Rome

6 Enti pia, kati tu reti iya kitai patut majak ngereja dosa, ngambika pemanah ati Petara ti besai majak nambah? 2 Tentu enda! Pengidup kitai ke bedosa udah mati. Nya alai, baka ni ku kitai tau terus idup dalam dosa? 3 Kati kita enda nemu, semua kitai ke udah dibaptisa dalam Jesus Kristus mega dibaptisa dalam pemati iya? 4 Ketegal kitai dibaptisa dalam pemati iya, kitai mega dikuburka enggau iya. Lalu sama baka Kristus ke udah diidupka baru ari mati nengah kuasa Apai iya ti bemulia, diatu, kitai mega bisi jalai pengidup ti baru. 5 Enti kitai beserakup enggau iya lebuh kitai mati baka iya, kitai mega tentu deka beserakup enggau iya lebuh kitai diidupka baru baka iya. 6 Kitai nemu, pendiau* kitai ti lama udah dipantang ba tiang sama enggau iya, ngambika tubuh kitai ke bedosa enda agi bekuasa atas kitai, lalu kitai enda agi nyadi ulun dosa. 7 Laban orang ke udah mati udah dilepaska* ari dosa iya.

8 Enti kitai mati enggau Kristus, kitai pechaya kitai mega deka idup enggau iya. 9 Kitai nemu, pengudah diidupka baru ari mati, Kristus enda ulih mati agi. Pemati nadai agi kuasa atas iya. 10 Iya mati sekali aja kena muai dosa belama iya. Tang iya idup ngambika iya ulih ngereja peneka Petara. 11 Pia mega, kita patut ngumbai chara pengidup kita ke bedosa nya udah mati. Tang kita patut idup nyadi murid Jesus Kristus, ngambika ngereja peneka Petara.

12 Nya alai, anang nejuka dosa bekuasa baka raja atas pengidup kita. Anang nitihka pengingin tubuh kita ke nemu mati. 13 Anang nyerahka tubuh kita ngagai dosa, nyadika senyata kena ngereja utai ti enda lurus. Tang serahka diri ngagai Petara, nyadi orang ke udah idup baru ari mati. Lalu serahka mega tubuh kita ngagai Petara, nyadika senyata kena ngereja utai ti lurus. 14 Dosa enda patut nyadi tuan kita, laban kita enda agi ba baruh adat, tang ba baruh pemanah ati Petara ti besai.

15 Kati tu reti iya kitai patut ngereja dosa, ketegal kitai ba baruh pemanah ati Petara ti besai, lalu kitai enda agi ba baruh adat? Tentu enda! 16 Kati kita enda nemu, enti kita nyerahka diri ngagai orang lalu ngasika iya, kita deka nyadi ulun orang nya? Nya alai, enti kita nyadi ulun dosa, kita deka mati. Tang enti kita nyadi ulun Petara lalu ngasika Iya, kita deka nyadi lurus. 17 Kitai beterima kasih ngagai Petara, laban taja pan kita kala nyadi ulun dosa, tang diatu, kita amat deka ngasika Petara ari ati, lalu nitihka utai ke udah diajar Iya ngagai kita. 18 Ketegal kita udah dilepaska ari dosa, kita nyadi ulun Petara lalu ngereja utai ti lurus. 19 Aku ngena jaku ke senang dimeretika, ketegal kita lemi laban dosa. Suba, kita nyerahka tubuh kita nyadi ulun utai ti enda tuchi sereta jai. Diatu, kita patut nyerahka tubuh kita nyadi ulun utai ti lurus sereta kudus. 20 Laban lebuh kita nyadi ulun dosa, kita enda ibuh ngereja utai ti lurus.

21 Nama nyadi ari utai ke digaga kita maya nya suba? Kita ngereja utai ke ngasuh kita malu diatu, lalu semua nya ngujungka pemati. 22 Tang diatu, kita udah dilepaska ari dosa lalu nyadi ulun Petara. Nya alai, kereja meh utai ti kudus ke mai pengidup ti meruan belama iya. 23 Upah dosa nya pemati, tang pemeri ari Petara nya pengidup ti meruan belama iya, nengah Tuan kitai, Jesus Kristus.