Isaiah
46 Petara Bel besugang, petara Nebo meremi.
Patung seduai iya dipanggaika ba atas jelu, ba atas jelu ke ngangkut barang,
Baka barang ke nating jelu ke lelak.
2 Patung nya sama besugang enggau meremi;
Patung nya enda ulih nyelamatka utai* ke dibai,
Indah patung nya empu pan ditaban.
3 “Dingaka meh Aku, O peturun Jakop, enggau semua orang Israel ke selamat,
Kita meh ke diberap Aku kenyau ari ada, lalu kita meh ke dijaga Aku kenyau ari dalam kandung.
4 Aku agi tetap sama nyentukka kita tuai;
Aku deka seruran nyukung kita, nyentukka buk kita buban.
Baka ke udah digaga Aku, Aku deka nanggung kita, nyukung kita, sereta nyelamatka kita.
5 Sapa ke disemaka kita enggau Aku? Sapa ke baka Aku?
Sapa ke dibandingka kita enggau Aku, nyentukka kami sebaka enggau pangan diri?
6 Bisi orang mansutka mayuh emas ari kambut sida;
Sida nimbang pirak ngena dachin.
Sida ngupah tukang besi lalu ngasuh iya ngaga petara.
Udah nya, sida besugang lalu nyembah petara nya.
7 Sida ngesan petara nya;
Sida mai petara nya lalu ngengkahka iya ba endur iya, lalu iya semina bediri ba dia.
Iya enda mindah ari endur nya.
Taja pan orang besebana ngagai iya, iya enda nyaut;
Iya enda ulih nyelamatka orang ari penusah.
8 Kingatka tu, lalu kita mesti berani.
O kita ke ngereja penyalah, simpan meh tu dalam ati kita.
9 Kingatka pasal utai ke nyadi kelia menya,
Laban Aku meh Petara, nadai Petara bukai.
Aku meh Petara, lalu nadai ke baka Aku.
10 Kenyau ari pun, Aku udah madahka utai ke deka nyadi.
Kenyau ari kelia menya, Aku udah madahka utai ke bedau nyadi.
Aku madahka: ‘Pemutus* Aku tentu deka mujur,
Lalu Aku deka ngereja nama-nama utai ke dikedekaka Aku.’
11 Aku ngangauka siku burung menaul ari timur,
Siku lelaki ari menua ti jauh deka ngereja utai nitihka pemutus* Aku.
Aku udah bejaku lalu Aku deka ngereja nya.
Aku udah netapka tuju Aku, lalu Aku mega deka ngamatka nya.
12 O kita ke degil, kita ke jauh limpang ari jalai ti betul,
Pendingka meh Aku.
13 Aku udah mai pengelurus Aku,
Lalu iya enda jauh.
Pengelepas ari Aku sigi enda betangguh.
Aku deka mai pengelepas ba Sion, lalu meri mulia Aku ngagai Israel.”