Isaiah
30 Ku Jehovah bejaku: “Tulah meh bala anak ke degil!
Ke ngaga pelan ke ukai enggi Aku,
Ke ngaga sempekat* ti enda nitihka iring kuasa kudus Aku.
Nya alai, dosa sida majak nambah.
2 Sida nadai minta iring ari Aku, tang sida mansang ngagai Ejip,
Laban deka belindung ba Firaun*
Sereta beteduh ba baruh ayuk Ejip.
3 Tang sida deka berasai malu ketegal belindung ba Firaun;
Sida deka dikeleseka ketegal beteduh ba baruh ayuk Ejip!
4 Bala tuai bisi ba Zoan,
Lalu bala pengari udah datai ba Hanes.
5 Sida deka dikemaluka orang bansa Ejip,
Ke nadai meri nama-nama penguntung ngagai sida
Sereta ke nadai meri sukung tauka tulung.
Orang Ejip semina ngasuh orang berasai malu sereta dikelese.”
6 Tu pemutus pechara pasal jelu ke ba selatan:
Nengah menua ke penuh enggau pemerinsa sereta penusah,
Ke bisi singa ti negung,
Ke bisi ular ti bisa enggau ular ti berachun ke nemu terebai,
Sida mansang mai reta enggau pemeri,
Ke diengkahka sida ba belakang unta enggau keledai.
Tang semua nya nadai mai penguntung ngagai orang,
7 Laban tulung ari Ejip sigi nadai guna.
Nya alai, Aku ngangauka iya “Rahap* ke duduk jenuh.”
8 “Alai, tuliska nya ba lampang batu* ba depan sida,
Lalu tuliska nya ba dalam bup,
Ngambika dudi hari ila,
Nya seruran deka dikena nyadika saksi.
9 Laban sida orang ke rindu ngelaban, bala anak ke rindu nipu.
Sida enggai mendingka adat* Jehovah.
10 Sida madah ngagai orang ke ulih meda utai ke dipandangka:* ‘Badu agi meda.’
Lalu sida madah ngagai bala nabi: ‘Anang nyebut jaku benabi ti amat ngagai kami.
Padahka utai ke ngerinduka ati kami aja, cheritaka jaku benabi ti pelesu.
11 Tinggalka jalai ti betul nya, limpangka diri ari jalai nya.
Anang agi bejaku pasal Petara Israel ti Kudus ngagai kami.’”
12 Nya alai, tu meh utai ke dipadahka Petara Israel ti Kudus:
“Ketegal kita enggai nerima jaku Aku
Lalu kita arapka pemula enggau jaku tipu
Lalu kita bepanggai ba semua nya,
13 Penyalah kita deka nyadi baka dinding ke merekah,
Baka dinding ti tinggi ke majak merekah lalu deka runtuh.
Nya deka runtuh enggau ngenyit, ba maya ke enda dijangka.
14 Dinding nya deka anchur baka sarang ti besai ke digaga ari tanah liat,
Ke deka anchur abis nyentukka nadai siti pan kerimpak ke ulih dikena
Ngambi arang ari api
Tauka kena ngauk ai.”
15 Tu meh utai ke dipadahka Jehovah, Tuan ti Pemadu Tinggi, Petara Israel ti Kudus:
“Pulai meh ngagai Aku lalu anti meh Aku, ngambika kita diselamatka.
Enti kita tenang lalu nunjukka diri arap, kita deka bulih pengering.”
Tang kita enggai!
16 Kita madah: “Enda, kami deka rari nepan kuda!”
Nyadi, rari meh kita.
Kita mega madahka: “Kami deka nepan kuda ti laju!”
Enti pia, orang ke begagaika kita mega laju.
17 Jaku emba ari siku orang deka ngasuh seribu iku orang getar-getar takut,
Lalu jaku emba ari lima iku orang deka ngasuh kita rari,
Nyentukka mimit aja kita ke agi tinggal baka siti tiang ke ba atas gunung,
Baka siti tiang kena meri tanda ke ba atas bukit.
18 Tang, Jehovah sabar* nganti maya Iya deka ngayanka pemanah ati ngagai kita.
Iya deka angkat lalu ngayanka pengasih ngagai kita,
Laban Jehovah nya Petara ti adil.
Gaga ati meh semua orang ke enda ngetu nganti* Iya.
19 Maya orang diau ba Sion, ba Jerusalem, kita tentu enda nyabak agi. Iya tentu deka ngayanka pemanah ati ngagai kita lebuh Iya ninga sabak kita ke minta tulung. Maya Iya ninga sabak kita, Iya deka terus nyaut kita. 20 Jehovah, Pengajar ti Bemulia, enda agi belalai, taja pan Iya meri kita penusah nyadika pemakai enggau pemerinsa nyadika ai irup. Kita empu deka meda Pengajar kita ti Bemulia. 21 Enti kita limpang ke kiba tauka ke kanan, kita empu deka ninga nyawa bejaku ari belakang kita: “Tu meh jalai iya. Titihka jalai tu!”
22 Kita deka ngamahka patung kita ke dilapis ngena emas tauka pirak. Kita deka muai nya baka muai kain ti kamah,* lalu madah: “Kamah amat!” 23 Petara deka meri ujan ke benih ke ditanam nuan, lalu tanah deka ngasilka mayuh pemakai ti manah ke pengerai. Ba hari nya, jelu tupi nuan deka makai rumput ba padang ti besai. 24 Sapi enggau keledai ke diasuh ngeradu tanah deka makai pemakai ti manah ke udah dichampur sereta ke udah diseraraka ari ampa.* 25 Ba tiap iti gunung enggau bukit ti tinggi deka bisi sungai. Nya meh utai ke deka nyadi ba hari nya lebuh mayuh amat orang dibunuh maya menara runtuh. 26 Panchar bulan purnama deka nyadi baka panchar mata panas. Panchar mata panas deka tujuh kali terang agi ari biasa, baka penerang tujuh hari dipegulaika. Semua nya deka nyadi maya Jehovah malut bakal bala nembiak Iya sereta ngeraika sida ke balat telih ketegal Iya.
27 Peda! Jehovah* datai ari endur ti jauh,
Pengeringat Iya mau baka api lalu Iya dikelingi mua hari ti chelum.
Mulut Iya penuh laban pengeringat,
Lalu dilah Iya baka api ti mau.
28 Kesuh seput Iya baka ai bah ti deras sereta dalam naka rekung.
Iya deka ngusak mayuh bansa ngena penapis ke ulih ngemunaska,
Iya deka ngengkahka kekang ba rang mayuh bansa, ngambika sida dibai ngagai jalai ti salah.
29 Tang lagu kita deka nyadi baka lagu ke disadaka maya malam hari
Lebuh kita nyediaka* diri deka ngintu pengerami;
Kita deka gaga ati,
Baka orang ke bejalai sambil nyepu kesuling*
Ke bejalai ngagai gunung Jehovah, iya nya Gunung Batu Israel.
30 Jehovah deka nentuka nyawa Iya ti bekuasa ulih didinga
Lalu Iya deka nunjukka lengan Iya, lengan ti diunjurka Iya ke baruh dalam pengeringat ti angat,
Dalam api ti mau,
Ujan ti bangat, kabut, enggau ujan batu.
31 Orang Asiria deka balat amat takut laban ninga nyawa Jehovah;
Iya deka malu sida ngena tungkat.
32 Jehovah deka ngayunka lengan Iya
Kena beperang ngelaban orang Asiria.
Tiap kali Iya ngayunka tungkat Iya kena ngukum sida,
Nya deka diseretaka enggau bunyi tamborin enggau belikan.*
33 Topet* sida udah disediaka.
Nya mega udah disediaka ke raja sida.
Iya nugungka mayuh kayu ba endur ti besai sereta dalam,
Ke bisi api ti balat mau.
Kesuh seput Jehovah ke baka sungai merirang,
Deka nganguska endur nya.