Jaku-Dalam

19 Manah agi nyadi orang ke miskin lalu ngereja utai ti betul,

Ari ke nyadi orang ke beli ke udu bejaku bula.

 2 Enda manah enti sesiku orang nadai penemu;

Orang ke beguai ngereja utai deka bedosa.

 3 Sesiku orang limpang ari jalai iya ketegal pemeli iya empu,

Lalu ati iya ringat ngagai Jehovah.

 4 Orang ke kaya bulih mayuh kaban,

Tang orang ke miskin deka dilengka indah bala kaban iya empu.

 5 Saksi ti pelesu tentu deka diukum,

Lalu orang ke rindu nipu enda ulih lepas.

 6 Mayuh orang nguji ngulihka ati orang ke tinggi pangkat,*

Lalu tiap iku orang deka bekaban enggau orang ke rindu meri hadiah.

 7 Orang ke miskin ditinggalka bala kaban iya,

Indah bala kaban belayan iya empu pan begedika iya!

 8 Barang sapa ke bebendar ngulihka pengelandik berunding enggau manah kasihka diri empu;

Orang ke ngumbai runding ti dalam nya berega deka mujur.

 9 Saksi ti pelesu tentu deka diukum,

Lalu orang ke rindu nipu deka mati.

10 Baka orang ke beli ke enda layak idup nyamai,

Ulun enda layak merintah bala penguasa!

11 Orang ke ulih meretika utai enggau dalam lubah ringat,

Lalu iya dipuji laban iya ngampunka penyalah.

12 Pengeringat raja baka singa ti negung,

Tang lebuh ati iya lantang, nya baka ambun ke ngemasahka utai tumbuh.

13 Anak ke beli ngenusahka apai diri,

Lalu bini ke udu kutap-kutap* baka atap ke buchur.

14 Rumah enggau pengaya pesaka ari apai,

Tang bini ke bepenemu-dalam pemeri ari Jehovah.

15 Orang ke buruk rindu tinduk,

Lalu orang ke enggai gawa deka lapar.

16 Orang ke ngasika pesan ngelindung nyawa diri;

Orang ke enda pedulika jalai diri deka mati.

17 Orang ke ngayanka pemanah ngagai orang ke baruh pendiau baka ke nyali utai ngagai Jehovah,

Lalu Petara Empu deka malas pemanah* orang nya.

18 Seagi-agi bisi peluang,* disiplin meh anak nuan,

Laban enti enda, nuan meh ke deka betanggungjawapka pemati iya.*

19 Orang ke jampat ringat deka betanggungjawap atas pengeringat iya empu;

Enti nuan nguji nulung iya, nuan patut nulung iya bekali-kali.

20 Pendingka jaku ajar lalu terima meh disiplin,

Ngambika nuan nyadi orang ke bepenemu-dalam dudi hari.

21 Ati mensia bisi mayuh pelan,

Tang peneka* Jehovah meh ke deka nyadi.

22 Orang ke ngayanka pengerindu ti setia deka dikerinduka orang bukai;

Manah agi nyadi orang ke miskin ari nyadi orang ke udu bula.

23 Nangika Jehovah mai pengidup;

Orang ke nangika Petara deka tinduk jenak lalu bibas ari utai ti tau ngemedis.

24 Orang ke buruk gawa nepuka jari iya ke dalam mangkuk,

Tang iya enda tesuapka pemakai.

25 Ukum orang ke udu ngelese ngambika orang ke nadai pengalaman nyadi pintar,

Lalu rara orang ke bepenemu-dalam ngambika penemu iya betambah.

26 Anak ke kasar enggau apai diri sereta muru indai diri

Mai pemalu sereta ngenyaika nama ruang bilik diri empu.

27 Anak, enti nuan badu mendingka disiplin,

Nuan deka limpang ari jalai penemu.

28 Saksi ke nadai guna ketawaka utai ti adil,

Lalu nyawa orang ke jai nelan utai ti jai.

29 Orang ke udu ngelese deka diukum,

Lalu orang ke beli deka disipat.