1 Samuel
19 Udah nya, Saul bejaku ngagai anak iya, Jonatan, enggau semua pegawai iya pasal pelan iya ke deka munuh David. 2 Ketegal anak Saul, Jonatan, amat rinduka David, Jonatan madah ngagai David: “Apai aku, Saul, deka munuh nuan. Bejimat meh nuan pagi pagila. Nuan patut mupuk ngagai endur ke enda ditemu orang lalu terus belalai ba dia. 3 Aku deka ngagai padang enggau apai aku lalu bediri semak enggau endur alai nuan belalai. Aku deka bejaku enggau apai aku pasal nuan. Enti bisi nama-nama utai ke ditemu aku, aku tentu deka madah ngagai nuan.”
4 Nyadi, Jonatan pan nyebut utai ti manah pasal David ngagai apai iya, Saul. Ku iya madah ngagai Saul: “Apai, anang bedosa ngagai ulun nuan David, laban iya nadai kala bedosa ngagai nuan lalu iya udah ngereja utai ti meri penguntung ngagai nuan. 5 Iya berambunka nyawa diri belaban enggau Goliat,* ngambika Jehovah ngasuh semua orang Israel menang besai.* Nuan empu ke meda nya lalu nuan mega gaga ati. Nyadi, nama kebuah nuan deka munuh David enggau nadai kebuah? Nama kebuah nuan deka bedosa ngagai orang ke nadai penyalah tu?” 6 Saul mendingka utai ku Jonatan lalu iya besumpah: “Aku besumpah atas nama Jehovah, Petara ti idup, enda aku munuh David.” 7 Udah nya, Jonatan ngangauka David lalu madah ngagai iya semua utai. Nyadi Jonatan pan mai David ngagai Saul, lalu David gawa baru ke Saul baka ke sebedau tu.
8 Enda lama udah nya, perang nyadi baru. David nyerang lalu munuh mayuh orang Pilistin, lalu sida ke bukai ngerarika diri ari iya.
9 Lebuh Saul benung duduk ba rumah iya, Jehovah nejuka runding Saul empu* ngasuh Saul merinsa. Maya nya, iya benung megai sangkuh, lalu David benung nebah belikan.* 10 Saul nguji ngentumka David ngagai dinding ngena sangkuh iya. Tang David ulih nyeliah, lalu sangkuh nya ngentum ke dinding. Malam nya, David lalu ngerarika diri. 11 Saul nganjung orang matau rumah David, lalu ngasuh orang nya munuh David maya pagi hari. Tang Mikal, bini David, madah ngagai David: “Enti nuan enda ngerarika diri malam tu, mati nuan pagila.” 12 Mikal lalu jampat-jampat nulung David nurun ari jenila ngambika David ulih ngerarika diri. 13 Mikal ngambi patung terafim* lalu ngengkahka nya ba atas katil. Iya lalu ngengkahka kain ke digaga ari bulu kambin ba endur pala David selalu gali, lalu iya mungkur patung nya ngena gari.
14 Lebuh Saul nganjung orang nangkap David, Mikal lalu madah: “Sakit iya.” 15 Nyadi, sekali agi Saul nganjung orang ngagai David. Ku iya: “Bai David enggau katil iya sekali ngambika aku ulih munuh iya.” 16 Lebuh orang ke dianjung Saul tama ngagai rumah David, sida meda patung terafim ba atas katil. Lalu ba endur pala David selalu gali, bisi kain ke digaga ari bulu kambin. 17 Saul nanya Mikal: “Nama kebuah nuan ngemulaka aku baka tu? Nama kebuah nuan nejuka munsuh aku ngerarika diri?” Ku Mikal nyaut Saul: “Iya madah ngagai aku: ‘Nuan aku bunuh enti nuan enda nejuka aku rari!’”
18 David lalu ngerarika diri ngagai Samuel ba Ramah. Iya madah ngagai Samuel semua utai ke udah digaga Saul ngagai iya. Udah nya, iya enggau Samuel mupuk lalu seduai iya diau ba Nayot. 19 Bisi orang madah ngagai Saul: “David bisi ba Nayot, ba Ramah.” 20 Saul lalu tekala nya nganjung orang ngambika nangkap David. Lebuh orang ke dianjung Saul meda bala nabi ke tuai benung benabi lalu Samuel bisi ba dia ngulu bala nabi nya, kuasa kudus Petara nurun ngagai orang ke dianjung Saul lalu sida pan nyau baka nabi.
21 Pengudah Saul ninga pasal nya, iya lalu tekala nya nganjung orang bukai, lalu sida mega nyadi baka nabi. Nya alai, Saul nganjung raban ti ketiga, lalu sida mega nyadi baka nabi. 22 Pengujung iya, Saul empu mupuk ngagai Ramah. Lebuh iya datai ba telaga ti besai ba Seku, iya nanya: “Ni Samuel enggau David?” Sida iya nyaut: “Seduai iya ba Nayot, ba Ramah.” 23 Lebuh Saul mansang ngagai Nayot ba Ramah, kuasa kudus Petara nurun ngagai iya, lalu ba sepemanjai jalai ulah iya nyau baka nabi sampai datai ba Nayot, ba Ramah. 24 Iya mega muka gari iya, lalu ulah iya baka nabi ba depan Samuel. Sepemanjai hari enggau sepemanjai malam iya gali ba dia telanjai.* Nya kebuah orang nyebut jaku tu: “Kati Saul mega nabi?”