Pemungkal
2 Nya alai, langit enggau dunya sereta semua utai ke ba dia tembu magang digaga Petara. 2 Ba hari ketujuh, Petara tembu ngereja semua pengawa Iya. Lalu Iya pan berehat ari pengawa Iya ke ngaga semua utai. 3 Udah nya, Petara merekatka hari ketujuh lalu ngumbai hari nya kudus. Tu ketegal ba hari nya, Petara berehat pengudah Iya ngaga semua utai ke dikedekaka Iya.
4 Baka nya meh langit enggau dunya digaga. Nya meh utai ke nyadi maya Petara Jehovah* ngaga langit enggau dunya.
5 Maya nya, dunya bedau bisi babas enggau utai tumbuh, laban Petara Jehovah bedau ngasuh ujan nurun lalu bedau bisi mensia ke gawa ba tanah maya nya. 6 Taja pia, bisi ambun pansut ari tanah lalu masahka tanah.
7 Petara Jehovah ngambi debu tanah lalu ngaga siku lelaki. Iya lalu ngesuhka seput pengidup ngagai lubang idung lelaki nya. Lelaki nya pan nyadi mensia* ti idup. 8 Udah nya, Petara Jehovah ngaga siti taman ba timur Eden, lalu Iya ngengkahka lelaki nya ba dia. 9 Petara Jehovah ngasuh mayuh macham pun kayu tumbuh ba dia. Semua pun kayu nya manah dipeda sereta manah ke pemakai. Ba tengah-tengah taman nya mega bisi pun kayu pengidup enggau pun kayu penemu pasal utai ti manah enggau utai ti jai.
10 Ari Eden, bisi siti sungai ke mai ai ngagai taman nya. Lalu ngilah taman nya, sungai nya bebagi nyadi empat. 11 Nama sungai ti keterubah, iya nya Sungai Pison. Sungai nya ngelingi menua Habilah ke bisi emas. 12 Kualiti emas ba endur nya amat manah. Ba dia mega bisi getah ti bebau rengut enggau batu oniks. 13 Nama sungai ti kedua, iya nya Sungai Gihon. Lalu sungai tu ngelingi menua Kus. 14 Nama sungai ti ketiga, iya nya Sungai Hidekel.* Sungai nya tunga ke timur menua Asiria. Sungai ti keempat, iya nya Sungai Eupratis.
15 Petara Jehovah ngengkahka lelaki nya ba taman Eden ngambika iya gawa ba dia lalu nyaga taman nya. 16 Petara Jehovah mega bepesan ngagai lelaki nya: “Nuan tau makai buah ari semua pun kayu ba taman tu sampai nuan berasai puas.* 17 Tang nuan enda tau makai buah ari pun kayu penemu pasal utai ti manah enggau utai ti jai, laban ba hari nuan makai buah nya, nuan deka mati.”
18 Udah nya Petara Jehovah bejaku: “Enda manah lelaki nya diau kediri aja. Aku deka meri siku kaling ke ngam nyadika penulung iya.” 19 Petara Jehovah udah ngaga jelu liar enggau utai idup ti besayap ari tanah. Udah nya, Petara mai sida ngagai lelaki nya lalu ngasuh iya meri nama ke tiap iku sida. Baka nya meh tiap iku jelu nya bulih nama, nitihka nama ke disebut lelaki nya. 20 Nya alai, lelaki nya pan meri nama ngagai semua macham jelu tupi, utai idup ti besayap, enggau jelu liar. Tang, lelaki nya nadai kaling ti ngam ke ulih nulung iya. 21 Petara Jehovah lalu ngasuh lelaki nya tinduk enggau jenak. Maya iya tinduk, Petara ngambi siti ari tulang rusuk iya lalu nampal baru begian nya ngena isi. 22 Petara Jehovah ngaga siku indu ari tulang rusuk nya, lalu mai iya ngagai lelaki nya.
23 Lelaki nya bejaku:
“Tu meh iya ke saum tulang
Enggau saum isi enggau aku.
Iya deka dikumbai Indu,
Laban iya udah diambi ari lelaki.”
24 Nya kebuah lelaki deka ninggalka apai indai iya. Iya deka terus begulai enggau bini iya, lalu seduai iya deka nyadi siti tubuh. 25 Lelaki nya enggau bini iya sama bela telanjai, tang seduai iya enda malu.