Pilipi
2 Laban kita ke nyadi murid Kristus, meransang pangan diri, ngelantangka ati pangan diri ketegal pengerindu, ibuhka pangan diri, sayauka pangan diri, sereta siruka pangan diri, 2 kita ngasuh aku balat gaga. Awakka kita sepenemu, sama runding, rinduka pangan diri, sereta beserakup. 3 Anang belaya sereta anang ngenyumbungka diri. Tang enggau ati ti baruh, ngumbai orang bukai manah agi ari kita. 4 Anang semina berundingka diri empu aja, tang berunding mega ke orang bukai.
5 Awakka kita ngembuan runding enggau ulah baka Jesus Kristus. 6 Taja pan iya baka Petara, tang iya enda kala berunding deka ngerebut penuduk Petara ngambika iya nyadi sebaka enggau Petara. 7 Iya enda ngereja nya, tang iya ngelengkaka semua utai ke dikemisi iya, lalu nyadi baka siku ulun. Iya nyadi mensia. 8 Ukai nya aja, lebuh iya nyadi mensia, iya ngemaruhka diri lalu ngasi nyentukka iya mati. Au, nyentukka iya mati ba tiang perinsa.* 9 Nya kebuah Petara ngangkatka iya ngagai penuduk ti jauh tinggi agi, lalu enggau manah ati, meri iya nama ti ari atas semua nama. 10 Nya alai, semua ke ba serega, ke ba dunya, enggau ke ba dalam tanah,* patut bebasaka nama Jesus. 11 Semua orang patut ngaku Jesus Kristus nya Tuan, ba mua orang mayuh. Enggau nya, Petara ti Apai kitai dimuliaka.
12 Nya alai, bala menyadi ke dikerinduka aku, kita seruran ngasi ukai aja maya aku bisi enggau kita, tang kelebih agi diatu, lebuh aku nadai enggau kita. Nyadi aku meransang kita, terus ngereja nya enggau ati ti nangi sereta enggau basa, ngambika kita ulih diselamatka. 13 Petara Empu ke ngeringka kita ngambika kita ulih ngagaka ati Iya, lalu Iya mega meri kita pengingin enggau pengering kena ngereja nya. 14 Anang mutap tauka bekelikuh lebuh ngereja semua utai, 15 ngambika kita tuchi sereta nadai bepenyalah, lalu nyadi anak Petara ti nadai penimpang, lebuh diau begulai enggau orang ke jai ba rebak tu, ke enda ngereja utai ti ngena. Pia mega, ngambika kita manchar baka penampak ba dunya tu, 16 sereta bepegai rat ba jaku ke meri pengidup. Enggau nya, aku deka bisi kebuah gaga ati lebuh hari Kristus datai, laban nemu diri enda lebu ngapa belanda tauka bebendar gawa. 17 Taja pan aku dituang baka pemeri wain ba atas pemeri kita, sereta ba pengawa kita ti tuchi ke Petara ketegal pengarap kita, tang aku gaga ati enggau semua kita. 18 Pia mega, kita patut gaga ati enggau aku.
19 Enti sejalai enggau peneka Tuan Jesus Kristus, aku ngarapka diri ulih nganjung Timoti ngagai kita enda lama da agi, ngambika aku ulih diperansang lebuh ninga berita pasal kita. 20 Nadai orang bukai ke baka iya, ke amat ibuhka semua kita. 21 Semua sida ke bukai nya semina ngenuluka diri empu aja, ukai ngenuluka peneka Jesus Kristus. 22 Tang kita nemu, Timoti udah nunjukka diri bebendar gawa ke Berita Manah begulai enggau aku, baka siku anak enggau apai iya. 23 Nya alai, aku ngarapka diri ulih nganjung iya ngagai kita, sepengudah aku nemu utai ke deka nyadi ba aku. 24 Kebendar iya, aku pechaya, Tuan deka ngemendarka aku datai ngagai kita enggau lengkas.
25 Tang diatu, aku ngasaika diri patut nganjung Epafroditus ngagai kita. Iya menyadi aku, ke sama gawa enggau aku, sereta mega nyadi soldadu Kristus enggau aku. Kita udah nganjung iya ngagai aku, ngambika ngintu utai ke diguna aku. 26 Iya lelengauka semua kita, lalu iya balat tusah ati laban semua kita udah ninga pasal iya ke sakit. 27 Iya raya amat sakit nyentukka iya nyauka mati. Tang Petara kasihka iya, lalu Petara mega kasihka aku, ngambika aku enda majak tusah ati. 28 Nya alai, aku nganjung iya ngagai kita enggau naka pengelengkas, ngambika kita gaga ati lebuh betemu enggau iya, lalu ati aku pan lantang agi. 29 Sambut meh iya enggau gaga ati, baka kita ke nyambut murid Tuan ke bukai ngelama tu. Ayanka meh basa kita ngagai orang ke baka iya, 30 laban iya nyauka mati lebuh ngereja pengawa ke Kristus. Maya kita enda ulih nulung aku ba ditu, iya sanggup lenyau nyawa ketegal aku.