Pemansut

3 Moses nyadi pengibun bedus entua iya, Jetro. Jetro nya imam orang Midian. Iya nguluka raban bedus ngagai sepiak barat menua puang lalu datai ba Horeb, iya nya gunung Petara ti bendar. 2 Udah nya, melikat Jehovah ngayanka diri ngagai iya ba dalam api ti benung mau ba pun kayu ti mit ke beduri. Moses beratika pun kayu nya mau laban api. Tang pun kayu nya enda angus. 3 Moses lalu madahka: “Nyelai amat. Nama kebuah pun kayu nya enda angus? Aku ka kia meda semak agi.” 4 Lebuh Jehovah meda Moses datai semak ngagai pun kayu nya, Iya lalu ngangauka Moses ari pun kayu nya. Ku Iya madahka: “Moses! Moses!” Moses lalu nyaut: “Tu aku.” 5 Ku Petara bejaku udah nya: “Anang datai semak. Buka selipar nuan, laban nuan bediri ba tanah ti kudus.”

6 Petara lalu madahka: “Aku tu Petara aki ini nuan,* Petara Abraham, Isak, enggau Jakop.” Udah nya, Moses lalu nutup mua iya, laban iya takut meda Petara ti bendar. 7 Ku Jehovah nampung: “Aku endang udah meda baka ni nembiak Aku diperinsa ba Ejip, lalu Aku udah ninga sebana sida ketegal orang maksa sida gawa nyadi ulun. Aku amat nemu pemedis ke ditapi sida. 8 Aku deka nurun lalu nyelamatka sida ari jari orang Ejip. Aku deka mai sida pansut ari menua nya, lalu mai sida ngagai menua ti besai ke bisi tanah ti subur, menua ke kaya enggau ai tusu sereta madu, iya nya menua orang Kanaan, orang Het, orang Amor, orang Peris, orang Ibi, enggau menua orang Jebus. 9 Aku udah ninga sebana orang Israel. Aku mega udah meda baka ni orang Ejip udah merinsaka sida enggau chara ti amat jai. 10 Diatu, Aku deka nganjung nuan ngagai Firaun, lalu nuan deka mai nembiak Aku, orang Israel, pansut ari menua Ejip.”

11 Tang ku Moses bejaku ngagai Petara ti bendar: “Sapa meh aku tu? Aku enda layak betemu enggau Firaun, lalu mai orang Israel pansut ari menua Ejip.” 12 Ku Petara nyaut: “Aku deka enggau nuan. Tu meh bukti ke nunjukka Aku meh ke udah nganjung nuan: Pengudah nuan mai orang Israel pansut ari menua Ejip, semua kita deka nyembah Aku, Petara ti bendar, ba gunung tu.”

13 Tang Moses madah ngagai Petara ti bendar: “Enti aku betemu enggau orang Israel lalu madah ngagai sida: ‘Petara aki ini kita udah nganjung aku ngagai kita,’ lalu sida nanya aku: ‘Sapa nama Iya?’ Nama utai ke patut dipadah aku ngagai sida deh?” 14 Ku Petara nyaut Moses: “Aku Deka Nyadi Nama-Nama ke Dikinginka Aku.”* Lalu ku Iya nampung agi: “Tu meh utai ke patut dipadahka nuan ngagai orang Israel: ‘Iya ke ngembuan nama ke mai reti “Aku Deka Nyadi Nama-Nama ke Dikinginka Aku,” udah nganjung aku ngagai kita.’” 15 Udah nya, Petara bejaku baru ngagai Moses:

“Tu meh utai ke patut dipadahka nuan ngagai orang Israel: ‘Jehovah, Petara aki ini kita, Petara Abraham, Isak, enggau Jakop, udah nganjung aku ngagai kita.’ Tu meh nama Aku nyentukka belama iya, lalu tu meh nama ke patut dikingatka ari generasi ke generasi.* 16 Nya alai, mupuk meh nuan lalu gempuruka bala tuai orang Israel. Padah ngagai sida: ‘Petara aki ini kita, Jehovah, Petara Abraham, Isak, enggau Jakop, udah ngayanka Diri ngagai aku. Ku Iya madahka: “Aku udah beratika kita, lalu Aku udah meda utai ke digaga orang Ejip ngagai kita. 17 Nyadi, Aku besemaya deka ngelepaska kita ari orang Ejip ke merinsaka kita, lalu mai kita ngagai menua orang Kanaan, orang Het, orang Amor, orang Peris, orang Ibi, enggau menua orang Jebus. Aku deka mai kita ngagai menua ke kaya enggau ai tusu sereta madu.”’

18 “Sida tentu deka mendingka nuan. Nyadi nuan enggau bala tuai orang Israel patut betemu enggau raja Ejip. Tu meh utai ke patut dipadahka kita ngagai iya: ‘Jehovah, Petara orang Hebrew, udah bejaku enggau kami. Nya alai, awakka kami bejalai tiga hari ngagai menua puang, ngambika kami ulih nyerahka pemeri ngagai Petara kami, Jehovah.’ 19 Tang, Aku nemu raja Ejip sigi enda ngemendarka kita mupuk enti iya enda dipaksa. 20 Nya alai, Aku deka ngangkatka jari Aku, lalu ngukum Ejip ngena semua pengawa Aku ti luar biasa. Udah nya, baru iya deka ngelepaska kita. 21 Aku deka ngasuh orang Ejip ngayanka pemanah ati ngagai kita. Nyadi, lebuh kita mupuk, kita enda mupuk puang nadai mai utai. 22 Tiap iku indu mesti minta utai ke digaga ari pirak, utai ke digaga ari emas, sereta minta gari ari jiran sida enggau ari indu orang Ejip ke diau ba rumah sida iya. Kita deka ngerasukka utai nya ba anak lelaki enggau anak indu kita. Kita deka ngerampas reta orang Ejip.”