Mei

Bala menyadi Kristian ba abad keterubah mega patut napi lapar pungkang ti balat “nyadi ba serata dunya.” Bala apai indai tentu irau pasal chara sida deka ngiga pemakai ke sida sebilik. Baka ni enggau bala nembiak ke benung ngaga pelan ngambika ulih ngereja mayuh agi ba pengawa nginjil? Engka sida berunding enti sema sida patut nganti dulu nyentukka lapar pungkang nya udah abis. Enda ngira nama utai ke nyadi, orang Kristian ba maya nya berubah nitihka situasi sida. Sida terus nginjil ngena sebarang chara ke ulih sida. Lalu sida gaga ati bekunsika utai ti dikemisi sida enggau bala menyadi Kristian ba Judea. (SKR. 11:​29, 30) Sida ke nerima bantu sereta utai ke diguna ulih meda Jehovah benung nulung sida. (Mat. 6:​31-33) Sida tentu berasai semak agi enggau bala menyadi Kristian ke nulung sida. Lalu bala menyadi ke meri duit pemeri tauka utai ke diguna, tauka sida ke nulung ba pengawa meri bantu tentu ngasaika pengaga ati ke datai ari pengawa meri.—SKR. 20:35. w23.04 16 ¶12-13

Kekadang, Jehovah ngena orang ke enda nyembah Iya nyaut sampi bala nembiak Iya. Ambika chunto, Iya meransang Raja Artaserses ngemendarka Nehemiah pulai baru ngagai Jerusalem ngambika Nehemiah ulih nulung ba pengawa nirika baru nengeri nya. (Neh. 2:​3-6) Kemayaharitu mega, Jehovah ulih ngena sida ke enda nyembah Iya nulung kitai lebuh kitai begunaka nya. Sampi kitai kesuah iya enda disaut enggau chara ti ngalitka ati. Tang saut ke diterima kitai nya meh utai ke diguna kitai kena mengkang tetap ati ngagai Jehovah. Nyadi, bebendar meh beratika chara Jehovah nyaut sampi nuan. Nuan patut suah ngetu sereta berunding pasal chara Jehovah nyaut sampi nuan. (Mas. 66:​19, 20) Kitai ukai semina ngayanka pengarap lebuh kitai besampi ngagai Jehovah. Tang kitai mega ngayanka pengarap lebuh kitai nerima saut ke diberi Iya ngagai sampi kitai, enda ngira nama saut nya.—Heb. 11:6. w23.05 11 ¶13; 12 ¶15-16

Lebuh kitai nyerahka diri ngagai Jehovah, kitai udah besemaya deka nyembah Iya sereta ngereja peneka Iya. Kitai patut ngamatka semaya nya. Tanggung pengawa nya enda kelalu tusah ba kitai. Tu ketegal, Jehovah udah ngaga kitai ngambika ngereja peneka Iya. (Pem. 4:11) Iya ngaga kitai ngambika bisi pengingin deka ngelala sereta nyembah Iya. Lalu Iya ngaga kitai ngambika kitai sama baka Iya. Asil iya, kitai ulih majak semak ngagai Iya, lalu gaga ati ngereja peneka Iya. Nambahka nya, lebuh kitai ngereja peneka Petara sereta nitihka Anak Iya, kitai deka “bulih pengering baru.” (Mat. 11:​28-30) Nya alai, ngenalamka pengerindu nuan ke Jehovah. Nuan ulih berunding enggau dalam pasal utai ke udah digaga Jehovah ke nuan, sereta berekat ke deka diberi Iya ngagai nuan. Lebuh pengerindu nuan ke Petara majak dalam, nuan deka senang agi ngasika Iya. (1 Jhn. 5:3) Jesus ulih mujur ngereja peneka Petara laban iya besampi minta tulung ari Jehovah. Pia mega, iya terus berunding pasal berekat ke deka diterima iya. (Heb. 5:7; 12:2) Baka Jesus, kitai mega ulih besampi minta pengering ari Jehovah. Kitai mega ulih terus berunding pasal pengidup ti meruan belama iya. w23.08 27-28 ¶4-5

Kitai rindu orang ke sabar. Nama kebuah? Kitai kagum enggau orang ke enda ringat tang ulih nganti enggau sabar ke sesiti utai. Kitai besyukur lebuh orang sabar enggau kitai maya kitai ngaga penyalah. Kitai mega besyukur enggau pengajar Bup Kudus ke sabar enggau kitai. Maya nya, kitai engka tusah deka belajar, nerima, tauka nitihka ajar Bup Kudus. Tang ke pemadu penting, kitai amat beterima kasih laban Petara Jehovah sabar enggau kitai! Taja pan kitai rindu lebuh orang ngayanka penyabar, tang kekadang kitai engka tusah deka ngayanka sifat tu. Ambika chunto, kitai engka tusah deka sabar ba traffic jam, kelebih agi enti kitai udah laun. Kitai engka tusah deka sabar lebuh orang terus ngereja utai ke ngasuh kitai ringat. Lalu kekadang, kitai engka tusah deka nganti enggau sabar laban dunya baru ke disemayaka Jehovah baka ke laun datai. Tang dalam semua pekara, kitai patut sabar agi. w23.08 20 ¶1-2

Kingatka, Jehovah ngasuh Gideon nganjung pulai nyauka semua bala soldadu iya. Iya engka bisi berunding, ‘Kati ubah tu patut? Kati tu ulih mujur?’ Taja pia, Gideon ngasi. Kemayaharitu bala tuai gempuru neladan Gideon lebuh sida ngasika iring ari gerempung ke ngasuh sida ngubah chara sekeda utai digaga. (Heb. 13:17) Gideon ngasika Jehovah taja pan iya berasai takut tauka patut ngereja tanggung pengawa ti bahaya. (P-ulu. 9:17) Pengudah Jehovah madahka Diri deka nyukung Gideon, Gideon berasai amat yakin Petara deka nulung iya ngelindung bala nembiak Petara. Bala tuai gempuru ke diau ba alai pengawa kitai ditagang, neladan Gideon. Sida enggau berani ngulu ba gempuru sereta pengawa nginjil taja pan sida engka ditangkap, ditasat, lenyau kereja, tauka napi utai ti jai ke bukai. Maya Penusah ti Besai, bala tuai gempuru begunaka pemerani kena ngasika sebarang iring ke diterima sida taja pan iring nya engka bahaya. w23.06 5-6 ¶12-13

Jehovah nepuka cherita Jehoiada dalam Bup Kudus ngambika kitai ulih belajar ari nya. (Rom. 15:4) Lalu lebuh Jehoiada mati, iya diberi basa ti spesial, iya dikuburka ‘ba lumbung bala raja di Nengeri David kena sida ngingatka pemanah pengawa ti udah dikereja iya ke orang Israel, ke Petara, enggau ke Rumah Sembiang.’ (2 Ban. 24:​15, 16) Cherita pasal Jehoiada ulih nulung semua kitai ngemansangka asai ati ti nangika Petara. Bala tuai gempuru ulih neladan Jehoiada. Nama chara iya? Sida seruran ngiga chara kena nyaga raban gempuru. (SKR. 20:28) Bala menyadi ke tuai ulih belajar ari Jehoiada. Lebuh sida nangika Jehovah sereta mengkang setia, Iya ulih ngena sida ngereja peneka Iya. Bala nembiak ulih meda chara Jehovah ngintu Jehoiada lalu neladan Iya. Sida ngayanka basa ngagai bala menyadi Kristian ke tuai agi, kelebih agi ngagai sida ke udah betaun-taun gawa ke Jehovah. (J-lam. 16:31) Aram meh kitai enggau setia nyukung “sida ke ngiring” enggau chara ngasika sida.—Heb. 13:17. w23.06 17-18 ¶14-15

Ba gempuru, ayanka diri nemu berunding. Tu deka nulung nuan lebuh ngaga pemutus pasal ni penyuah nuan patut ngangkatka jari meri komen. Enti kitai kelalu suah ngangkatka jari, menyadi ke ngiring engka berasai ditekan ngambika ngangau kitai mayuh kali, taja pan orang bukai bedau bisi peluang meri komen. Tu ulih ngasaka ati orang bukai, lalu ngasuh sida enggai agi ngangkatka jari meri komen. (P-jar. 3:7) Lebuh mayuh bala menyadi ngangkatka jari kena meri komen, kitai engka enda suah dikangau meri komen baka ke dikedekaka kitai. Bisi maya iya, menyadi ke ngiring engka langsung enda ulih ngangau kitai meri komen. Nya ulih ngasaka ati kitai. Tang lebuh kitai enda dikangau meri komen, kitai patut nguji ngambika enda ringat. (P-jar. 7:9) Enti nuan enda ulih suah meri komen baka ke dikedekaka nuan, nuan ulih ninga enggau manah seraya bala menyadi ke bukai meri komen. Lalu pengudah gempuru, nuan ulih muji sida ketegal komen ke udah diberi sida. Bala menyadi engka ngasaika jaku puji ke diberi nuan amat meransang, sama baka komen ke engka ulih diberi nuan. w23.04 23-24 ¶14-16

Belajar sereta belematika Jaku Petara. Siti pun kayu ulih bediri tegap enti iya bisi urat ti dalam. Nyadi enti kitai bisi pengarap ti tegap ba Jehovah, kitai ulih mengkang bediri tegap. Lebuh pun kayu nya majak besai, urat iya deka majak dalam sereta ngerembai enggau jauh agi. Lebuh kitai belajar sereta belemati, kitai deka negapka agi pengarap kitai sereta yakin agi chara Petara nya chara ti pemadu manah. (Kol. 2:​6, 7) Perundingka chara Jehovah ngiring, ngelalau, sereta nyaga nembiak Iya kelia. Ambika chunto, ba siti genera, Esekiel beratika siku melikat enggau bejimat nyukat Rumah Sembiang. Genera tu negapka agi pengarap Esekiel, lalu tu ngajar kitai sekeda utai ti praktikal pasal chara kitai ulih ngetanka standard Jehovah bekaul enggau sembah ti tuchi. (Esk. 40:​1-4; 43:​10-12) Kitai mega bulih penguntung lebuh kitai ngena awak belajar sereta belematika utai ti dalam agi ba Jaku Petara. Kitai mega ulih ngembuan ati ti tegap, lalu arapka Jehovah enggau pengabis ati.—Mas. 112:7. w23.07 18 ¶15-16

Bup Kudus bisi mayuh teladan ke ulih ditunda bala menyadi lelaki ti biak. Bala lelaki kelia rinduka Petara sereta ngintu bala nembiak Iya ngena mayuh macham chara. Ba ruang bilik sereta ba raban gempuru nuan mega, bisi teladan bala menyadi lelaki ti matang ke ulih ditunda nuan. (Heb. 13:7) Lalu, nuan mega bisi teladan ti sempurna, iya nya Jesus Kristus. (1 Pet. 2:21) Seraya nuan belajarka teladan sida, perundingka sifat sida ti manah. (Heb. 12:​1, 2) Udah nya, perundingka chara nuan ulih neladan sida. Orang lelaki ti ulih berunding enggau manah, enda berumban lebuh ngaga pemutus. Nya alai, menyadi lelaki ti biak patut bebendar belajar sereta terus ngemansangka pengelandik tu.Keterubah, belajarka prinsip Bup Kudus, lalu perundingka kebuah nya manah ke nuan. Udah nya, kena meh prinsip nya nulung nuan ngaga pemutus ti deka ngelantangka ati Jehovah. (Mas. 119:9) Enti nuan ngemansangka pengelandik ti penting tu, nya deka nulung nuan nyadi orang Kristian ti matang.—J-lam. 2:​11, 12; Heb. 5:14. w23.12 24-25 ¶4-5

Bala apai indai ulih ngajar bala anak sida chara meri saut ti nelap lebuh pengarap sida disakal. (Jas. 3:13) Sekeda bala apai indai bisi sesi belatih lebuh belajarka Bup Kudus ba diri sebilik. Keterubah iya, sida berandauka topik ke engka ditanya ba sekula. Udah nya, sida berandau sereta belatihka chara meri saut. Lalu sida ngajar bala anak chara meri saut enggau nelap sereta manah. Sesi belatih ulih nulung bala nembiak yakin enggau pengarap diri empu, lalu ulih nerang ngagai orang bukai kebuah sida pechayaka utai nya. Siri “Tanya ari Bala Nembiak” ke ba jw.org mega bisi keretas kereja ke bala nembiak. Tu digaga kena nulung bala nembiak yakin agi enggau pengarap diri empu. Lalu tu mega deka nulung sida meri saut ngena jaku sida empu lebuh pengarap sida disakal. Lebuh diri sebilik berandauka siri tu, semua kitai ulih belajar chara ngetanka pengarap kitai enggau chara ti nelap sereta manah. w23.09 17 ¶10; 18 ¶15-16

Kala nuan netapka siti juluk ati ba pengarap tang tusah deka nyapai iya? Enti pia, nuan enda kediri. Ambika chunto, Philip deka ngemansangka agi kualiti sereta penyuah iya besampi, tang iya tusah deka ngiga awak ngambika ulih besampi. Juluk ati Erika nya, nguji ngambika enda laun datai ngagai gempuru sebedau nginjil. Tang iya agi ga laun datai ngagai nyauka tiap iti gempuru. Enti nuan bisi juluk ati ba pengarap ke bedau dijapai, anang asa ati. Indah juluk ati ti mit pan begunaka awak sereta usaha ti besai. Pengeran nuan ti agi deka nyapai juluk ati nya nunjukka kaul nuan enggau Jehovah amat penting ba nuan, lalu nuan deka meri Iya utai ti pemadu manah. Jehovah beterima kasihka usaha nuan. Endang amat, Iya enda minta ari nuan lebih agi ari ke ulih diberi nuan. (Mas. 103:14; Mik. 6:8) Nya alai, lebuh nuan netapka juluk ati, tentuka nuan ulih nyapai iya. w23.05 26 ¶1-2

Orang ti berani mega ulih berasai takut. Taja pia, sida enda nejuka asai ati tu nagang sida ari ngereja utai ti betul. Daniel siku nembiak lelaki ke amat berani. Iya belajarka utai ti ditulis bala nabi Petara, nyengkaum jaku benabi ari Jeremiah. Ari utai ti dipelajarka iya, Daniel nyau nemu orang Judah ke nyadi orang tangkap ba Babilon deka bibas enda lama da agi. (Dan. 9:2) Daniel meda jaku Jehovah dikeamatka, lalu tu negapka agi pengarap Daniel ngagai Jehovah. Orang ke ngembuan pengarap ti tegap ngagai Petara ulih nyadi amat berani. (Banding Rom. 8:​32, 37-39.) Lalu ke pemadu penting, Daniel seruran besampi ngagai Apai iya ti di serega. (Dan. 6:10) Iya ngaku dosa iya ngagai Jehovah, sereta bekunsika asai ati iya ngagai Jehovah. Lalu Daniel mega minta tulung. (Dan. 9:​4, 5, 19) Baka semua kitai, lebuh Daniel ada, iya enda automatik bisi pemerani. Tang iya ngemansangka sifat tu lebuh iya belajar, besampi, sereta arapka Jehovah. w23.08 3 ¶4; 4 ¶7

Lebuh kitai ngasika piak bekuasa, kitai mai penguntung ngagai diri empu sereta ngagai orang bukai. Ambika chunto, ketegal kitai ngasika undang-undang, kitai ulih nyeliahka diri ari diukum. (Rom. 13:​1, 4) Pia mega, lebuh kitai ngasika piak bekuasa, sida deka ngembuan runding ti manah pasal Saksi-Saksi Jehovah. Tu meh utai ti nyadi ba Nigeria betaun-taun suba. Bala soldadu tama ngagai Palan Gempuru lebuh gempuru benung dipejalaika. Sida ngiga orang ke ngelaban pengawa mayar chukai. Tang tuai soldadu nya ngasuh bala soldadu iya mupuk. Iya madah: “Saksi-Saksi Jehovah seruran mayar chukai.” Endang amat, tiap kali nuan ngasika undang-undang, nuan deka nulung ngemansangka reputasi Saksi-Saksi Jehovah. Lalu, bisi maya nya ila, reputasi tu deka nyaga bala menyadi Kristian nuan.w23.10 9 ¶13

Sekeda ari nembiak Jehovah udah nganti lama ke pengujung sistem dunya tu. Sekeda orang berunding, pengujung dunya tu patut udah datai betaun-taun suba. Jehovah nemu asai ati bala nembiak Iya. Kebendar iya, Jehovah madahka tu ngagai nabi Habakuk: “Utai nya apin dikamatka diatu. Tang maya deka datai enda lama da agi, alai utai ti dipadahka Aku ngagai nuan, deka dikamatka. Utai nya baka ke lubah nyadi, tang anti aja utai nya. Iya tetap deka nyadi, lalu iya enda masau jam.” (Hab. 2:3) Kati Petara nyebut baka nya ke penguntung Habakuk aja? Tauka kati jaku Iya mega bisi reti ke kitai kemayaharitu? Jehovah ngasuh rasul Paul ngena jaku nya ke orang Kristian kemayaharitu, ti keran nganti dunya ti baru. (Heb. 10:37)Nya alai kitai ulih pechaya, taja pan semaya pengelepas ari Jehovah baka ke lubah deka nyadi, tang “iya tetap deka nyadi, lalu iya enda masau jam.” w23.04 30 ¶16

Mayuh orang Israel enggai nerima Moses nya pengari Jehovah, taja pan bisi bukti ti terang. (P-pau. 14:​10, 11) Sida bekali-kali enggai ngaku Jehovah benung ngena Moses ngiring sida. Ketegal nya, Jehovah enda ngemendarka sida tama ngagai Menua ti Udah Disemaya. (P-pau. 14:30) Taja pia, bisi sekeda orang Israel ke ngasika iring Jehovah. Ambika chunto, Jehovah madahka: “Kalep, . . . seruran ngasika Aku enggau pengabis ati.” (P-pau. 14:24) Jehovah merekatka Kalep. Iya indah ngemendarka Kalep milih endur ti dikedekaka iya ba menua Kanaan. (Jos. 14:​12-14) Orang Israel ke dikemendarka tama ngagai Menua ti Udah Disemaya mega netapka teladan ti manah bekaul enggau ngasika iring Jehovah. Lebuh Josua nganti Moses nyadi tuai orang Israel, Bup Kudus madahka: “Ba sepemanjai idup Josua, semua orang Israel amat bebasaka iya.” (Jos. 4:14) Nya meh kebuah iya, Jehovah merekatka sida, lalu mai sida tama ngagai Menua ti Udah Disemaya.—Jos. 21:​43, 44. w24.02 21 ¶6-7

Lebuh lutur meresa nadi jantung kitai, iya ulih nemu sekalika jantung kitai kuat tauka enda. Baka nya mega, enti kitai beratika penalam pengerindu kitai ke orang bukai, kitai ulih nemu penalam pengerindu kitai ke Petara. Enti kitai ngasaika pengerindu kitai ke bala menyadi Kristian majak kurang, tu engka nunjukka pengerindu kitai ke Petara mega majak kurang. Tang lebuh kitai seruran ngayanka pengerindu ngagai bala menyadi Kristian, kitai ulih nemu pengerindu kitai ke Petara agi tegap. Kitai patut irau enti pengerindu kitai ke bala menyadi Kristian majak lemi. Nama kebuah? Laban tu reti iya kaul kitai enggau Jehovah udah majak lemi. Rasul John madahka tu enggau terang lebuh iya ngingatka kitai: “Orang ke enda rinduka menyadi diri, ke ulih dipeda iya, enda ulih rinduka Petara, ke enda kala dipeda iya.” (1 Jhn. 4:20) Nama ulih dipelajarka kitai? Jehovah semina lantang ati enggau kitai enti kitai “rinduka pangan diri.”—1 Jhn. 4:​7-9, 11. w23.11 8 ¶3; 9 ¶5-6

Apai Raja Joas udah nadai lebuh Joas agi biak. Nyadi, Imam Besai Jehoiada nyaga iya, lalu ngajar iya pasal Jehovah. Nya alai, Joas ulih ngaga pemutus ti manah laban iya mendingka jaku lalau ke diberi Jehoiada ngagai iya. Ketegal teladan Johaiada ti manah, Joas ngaga pemutus deka nyembah Jehovah. Lalu iya mega nulung bala rayat iya ngereja utai ti sama. Joas mega nentuka Rumah Sembiang Jehovah diaduka baru. (2 Ban. 24:​1, 2, 4, 13, 14) Apai indai tauka orang bukai engka benung ngajar nuan rinduka Jehovah sereta idup nitihka standard Iya. Enggau nya, nuan benung nerima siti pemeri ti berega. (J-lam. 2:​1, 10-12) Apai indai nuan ulih ngelatih nuan ngena mayuh chara. Sida deka gaga ati lebuh nuan nitihka jaku lalau ke diberi seduai iya ari Bup Kudus. Tang ke pemadu penting, Jehovah deka gaga ati, lalu kaul Iya enggau nuan deka nyadi majak tegap. (J-lam. 22:6; 23:​15, 24) Semua tu kebuah ti manah nuan patut neladan Joas lebuh iya agi biak. w23.09 8-9 ¶3-5

Jehovah besemaya deka ningaka sampi kitai. Petara kitai rinduka kitai laban kitai nyembah Iya enggau tetap ati. Nya alai, Iya seruran deka ningaka sampi kitai. (Mas. 10:17; 37:28) Taja pia, tu ukai reti iya Jehovah deka meri kitai semua utai ke dipinta kitai. Sekeda ari utai ke dipinta kitai engka semina deka diterima kitai ba dunya baru. Jehovah berundingka baka ni utai ke dipinta kitai bisi kaul enggau tuju Iya. (Isa. 55:​8, 9) Siti ari tuju Jehovah iya nya, ngambika dunya tu penuh enggau orang ti gaga ati sereta beserakup di baruh Perintah Iya. Tang Sitan madahka, mensia deka gaga agi ati enti sida merintah diri empu. (P-kal. 3:​1-5) Kena nunjukka utai ti dipadah Sitan nya bula, Jehovah udah nejuka mensia merintah diri empu. Lalu, kitai ulih meda perintah mensia udah ngasuh mayuh penanggul nyadi kemayaharitu. (P-jar. 8:9) Kitai nemu Jehovah enda muai semua penanggul nya diatu. w23.11 21 ¶4-5

Jehovah besemaya, nengah Abraham mayuh bengkah bansa deka diberekat. Taja pia, lebuh Abraham beumur 100 taun, lalu Sarah beumur 90 taun, seduai iya agi bedau bisi anak. Ba runding mensia, Abraham seduai Sarah tentu enda ulih ngembuan anak. Utai nya nguji pengarap Abraham. Tang “Abraham andal sereta arap deka nyadi apai ke mayuh bansa.” (Rom. 4:​18, 19) Nyau kelama, utai ke dikearapka Abraham, dikeamatka. Anak ke dianti iya, Isak, ada. (Rom. 4:​20-22) Kitai ulih ngelantangka ati Petara lalu dikumbai lurus. Enggau nya, kitai ulih nyadi pangan Iya baka Abraham. Nya meh poin ke disebut Paul lebuh iya nulis: “Jaku ‘iya dikumbai Petara lurus’ ukai semina ditulis ke [Abraham] aja, tang mega ke kitai. Kitai mega deka dikumbai Petara lurus, laban kitai arapka Iya, ke udah ngidupka baru Tuan kitai, Jesus.” (Rom. 4:​23, 24) Baka Abraham, kitai patut ngembuan pengarap, pengawa, sereta harapan. w23.12 7 ¶16-17

Lebuh nuan napi penguji ke ngasuh nuan berasai takut, kingatka meh, Jehovah ukai aja beratika penguji nya, tang Iya mega beratika asai ati nuan lebuh nuan napi penguji nya. Ambika chunto, lebuh orang Israel napi utai ti enda lurus ba Ejip, Jehovah ukai aja beratika utai nya, tang Iya mega beratika “pemedis ke ditapi sida.” (P-sut. 3:7) Enti nuan benung napi siti penguji ti ngenakutka, nuan engka enda sedar Jehovah benung nulung nuan. Nyadi, nama ulih digaga nuan? Besampi minta tulung ari Iya ngambika nuan ulih meda chara Iya nyukung nuan. (2 Raj. 6:​15-17) Udah nya, perundingka tu: Kati bisi cheramah tauka komen ba gempuru ke udah ngeringka nuan? Kati bisi litaricha, video, tauka lagu asal ke udah meransang nuan? Kati bisi bala menyadi ke meransang nuan tauka bekunsika ayat Bup Kudus ti negapka nuan? Kitai engka enda sedar pengerindu ari bala menyadi Kristian sereta peransang ari Jaku Petara udah mayuh nulung kitai. Tang semua nya pemeri ti spesial ari Jehovah. (Isa. 65:13; Mrk. 10:​29, 30) Tu nunjukka Jehovah ibuhka nuan. (Isa. 49:​14-16) Lalu tu mega nunjukka kitai ulih pechayaka Jehovah. w24.01 4-5 ¶9-10

Enda lama sebedau Jesus niki ke serega, Jesus ngingatka bala murid iya pasal pengawa ti diberi iya ngagai sida. Sida deka meri saksi pasal Jesus “ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:8; Luk. 24:​46-48) Enda lama udah nya, bala tuai orang Judah nangkap rasul Peter enggau rasul John lalu mai seduai iya ngagai Raban Kunsil Orang Judah. Sida ngasuh bala lelaki ti tetap ati tu badu agi nginjil, indah ngugut tauka ngenakutka sida. (SKR. 4:​18, 21) Peter enggau John nyaut: “Ba mata Petara, sekalika kami patut ngasika kita ari ke ngasika Petara, barang ku kita meh berundingka nya. Tang kami enda ulih ngetu bejaku pasal utai ke udah dipeda sereta didinga kami.” (SKR. 4:​19, 20) Lebuh Peter enggau John dilepaska, bala murid nya besampi ngagai Jehovah pasal ngereja peneka Iya. Jehovah nyaut sampi sida ke ari ati nya.—SKR. 4:31. w23.05 5 ¶11-12

Jehovah enggau Jesus udah begulai lama agi ari orang bukai. Pengelama bebiliun taun seduai iya begulai ba serega, seduai iya nyadi amat rapat lalu ngembuan pengerindu ti dalam ngagai pangan diri. Baka ke ulih dipeda ba ayat seharitu, Jehovah enggau terang madahka pengerindu Iya ke Jesus. Jehovah ulih madah, ‘Aku gaga ati ke iya.’ Tang ketegal Iya deka kitai nemu pemesai pengerindu Iya ke Jesus, Iya madah: “Tu Anak ti dikesayauka Aku.” Jehovah amat temegah ati ke Jesus sereta utai ti deka digaga iya. (Eps. 1:7) Lalu Jesus enda kala kakang ati enggau pengerindu Apai iya. Iya nemu Jehovah amat sayauka iya. Iya suah nyebut enggau yakin, Apai iya rinduka iya.—Jhn. 3:35; 10:17; 17:24. w24.01 28 ¶8

Gambarka tu: Orang ke dikeibuhka nuan nyebut utai ti jai pasal nuan. Taja pan nuan nemu utai ke dipadah iya bula, tang bisi mega orang pechayaka utai ti dipadah iya. Lalu ke balat agi, sida mega ngerembaika pemula nya, lalu mayuh agi orang pechayaka pemula nya. Nama asai ati nuan? Utai bula ke disebut iya tentu ngemediska ati nuan, enda pia? Situasi tu ulih nulung kitai meretika asai ati Jehovah lebuh orang nyebut utai ti bula pasal Iya. Siku ari melikat Iya nyebut utai ti bula pasal Iya ngagai indu ti keterubah, iya nya Awa. Lalu Awa pan pechayaka pemula nya. Ketegal pemula nya, Adam enggau Awa pan angkat ngelaban Jehovah. Asil iya, dosa enggau pemati ngelekai ngagai semua mensia. (P-kal. 3:​1-6; Rom. 5:12) Semua penusah ke bisi ba dunya kemayaharitu baka pemati, perang, enggau pemerinsa, nyadi ketegal pemula ke dipadah Sitan. Kati Jehovah berasai tusah ati ketegal pemula nya sereta semua penusah ke nyadi ketegal pemula nya? Au, Iya tentu berasai tusah ati. Tang, Jehovah enda pedis ati tauka bedendam. Kebendar iya, Bup Kudus madahka, Jehovah agi “Petara ti gaga ati.”—1 Tim. 1:11. w24.02 8 ¶1-2

Baka ni nuan ulih neladan Josep, lalu nulak penguji? Gaga meh pemutus ari diatu pasal utai ti deka digaga nuan enti sema nuan diuji. Belajar meh nulak utai ti dipegedika Jehovah enggau jampat, lalu seliahka diri ari berunding pasal utai nya. (Mas. 97:10; 119:165) Tu deka nulung nuan enda alah lebuh diuji. Nuan nemu, nuan udah tetemuka pemendar, lalu nuan deka nyembah Jehovah enggau pengabis ati. Tang, bisi utai ke nagang nuan ari nyerahka diri sereta dibaptisa. Nuan ulih belajar ari teladan Raja David. Iya besampi lalu minta Jehovah: ‘Peresa meh aku, O Petara, ngambika Nuan nemu ati aku. Uji meh ati aku, ngambika Nuan nemu runding aku. Giga meh ulah ti jai dalam aku lalu iring aku niti jalai ti meruan belama iya.’ (Mas. 139:​23, 24) Jehovah merekatka sida ti “bebendar ngiga Iya.” Nuan nunjukka diri bebendar ngiga Iya seraya nuan enggau naka ulih nyapai juluk ati deka nyerahka diri sereta dibaptisa.—Heb. 11:6. w24.03 6 ¶13-15

Imam besai ngarika orang ba depan Petara. Lebuh Langkau Sembiang diserahka ngagai Jehovah, Iya milih Aron nyadi imam besai ti keterubah orang Israel. Tang Rasul Paul nerangka, “ketegal pemati, bala imam patut diganti orang bukai laban sida enda ulih agi bejalaika pengawa sida.” (Heb. 7:​23-26) Lalu ketegal sida mega enda sempurna, sida patut nyerahka korban ketegal dosa sida empu. Tu meh bida ti besai entara imam besai orang Israel enggau Imam Besai Jesus Kristus. Jesus Kristus nya Imam Besai kitai. Iya “gawa ba endur ti kudus, ba langkau kain ti bendar ke didirika Jehovah, ukai mensia.” (Heb. 8:​1, 2) Paul nerangka, “ketegal Jesus idup nyentuk ke belama iya, iya enda ibuh diganti orang bukai nyadi imam.” Paul mega nerangka, Jesus nya “tuchi, diseraraka ari orang ke bedosa.” “Bala imam besai ke bukai patut meri pemeri ninting hari, keterubah ketegal dosa sida empu . . . Tang, [Jesus] enda baka sida.” w23.10 26 ¶8-9

“Langit ti lama” merujuk ngagai perintah ba dunya ke di baruh kuasa Sitan enggau bala melikat iya ti jai. (Mat. 4:​8, 9; 1 Jhn. 5:19) Baka ke dikena dalam Bup Kudus, leka jaku “dunya” ulih merujuk ngagai orang ba dunya. (Mas. 96:1) Nyadi, “dunya ti lama” merujuk ngagai orang ti jai kemayaharitu. Jehovah enda ngemanahka agi “langit” enggau “dunya” ke bisi diatu, tang Iya deka ngerusak sida. Udah nya, Iya deka nganti sida enggau “langit ti baru enggau dunya ti baru.” Reti iya, bisi siti perintah ti baru ke deka merintah atas orang ti lurus. Jehovah deka ngaduka baru bumi tu sereta ngeraika mensia ngambika semua sida nyadi sempurna. Baka ke dipadah Isaiah, Jehovah deka ngaduka baru bumi tu ngambika nyadi endur ti manah sama baka taman Eden. Lalu Jehovah deka ngasuh tiap iku kitai nyadi sempurna. Orang ke tachat, buta, enggau bengal deka digeraika, indah orang ke udah mati deka diangkatka idup baru.—Isa. 25:8; 35:​1-7. w23.11 4 ¶9-10

“Penusah ti Besai” deka nyadi enggau ngenyit. (Mat. 24:21) Tang Penusah ti Besai tu enda sama enggau penusah ke bukai, laban kitai nemu iya endang deka datai. Kira-kira 2,000 taun kelia, Jesus udah nangkan bala murid iya kena besedia ke hari nya. Enti kitai udah besedia, kitai deka senang agi tan napi maya ti tusah nya sereta nulung orang bukai mega ngereja utai ti sama. (Luk. 21:36) Kitai begunaka ati ti tan ngambika ulih ngasika Jehovah lalu arap Iya deka nyaga kitai. Nama deka digaga kitai enti bala menyadi kitai lenyau sekeda tauka semua utai ti dikemisi sida? (Hab. 3:​17, 18) Ati ti siru deka meransang kitai meri tulung ke diguna sida. Nama deka digaga kitai enti kitai patut diau begulai enggau mayuh ari bala menyadi Kristian kitai pengelama sesiti timpuh ketegal diserang orang ari bemacham-macham bansa ke begempung? (Esk. 38:​10-12) Pengerindu ti besai ke sida deka nulung kitai tan napi maya ti tusah nya. w23.07 2 ¶2-3

Laki bini ulih belajar ari teladan Akuila enggau Prisila. Seduai iya amat dikerinduka mayuh bala menyadi Kristian ba abad keterubah. (Rom. 16:​3, 4) Seduai iya bekereja, nginjil, sereta nulung orang bukai begulai. (SKR. 18:​2, 3, 24-26) Kebendar iya, tiap kali Bup Kudus nyebut pasal Akuila enggau Prisila, iya seruran nyebut nama seduai iya begulai. Baka ni laki bini ulih neladan seduai iya? Perundingka pasal mayuh utai ke patut digaga nuan enggau kaling pengidup nuan. Kati seduai ulih ngereja nya begulai ari ke ngereja nya kediri? Ambika chunto, Akuila enggau Prisila nginjil begulai. Kati nuan suah ngaga pelan ngambika ulih nginjil begulai mega? Akuila enggau Prisila mega gawa begulai. Nuan enggau kaling pengidup nuan engka bisi kereja sekular ti bebida, tang kati seduai ulih ngaga kereja ba rumah begulai? (P-jar. 4:9) Lebuh seduai nulung pangan diri nembuka sesiti pengawa, seduai deka ngasaika diri baka siti tim lalu bisi peluang bejaku enggau pangan diri. w23.05 22-23 ¶10-12

Semua orang kekadang berasai takut. Bisi sekali, lebuh Raja Saul begagaika David lalu deka munuh iya, David ngerarika diri ngagai kuta orang Pilistin ba Gat. Raja Akis, ke merintah Gat, nyau nemu David meh ke udah munuh “bepuluh ribu iku” orang Pilistin. Ketegal nya, David berasai “takut amat.” (1 Sam. 21:​10-12) Iya takut enggau utai ti deka dikereja Akis ngagai iya. Nama nulung David nyadi berani taja pan iya berasai takut? Ba Masmur 56, David madahka asai ati iya lebuh iya ba Gat. Dalam masmur nya, David enggau terang madahka kebuah iya berasai takut. Tang, iya mega nerangka utai ke nulung iya badu agi berasai takut. Lebuh David berasai takut, iya arapka Jehovah. (Mas. 56:​1-3, 11) David bisi kebuah ti manah arapka Jehovah. Enggau tulung ari Jehovah, David ngaga siti pelan ti nyelai. Iya pepura nyadi gila, lalu pelan nya mujur. Ketegal nya, Raja Akis enggai agi munuh David, tang iya muru David! Nya alai, David ulih ngerarika diri.—1 Sam. 21:13–22:1. w24.01 2 ¶1-3

Utai ke ditulis ba ayat seharitu merujuk ngagai sapa? Orang Kristian ke dipilih ke udah diangkatka idup baru ba serega. Nyadi, ba pengujung Penusah ti Besai, lebuh semua orang ke dipilih merintah enggau Kristus udah ba serega magang, sida deka nerima tanggung pengawa ti baru. Pengudah sida niki ke serega, sida deka enggau Jesus sereta bala melikat ke bukai beperang ngelaban bala munsuh Petara. Perundingka tu: Ba dunya, sekeda ari sida ke dipilih merintah enggau Kristus nya tuai sereta lemi. Tang pengudah sida diangkatka idup baru ba serega, sida deka nyadi melikat ti bekuasa sereta ngembuan tubuh ke enda ulih dipunaska. Sida deka enggau Jesus, Raja ti kering sereta bekuasa, beperang. Pengudah perang Armagedon abis, sida deka gawa enggau Jesus, lalu nulung mensia nyadi sempurna. Endang amat, maya ba serega, sida ulih nulung bala menyadi Kristian ba dunya enggau mayuh agi enti dibandingka enggau maya sida agi mensia ti enda sempurna. w24.02 6-7 ¶15-16

Sekeda orang udah besedia deka nyerahka diri sereta dibaptisa, tang sida agi berasai kakang ati. Sida engka berunding, ‘Baka ni enti aku ngereja dosa ti besai, lalu dibuai ari gerempung Jehovah?’ Enti nuan bisi asai ati ke baka nya, andal meh Jehovah deka meri nuan semua utai ke diguna nuan ngambika nuan ulih “idup baka orang ke nyembah [Iya] sereta ngelantangka ati Iya enggau pengabis iya.” (Kol. 1:10) Iya mega deka meri nuan pengering kena ngereja utai ti betul. Nuan ulih pechayaka nya laban Iya udah nulung mayuh orang ngereja nya. (1 Kor. 10:13) Nya meh siti kebuah mimit aja orang dibuai ari raban gempuru Kristian. Jehovah nulung bala nembiak Iya ngambika mengkang tetap ati. Ketegal kitai enda sempurna, kitai bisi pengingin deka ngereja utai ti salah. (Jas. 1:14) Taja pia, nuan empu patut ngaga pemutus pasal utai ti deka dikereja nuan lebuh pengingin nya datai. Kebendar iya, nuan aja ke ulih ngawal chara nuan idup. Sekeda orang madah, kitai enda ulih ngawal asai ati enggau utai ke dikereja kitai. Tang utai nya bula. Nuan ulih belajar ngawal pengingin nuan ti salah. w24.03 5 ¶11-12