 Kita ke apai, anang ngasuh anak kita ringat. Tang terus meh ngemesaika sida ngena jaku ajar* sereta iring* ari Jehovah.

5 Kita ke ulun, ngasi meh ke tuan kita ba dunya tu ari ati kita. Kita mega patut nangi sereta bebasa bendar ke sida, baka kita ke ngasika Kristus. 6 Anang semina ngasika sida lebuh kita dikemataka, ketegal deka ngelantangka ati mensia. Tang ayanka diri ngasi baka ulun Kristus, lalu ngereja peneka Petara enggau pengabis ati. 7 Gawa meh ke tuan kita enggau pengabis ati, baka kita ke gawa ke Jehovah, ukai ke mensia, 8 laban kita nemu, tiap iku orang, sekalika iya ulun tauka orang ke bibas, iya deka nerima upah ari Jehovah ketegal tiap iti utai manah ke digaga iya. 9 Pia mega enggau kita ke nyadi tuan. Kita mega patut baka nya enggau ulun kita. Anang ngenakutka sida, laban kita nemu, Tuan sida, ke mega Tuan kita ti ba serega, enda berat sepiak.

10 Ke pengujung iya, terus meh ngulihka kuasa ari Tuan kitai sereta ari pengering Iya ti besai. 11 Rasukka meh semua kereban perang ari Petara, ngambika kita ulih bediri tegap ngelaban panjuk Sitan* ti pintar nipu. 12 Laban kitai ukai bibat ngelaban mensia, tang ngelaban perintah, ngelaban sida ti bekuasa, ngelaban bala pemerintah dunya ti petang tu, sereta ngelaban bala melikat ti jai ba serega. 13 Nya alai, rasukka meh semua kereban perang ari Petara, ngambika kita ulih ngelaban munsuh ba maya* ti jai. Enggau nya, kita ulih bediri tegap pengudah kita ngereja semua utai ke patut digaga kita.

14 Nya alai, bediri tegap. Tanchangka belulang pemendar ba punggung kita, lalu rasukka terabai dada pengelurus. 15 Pasukka kasut ngambika besedia nusui Berita Manah pasal bebaik enggau Petara.* 16 Kelimpah ari semua nya, bai terabai besai pengarap kita, ngambika kita ulih madamka semua laja* ti beapi-api ari Sitan.* 17 Terima mega tupi besi pengelepas enggau pedang kuasa kudus, iya nya jaku Petara. 18 Tiap kali bisi peluang, terus meh besampi ba baruh iring kuasa kudus ngena semua macham sampi sereta sampi ke disebut enggau bebendar. Ngambika ulih ngereja nya, kita patut seruran bejaga sereta bebendar besampi ke nembiak Petara ti kudus. 19 Besampi mega ke aku, ngambika aku ulih nemu utai ke patut disebut aku lebuh aku bejaku. Enggau nya, aku ulih bejaku enggau berani* lebuh nusui resia ti kudus pasal Berita Manah. 20 Aku meh pengari Petara ke nusui Berita Manah, lalu aku dirantai. Besampi meh ke aku, ngambika aku ulih bejaku pasal Berita Manah enggau berani, baka ke patut digaga aku.

21 Tikikus, siku menyadi ti dikerindu sereta ulun ti taluk ngagai Tuan kitai, deka madahka semua utai ngagai kita ngambika kita nemu rita aku. 22 Aku nganjung iya ngagai kita, ngambika kita nemu rita kami, lalu ngambika iya ulih ngelantangka ati semua kita.

23 Ngarapka bala menyadi bisi kaul ti manah enggau Petara, ngembuan pengerindu, sereta pengarap ari Petara, ti Apai kitai, sereta ari Tuan Jesus Kristus. 24 Ngarapka pemanah ati Petara ti besai bisi enggau semua orang ke meruan rinduka Tuan kitai, Jesus Kristus.