NGAGA ORANG NYADI MURID
PELAJAR 11
Mudah Dimeretika
Prinsip: “Orang ulih meretika utai ku kita.” —1 Kor. 14:9.
Nama Utai Ti Digaga Jesus?
1. Peda VIDEO, tauka bacha Matthew 6:25-27. Udah nya, perundingka sekeda tanya tu:
Baka ni Jesus mandangka pengibuh Jehovah ngagai kitai?
Jesus nemu mayuh fakta pasal burung. Taja pia, nama fakta ti mudah dimeretika orang ke diajarka Jesus? Nama kebuah nya chara ti manah kena ngajar?
Nama Ulih Dipelajarka Kitai Ari Jesus?
2. Enti kitai ngajar orang enggau chara ti mudah dimeretika, sida deka ingatka utai ti diajar kitai. Pia mega, kitai ulih negu ati sida.
Neladan Jesus
3. Anang kelalu mayuh bejaku. Ari ke madahka semua utai ke ditemu nuan pasal sesiti topik, uji meh befokus ba utai ti diajar dalam bup ke dikena seduai. Pengudah nuan nanya iya tanya, sabar meh nganti saut ari pemelajar nuan. Enti iya enda nemu chara nyaut tauka madahka saut ti enda sejalai enggau ajar Bup Kudus, kena meh tanya ke bukai ngambika iya ulih faham ajar Bup Kudus pasal pekara nya. Enti pemelajar nuan udah faham poin utama, nuan ulih terus ngagai poin ke bukai.
4. Tulung pemelajar nuan ngaitka ajar ti baru enggau ajar ke udah ditemu iya. Ambika chunto, sebedau ngajar iya pasal harapan pengangkat ari mati, nuan ulih ngelansa enggau iya pasal baka ni gaya orang ke udah mati.
5. Kena meh jaku sempama enggau bejimat. Sebedau madahka jaku sempama, tanya meh diri empu:
‘Kati jaku sempama nya mudah dimeretika?’
‘Kati pemelajar aku deka senang agi faham jaku sempama nya?’
‘Kati jaku sempama nya deka nulung pemelajar aku meretika poin utama, ukai semina ingatka jaku sempama nya aja?’