Mark

13 Lebuh Jesus pansut ari Rumah Sembiang, siku ari murid iya bejaku: “Pengajar, peda pemanah batu enggau Rumah Sembiang nya!” 2 Tang ku Jesus bejaku: “Kita alit ati meda pemesai Rumah Sembiang nya, enda pia? Iya deka diruntuhka. Nadai sigi batu pan deka mengkang betusun ba atas pangan diri.”

3 Lebuh Jesus duduk ba Bukit Kana, ba seberai Rumah Sembiang, Peter, James, John, enggau Andrew datai ngagai iya kediri, lalu nanya iya: 4 “Padahka ngagai kami, kemaya semua utai tu deka nyadi, lalu nama tanda ti nunjukka pengujung semua utai tu nyau semak?” 5 Jesus lalu bejaku ngagai sida: “Bejimat kita, enggaika orang nesatka kita. 6 Mayuh orang deka datai dalam nama aku. Ku sida, ‘Aku tu Kristus!’ lalu sida deka nesatka mayuh orang. 7 Nambahka nya, lebuh kita ninga munyi perang enggau berita pasal perang ba mayuh endur bukai, anang takut, laban utai nya patut nyadi. Taja pia, pengujung bedau datai.

8 “Laban bansa siti deka beperang ngelaban bansa siti, lalu perintah siti deka beperang ngelaban perintah siti. Tanah berenyang deka nyadi ba mayuh bengkah endur. Lapar pungkang mega deka nyadi. Semua utai tu nunjukka pemerinsa baru berengkah, baka indu ke radai deka beranak.

9 “Kita patut bejimat. Orang deka mai kita ngagai kot, lalu kita deka disipat ba balai gempuru. Kita deka dibai ngagai gabenor enggau raja ketegal aku. Enggau nya, kita besaksika pasal aku ngagai sida. 10 Pia mega, Berita Manah patut ditusui dulu ngagai semua bansa. 11 Lebuh kita ditangkap lalu dibai ngagai kot, anang irauka utai ke deka disebut kita. Sebut aja nama-nama utai ke dipadah kuasa kudus Petara ngagai kita maya nya. Laban utai ke disebut kita ukai datai ari kita, tang ari kuasa kudus Petara. 12 Kelimpah ari nya, orang deka nyerahka menyadi diri ngambika dibunuh, apai deka nyerahka anak iya empu ngambika dibunuh, lalu anak deka ngelaban apai indai, lalu nyerahka sida ngambika dibunuh. 13 Semua orang deka begedika kita ketegal nama aku. Tang orang ke tan datai ke ujung, deka diselamatka.

14 “Nya alai, lebuh kita meda utai ti dipegedi* ke mai pengerusak, bediri ba endur ti enda patut (awakka orang ke macha berundingka enggau manah ngambika meretika utai tu), awakka orang ke diau ba Judea rari ngagai bukit. 15 Orang ke ba atas perabung* enda patut nurun tauka tama ngambi utai ari rumah iya. 16 Lalu orang ke ba ladang, enda patut nikal ngambi gari luar iya. 17 Naka meh penusah indu ke ngandung enggau bala indai ke nusuka anak maya nya! 18 Anang ngetu besampi, ngambika maya nya ukai maya musin chelap. 19 Laban maya nya, penusah deka nyadi. Penusah ti baka nya nadai kala nyadi kenyau ari Petara nempa semua utai nyentuk ngagai seharitu, lalu iya enda agi nyadi pengudah nya. 20 Enti Jehovah enda ngurangka timpuh nya, nadai siku orang pan ulih diselamatka. Tang ketegal sida ke udah dipilih Iya, timpuh nya deka dikurangka Iya.

21 “Udah nya, enti bisi orang nyebut ngagai kita: ‘Peda! Kristus bisi ba ditu,’ tauka, ‘Peda! Kristus ba din!’ anang arapka nya. 22 Laban Kristus ti pelesu enggau nabi ti pelesu endang deka bisi, lalu ngaga kereja ajih, sereta kereja nyelai ti ngalitka ati kena nesatka orang. Enti ulih, sida deka nesatka nembiak Petara ke udah dipilih. 23 Nya alai, bejaga kita! Aku udah madahka semua utai nya ngagai kita sebedau utai nya nyadi.

24 “Maya nya, sepengudah penusah nya nyadi, mata panas deka bebali petang, lalu bulan nadai agi mancharka penampak iya. 25 Bintang deka labuh ari langit, lalu kuasa ti ba langit deka begegar. 26 Udah nya, orang deka meda Anak Mensia datai dalam remang ngena kuasa enggau mulia ti besai. 27 Lalu Anak Mensia deka ngirumka bala melikat iya ngagai semua sukut dunya.* Bala melikat nya deka ngempuruka sida ke udah dipilih, ari ujung langit siti ngagai ujung langit ke bukai.

28 “Belajar meh ari jaku sempama pasal pun kayu ara: Lebuh dan muda iya ke lembut belabuh bedaun, kita nemu musin panas nyau semak. 29 Pia mega, lebuh kita meda semua utai tu nyadi, kita nemu Anak Mensia udah ba mua pintu. 30 Enggau bendar aku madah ngagai kita: Rebak tu enda mati seagi-agi semua utai tu bedau nyadi. 31 Langit enggau dunya deka lenyau, tang jaku aku deka mengkang meruan belama iya.

32 “Nadai orang nemu hari tauka jam iya. Melikat ke ba serega enda nemu. Indah Anak pan enda nemu. Semina Apai aja nemu. 33 Seruran bejimat enggau bejaga, laban kita enda nemu maya ke udah ditetapka Petara. 34 Utai ke nyadi nya baka siku lelaki ke ninggalka rumah iya lalu bejalai ngagai menua bukai. Sebedau mupuk, iya ngasuh bala ulun iya ngemataka rumah iya. Iya meri pengawa ngagai tiap iku sida, lalu ngasuh orang ke nyaga pintu rumah seruran bejaga. 35 Nya alai, terus meh mengkang bejaga, laban kita enda nemu kemaya tuan rumah kita deka datai, sekalika nya maya lemai hari, tauka maya tengah malam, tauka dini hari,* tauka tumu pagi. 36 Ngambika kita enda ditemu iya tinduk lebuh iya ngenyit datai. 37 Tang utai ke disebut aku ngagai kita, mega disebut aku ngagai semua: Seruran bejaga.”