Bansa Israel ti Kedua
36 Udah nya, bala rayat nata Jehoahas anak Josiah nyadi raja ba Jerusalem kena nganti apai iya. 2 Jehoahas beumur 23 taun lebuh iya berengkah nyadi raja, lalu iya merintah pengelama tiga bulan ba Jerusalem. 3 Tang, raja Ejip muai Jehoahas ari penuduk iya nyadi raja ba Jerusalem, lalu ngasuh bala rayat Judah mayar denda 100 talenta* pirak enggau 1 talenta emas. 4 Kelimpah ari nya, raja Ejip ngelantik Eliakim, iya nya menyadi Jehoahas, nyadi raja Judah enggau Jerusalem. Iya mega nukar nama Eliakim nyadi Jehoyakim. Udah nya, Neko mai Jehoahas ngagai Ejip.
5 Jehoyakim beumur 25 taun lebuh iya berengkah nyadi raja, lalu iya merintah pengelama 11 taun ba Jerusalem. Jehoyakim majak ngereja utai ti jai ba mata Petara iya, Jehovah. 6 Nebukadnesar, raja Babilon, nyerang Jehoyakim, nanchang iya ngena dua iti rantai temaga, lalu mai iya ngagai Babilon. 7 Nebukadnesar mega mai sekeda pekekas Rumah Jehovah ngagai Babilon, lalu nyimpan semua pekekas nya ba istana iya. 8 Sejarah bukai pasal Jehoyakim, nyengkaum penyai iya sereta pengawa ke dipegedika Petara ti dikereja iya, bisi ditulis dalam Bup Bala Raja Israel enggau Judah. Anak iya, Jehoyakin, nganti iya nyadi raja.
9 Jehoyakin beumur 18 taun lebuh iya nyadi raja, lalu iya merintah pengelama tiga bulan 10 hari ba Jerusalem. Jehoyakin majak ngereja utai ti jai ba mata Jehovah. 10 Ba pun taun,* Raja Nebukadnesar nganjung orang ngambika mai Jehoyakin ngagai Babilon sama enggau utai ti berega ari Rumah Jehovah. Udah nya, Nebukadnesar ngelantik Sedekiah, iya nya menyadi apai Jehoyakin, nyadi raja Judah enggau Jerusalem.
11 Sedekiah beumur 21 taun lebuh iya nyadi raja, lalu iya merintah pengelama 11 taun ba Jerusalem. 12 Sedekiah majak ngereja utai ti jai ba mata Petara iya, Jehovah. Iya enda ngemaruhka diri ba depan Nabi Jeremiah ke udah bejaku madahka pesan Jehovah. 13 Iya mega ngelaban Raja Nebukadnesar ke udah ngasuh iya besumpah dalam nama Petara. Sedekiah balat degil, lalu iya enggai pulai ngagai Jehovah, Petara orang Israel. 14 Semua tuai imam enggau semua rayat udah jauh amat limpang lalu enda setia ngagai Petara. Sida majak ngereja utai ti kamah ba mata Petara, baka bansa bukai. Sida mega ngamahka Rumah Jehovah ke udah dikuduska Petara ba Jerusalem.
15 Jehovah, Petara aki ini sida, bendar amat nganjung orang ngambika nangkan sida, laban Iya sayauka nembiak Iya sereta Rumah Sembiang Iya.* 16 Tang, sida majak ngemelika orang ke dianjung Petara ti bendar. Sida enda pedulika jaku Iya sereta ngeleseka bala nabi Iya. Ketegal nya, Jehovah balat amat ringat ngagai sida nyentukka nadai chara ulih nulung sida agi.
17 Nya alai, Iya nganjung raja orang Kaldea nyerang lalu munuh bala lelaki ke biak ngena pedang ba endur ti kudus. Sekalika nya bala indu ke biak, sida ke tuai tauka lemi, mimit pan raja nya nadai kasihka sida. Petara nyerahka semua sida ngagai jari raja nya. 18 Semua pekekas Rumah Petara ti bendar, enda ngira besai tauka mit, pia mega reta ba Rumah Jehovah, reta enggi raja enggau enggi bala pegawai iya, semua nya dibai iya ngagai Babilon magang. 19 Iya nunu Rumah Petara ti bendar lalu ngeruntuhka dinding Jerusalem, nunu semua menara ti tegap, sereta nganchurka semua utai ti berega. 20 Sida ke agi idup ke enda dibunuh ngena pedang ditaban ngagai Babilon. Sida diasuh nyadi ulun ke iya sereta bala anak iya sampai perintah Persia berengkah merintah. 21 Utai nya nyadi ngambika jaku Jehovah ke dipadah nengah Jeremiah dikeamatka. Menua nya deka ditejuka nyadi tembawai sampai sida mayar abis semua taun Sabat ke enda diintu sida, iya nya sampai genap 70 taun.
22 Ba taun keterubah Raja Sairus ari Persia merintah, Jehovah nentuka jaku ke dipadah Iya nengah Jeremiah dikeamatka. Nya alai, Jehovah meransang ati Raja Sairus ngambika madahka pesan ngagai semua endur ke dipegai perintah iya. Pesan nya mega ditulis, lalu tu meh utai ke dipadah ba pesan nya: 23 “Tu meh utai ke dipadahka Raja Sairus ari Persia: ‘Jehovah, Petara ke merintah serega, udah meri semua perintah ke ba dunya ngagai aku. Iya mega ngasuh aku nirika Rumah ke Iya ba Jerusalem ke ba Judah. Sapa bala kita ke nyembah Iya? Mupuk meh kita ngagai Jerusalem. Awakka Jehovah bisi enggau kita.’”