Isaiah
63 Sapa ke datai ari Edom,
Ke datai ari Bosrah ngena gari ti terang,*
Sereta ngena gari ti bemulia,
Ke mansang enggau kuasa ti besai?
“Aku meh nya ke bejaku dalam pengelurus,
Ke bisi kuasa ti besai kena meri pengelepas.”
2 Nama kebuah gari Nuan mirah,
Baka gari orang ke ngindik anggur ba endur alai nganchurka anggur?
3 “Aku udah ngindik anggur kediri-diri.
Nadai siku pan orang bisi enggau Aku.
Aku majak ngindik bala munsuh Aku ngena pemedis ati Aku,
Lalu Aku enda ngetu-ngetu ngindik sida ngena pengeringat Aku.
Darah sida mechik gari Aku,
Lalu gari Aku nyau kamah magang.
4 Hari Aku malas munsuh Aku udah ditetapka Aku.
Taun bala nembiak Aku ditebus udah datai.
5 Aku malik tang nadai orang deka nulung;
Aku tekenyit laban nadai orang meri bantu.
Nya alai, ngena lengan Aku, Aku ulih menang,*
Lalu pengeringat Aku nyukung Aku.
6 Aku ngindik mayuh bansa ngena pengeringat Aku.
Aku ngasuh sida mabuk laban pemedis ati Aku,
Lalu Aku nuangka darah sida ke tanah.”
7 Ketegal semua utai ke udah digaga Jehovah ke kitai,
Aku deka madah pasal pengawa Jehovah ti mandangka pengerindu Iya ti setia,
Sereta madah pasal pengawa Iya ti patut dipuji.
Ketegal pengasih Jehovah sereta ketegal pemesai pengerindu Iya ti setia,
Iya udah ngereja mayuh utai ti manah ke orang Israel.
8 Ku Iya madahka: “Sida meh bala nembiak Aku, iya nya bala anak Aku ke tentu enda ninggalka Aku.”
Nya alai, Iya nyadi Penyelamat sida.
9 Lebuh sida tusah, Iya berasai tusah ati.
Melikat ke bisi ba depan Iya* nyelamatka sida.
Ketegal pengerindu enggau pengasih Iya, Iya nebus sida.
Iya seruran nyaga sida sereta ngangkatka sida.
10 Tang sida ngelaban Iya lalu ngasuh kuasa kudus Iya tusah ati.
Nya alai, Iya nyadi munsuh sida,
Lalu Iya ngelaban sida.
11 Udah nya, sida ngenang baru utai ke nyadi suba,
Iya nya maya jeman nembiak Iya, Moses. Ku sida:
“Ni Petara ke mai bala nembiak Iya enggau bala pengibun bedus Iya pansut ari tasik?
Ni Petara ke meri kuasa kudus ngagai iya?
12 Ni Petara ke nyukung jari kanan Moses ngena lengan Iya ti bemulia?
Ni Petara ke melah tasik ba depan sida,
Ngambika nama Iya meruan dikingatka belama iya?
13 Ni Petara ke ngasuh sida bejalai nengah ai ti begelumbang,*
Ngambika sida enda labuh lebuh bejalai,
Baka kuda ke bejalai ba padang ti luas?*
14 Kuasa kudus Jehovah ngiring sida ngambika ulih berehat,
Baka jelu tupi ke dibai nurun ngagai lebak ngambika berehat.”
Baka nya meh Nuan ngiring nembiak Nuan,
Ngambika nama Nuan dimuliaka.
15 Malik meh ke baruh ari serega,
Ari endur Nuan diau ti tinggi, kudus, sereta bemulia, lalu peda meh.
Ni pengeransing enggau pengering Nuan?
Ni penyiru enggau pengasih Nuan?
Nuan ngenanka semua nya ari aku.
16 Nuan meh Apai kami;
Taja pan Abraham enda nemu sapa kami
Lalu Israel enda ngelala kami,
Tang Nuan, Jehovah, Nuan meh Apai kami.
Nuan meh Penebus kami kenyau ari kelia menya.
17 O Jehovah, nama kebuah Nuan nejuka kami limpang ari jalai Nuan?
Nama kebuah Nuan nejuka ati kami degil, nyentukka kami enda nangika Nuan?
Pulai meh ketegal bala nembiak Nuan,
Iya nya raban bansa ke enggi Nuan.
18 Bala nembiak Nuan ti kudus ngempu menua nya enda lama aja.
Bala munsuh kami udah ngindik endur Nuan ti kudus.
19 Ba timpuh ti lama kami nyau nyadi baka orang ke nadai kala diperintah Nuan,
Sereta baka orang ke nadai kala dikangau ngena nama Nuan.