Rome
1 Aku tu Paul, ulun Jesus Kristus, ke ngirumka surat tu. Aku dikangau nyadi rasul sereta dipilih ngambika nusui Berita Manah ari Petara. 2 Berita Manah tu udah disemaya Petara dalam Bup Kudus nengah bala nabi Iya kelia menya. 3 Berita Manah tu pasal Anak Iya, ke diadaka ari peturun David. 4 Kebendar nya, iya Anak Petara, laban Petara udah ngena kuasa kudus* ngidupka iya baru ari mati. Au, iya meh Tuan kitai, Jesus Kristus. 5 Nengah iya, Petara mandangka pemanah ati ti besai ngagai kitai. Jesus milih aku nyadi rasul kena nulung orang ari semua bansa, ngambika sida arap, ngasi, sereta bebasaka nama iya. 6 Kita mega entara sida ari bansa bukai ke udah dikangau ngambika nitihka Jesus Kristus. 7 Surat tu dituju ngagai nembiak ti kudus ba Rome ke dikerinduka Petara:
Ngarapka kita bulih pengelantang sereta pemanah ati ti besai ari Petara ti Apai kitai, sereta ari Tuan Jesus Kristus.
8 Keterubah, aku beterima kasih ngagai Petara aku, nengah Jesus Kristus, pasal semua kita, laban mayuh orang ba serata dunya benung bejaku pasal pengarap ke diayanka kita. 9 Aku nyembah Petara enggau pengabis ati aku, lebuh aku ngerembaika Berita Manah pasal Anak Iya, lalu Iya nemu, aku enda ngetu nyebut pasal kita dalam sampi aku. 10 Aku besampi ngambika bisi peluang betemu enggau kita enti nya peneka Petara. 11 Aku keran amat deka betemu enggau kita, ngambika aku ulih meri kita berekat ari Petara kena negapka pengarap kita. 12 Reti ku aku nya, ngambika semua kitai bela diperansang ari pengarap ke diayanka pangan diri.
13 Bala menyadi, aku deka kita nemu, aku suah amat bisi ati deka datai ngagai kita, tang enda ulih. Aku deka meda asil manah ke diulih ari pengawa nginjil kitai ba dia, baka asil ke udah diulih aku ba bansa bukai. 14 Bisi utai ke mesti digaga aku ngagai semua orang, sekalika ngagai orang Gerika tauka orang asing, ngagai orang ke pintar tauka orang ke enda bepelajar. 15 Nya alai, aku keran deka nusui Berita Manah ngagai kita ba Rome. 16 Aku enda malu ke Berita Manah, laban nya kuasa Petara kena nyelamatka tiap iku orang ke arap. Keterubah, orang Judah, udah nya, orang Gerika. 17 Pengelurus Petara benung diayanka ngagai sida ke arap, lalu tu negapka pengarap sida. Nya sejalai enggau ayat Bup Kudus ke madahka: “Orang ke lurus deka idup ketegal iya arap.”
18 Petara mandangka pengeringat Iya ari serega kena ngelaban semua pengawa ti jai sereta enda lurus, ke digaga mensia. Sida nagang pemendar ari ditemu orang. 19 Petara udah meri sida bukti ti chukup terang. Nya alai, sida patut nemu pasal Iya. 20 Enti kitai beratika chara dunya udah digaga, kitai ulih meretika pemanah Petara ti enda ulih dipeda. Lebuh kitai mansik utai ke udah digaga Iya, kitai ulih nemu sapa Iya. Semua tu mandangka kuasa Iya ti meruan, lalu nunjukka Iya endang Petara. Nya alai, sida nadai kebuah enda arapka Petara. 21 Taja pan sida ngelala Petara, sida enda ngemuliaka Iya ke nyadi Petara sida, lalu sida enda beterima kasih ngagai Iya. Pia mega runding sida nyau nadai guna, lalu ati sida ke enda ulih ngasaika utai, dibalut pemetang. 22 Taja pan sida ngumbai diri pintar, tang kebendar nya, sida beli. 23 Ari ke ngemuliaka Petara ke enda nemu mati, sida ngemuliaka engkeramba ke baka gamal mensia ke nemu mati. Pia mega, sida ngemuliaka engkeramba ke baka gamal burung, jelu ke bekaki empat, sereta jelu ke ngerayap.
24 Nya alai, Petara nejuka sida ngereja utai nitihka pengingin ati sida ti kamah. Enggau nya, sida ngereja utai ti ngemaluka ngena tubuh sida. 25 Sida nyilih pemendar pasal Petara enggau pemula. Sida nyembah sereta bejalaika pengawa ti tuchi ngagai utai ke digaga Petara, ari ke nyembah Iya ke ngaga semua utai, ke endang patut diberi puji belama iya. Amin. 26 Nya alai, Petara nejuka sida nurutka pengingin seks ke enda ditagang. Bala sida ke indu ngereja utai ti enda menuku, ke enda sejalai enggau chara sida digaga Petara. 27 Pia mega, bala sida ke lelaki nadai agi ati ngagai sida ke indu, tang sida bisi pengingin seks ti balat ngagai orang ke lelaki. Sida ngereja utai ti enda menuku enggau pangan diri. Tang sida deka diukum enggau pengabis iya ketegal penyalah ke dikereja sida.
28 Laban sida ngumbai diri enda ibuh nemu pasal Petara, nya alai Iya nejuka sida majak berundingka utai ti jai, lalu ngereja utai ke enda patut dikereja sida. 29 Sida penuh laban semua macham pengawa ti enda lurus, penyai, pengamu, sereta pengawa ti salah. Sida balat kepapas, penuh laban pengingin ti deka munuh orang, udu belaya, bula, sereta ngemediska orang. Sida udu bejakuka orang, 30 bejaika orang, begedika Petara, enda bebasaka orang, sumbung, temegahka diri, sereta berunding deka ngereja utai ti jai. Sida enda ngasika apai indai, 31 enda meretika utai, bulaka semaya, jai ati, sereta enda nemu kasihka orang. 32 Sida endang nemu Petara madahka, orang ke ngereja semua utai nya sigi patut mati. Taja pia, sida ukai semina majak ngereja utai ke bansa nya, tang sida mega setuju lebuh orang bukai majak ngereja utai nya.