Isaiah
6 Ba taun Raja Usiah mati, aku meda Jehovah benung duduk ba kerusi diraja ti tinggi, lalu ujung baju jubah Iya ngemenuhka Rumah Sembiang. 2 Bala serapim bediri ngelingi Iya. Tiap iku sida bisi enam iti sayap; dua iti sayap kena nutup mua, dua iti sayap kena nutup kaki, lalu dua iti sayap da agi kena terebai.
3 Sida bejaku enggau pangan diri:
“Kudus, kudus, kudus meh Jehovah, ketuai soldadu serega!
Serata dunya penuh enggau mulia Iya.”
4 Penginggar nyawa sida ngasuh bingkai pintu Rumah nya begegar, lalu Rumah nya penuh laban asap.
5 Udah nya, aku madah: “Tulah meh aku!
Aku tentu deka mati,
Laban mulut aku enda tuchi,
Lalu aku diau enggau orang ke bisi mulut ti enda tuchi.
Mata aku empu udah meda Raja Jehovah, ketuai soldadu serega!”
6 Nya alai, siku serapim terebai ngagai aku. Iya mai bara api ke udah diambi iya ngena penyepit ari alta.* 7 Iya negu mulut aku ngena bara api nya lalu madah:
“Tu udah negu mulut nuan.
Penyalah nuan udah dibuai,
Lalu dosa nuan udah diampun.”
8 Udah nya, aku ninga Jehovah bejaku: “Sapa ke patut dianjung Aku? Lalu sapa ke deka mupuk ngarika kami?” Ku aku nyaut: “Aku! Anjung meh aku!”
9 Ku Iya madah: “Mansang ngagai orang ari bansa tu, lalu padahka:
‘Nuan deka ninga bekali-kali,
Tang nuan enda ulih faham;
Nuan deka meda bekali-kali,
Tang nuan nadai bulih penemu.’
10 Tutup ati sida,
Pampul pending sida,
Lalu tutup mata sida,
Ngambika mata sida enda ulih meda,
Lalu pending sida enda ulih ninga,
Ngambika ati sida enda ulih faham,
Lalu sida enda ulih nguingka diri ngagai Aku ngambika digeraika.”
11 Ku aku nanya: “O Jehovah, berapa lama utai tu deka nyadi?” Iya lalu nyaut:
“Nyentukka kuta runtuh lalu nadai orang nguan,
Nyentukka rumah nadai agi orang diau,
Nyentukka menua anchur sereta puang,
12 Nyentukka Aku, Jehovah, muai sida ngagai endur ti jauh,
Sereta nyentukka mayuh endur ba menua nya puang.
13 “Tang, semina satu persepuluh ari sida ke deka tinggal. Sida mega deka ditunu. Sida baka pun kayu ti besai enggau pun oak, ke udah ditebang lalu agi bisi tuga. Peturun ti kudus deka nyadi tuga sida.”