Jaku-Dalam
18 Orang ke ngenyauhka diri ari orang bukai ngenuluka pengingin diri empu;
Iya nulak* semua penemu-dalam.
2 Orang ke beli enda rindu meretika nama-nama utai;
Iya semina deka mantaika utai ke ba dalam ati iya.
3 Lebuh orang ke jai datai, pemenchi mega deka datai,
Lalu enti bisi pengawa ti ngemaluka, basa deka lenyau.
4 Jaku sesiku orang baka ai ba telaga ti dalam;
Pun penemu-dalam baka sungai ti mengalir.
5 Enda manah bepilih mata lalu nyukung orang ke jai
Tauka nagang orang ke lurus nerima atur ti adil.
6 Jaku orang ke beli ngasuh laya nyadi,
Lalu mulut iya ngasuh orang deka malu iya.
7 Mulut orang ke beli ngasuh diri empu anchur,
Lalu mulut iya manjuk pengidup iya empu.
8 Jaku fitnah baka pemakai ti nyamai,*
Lalu ditelan terus ke dalam perut.
9 Orang ke buruk gawa nya
Menyadi orang ke rindu ngerusak utai.
10 Nama Jehovah nya menara ti tegap.
Kia meh orang ke lurus belanda lalu deka dijaga.*
11 Ba orang ke kaya, pengaya iya baka kuta ti bekubu;
Iya ngumbai* pengaya iya baka dinding ke nyaga iya.
12 Penyumbung ngasuh labuh,
Tang pemaruh ati mai mulia.
13 Orang ke nyaut sebedau ninga penerang ti betul
Ngemaluka diri empu sereta beli.
14 Ati ti kering ngasuh orang tan maya sakit,
Tang sapa ke ulih tan maya lemi semengat?*
15 Ati orang ke ulih meretika utai ngulihka penemu,
Lalu pending orang ke bepenemu-dalam begigaka penemu.
16 Hadiah muka peluang ngagai sesiku orang;
Ngena hadiah nya iya deka senang betemu enggau orang ke tinggi pangkat.
17 Orang ti keterubah madahka sesiti kes endang baka ke seruran betul,
Seagi-agi piak ke siti da agi bedau datai meresa pekara nya.
18 Bechabutka undi ulih ngetuka laya,
Lalu ulih mutarka laya entara dua iku orang ke bekuasa.
19 Ngenyelapka ati menyadi ke pedis ati tusah agi ari ngalahka kuta ti bedinding;
Sekeda laya nyeraraka orang baka pintu kuta ti bepalang.
20 Utai ke disebut orang baka pemakai ke ngenyangka perut orang nya;
Iya deka ngasaika asil ari utai ke disebut iya.
21 Dilah ulih mai pemati tauka pengidup;
Orang ke rindu ngena dilah deka ngasaika kesan ari utai ke disebut iya.
22 Orang ke bulih bini ti manah udah bulih reta ti berega,
Lalu iya dikerinduka Jehovah.
23 Orang ke miskin minta utai enggau penuh basa,
Tang orang ke kaya nyaut enggau kasar.
24 Bisi kaban sedia deka nganchurka kaban diri empu,
Tang bisi kaban ke lebih rapat agi ari menyadi kandung.