Penerang ke Bup Kereja Pengidup enggau Pengawa Kristian
© 2025 Watch Tower Bible and Tract Society of Pennsylvania
1-7 SEPTEMBER
RETA ARI BUP KUDUS JAKU-DALAM 29
Anang Nitihka Ajar tauka Adat ke Enda Bepelasarka Bup Kudus
Genera Pasal Sida Ke Di Serega
Baka orang jil ke ditanchang ngena rantai, bejuta iku mensia bedau lepas ari utai ti bula sereta takut ke bala antu ti jai. Sida ngena jimat, dinding bulu sereta pengaruh kena nyaga diri. Nuan enda ibuh ngereja semua nya. Bup Kudus madahka: ‘Jehovah ngemataka semua dunya, lalu meri pengering ngagai orang ke taluk ngagai Iya.’ (2 Bansa Israel 16:9) Jehovah, Petara ti bendar, ke bekuasa agi ari Sitan deka nyaga nuan enti nuan arapka Iya.
Kena bulih jaga ari Jehovah, nuan patut nemu utai ti ngelantangka ati Iya, lalu ngereja utai nya. Ngambika chunto, ba kurun keterubah, orang Kristian di Epesus ngumpul semua bup ke dikena bemanang, lalu nunu bup nya. (Kereja Rasul 19:19, 20) Pia mega, kena bulih jaga ari Petara, nuan enda tau enda munaska jimat, dinding bulu, engkeramba dikena muru antu, bup dikena bemanang, engkerabun sereta sebarang utai tauka pengawa bukai ke bekaul enggau bala antu.
Anang Dikemulaka Penemu ti Enda Betul Pasal Pemati
13 Enti nuan enda tentu nemu pasal siti-siti adat bekaul enggau pemati, besampi meh ngagai Jehovah lalu minta penemu-dalam ari Iya. (Bacha James 1:5.) Udah nya ngaga pansik ba litaricha kitai. Nuan mega tau nanya ngagai tuai gempuru ba eklisia nuan. Sida enda madahka utai ti patut digaga nuan, tang sida ulih madahka prinsip Bup Kudus ke ulih dikena. Lebuh nuan nitihka chara tu, nuan “matihka diri ngelala bida entara utai ti badas enggau utai ti jai.”—Heb. 5:14.
“Aku Diau Nitihka Pemendar Nuan”
12 Adat enggau pengawa ti enda dikerinduka Petara. Diri sebilik, orang ke enggau sama gawa, sereta orang ke sama sekula engka nguji deka mai kitai sama enggau sida ngintu pengerami baka parti hari pengada tauka ngintu hari besai. Nama ulih nulung kitai ngambika enda alah dibai nitihka adat sereta ngintu hari besai ke enda ngerinduka ati Jehovah? Kitai patut seruran ingatka kebuah Jehovah enda nerima hari besai nya. Kitai ulih ngiga pansik ba litaricha kitai sereta ngingatka diri empu baka ni sekeda hari besai nya berengkah. Lebuh belematika kebuah Bup Kudus enda ngasuh ngintu hari besai nya, kitai pechaya kitai nitihka ‘utai ti ngerinduka ati Tuan.’ (Eps. 5:10) Enti kitai arapka Jehovah enggau Jaku Iya, kitai enda nangika utai ti dipikir orang.—J-lam. 29:25.
Penemu Bup Kudus ti Berega
Tunjuk sereta Ayanka Pengerindu Ngena Pemendar enggau Pengawa ti Dikereja Kitai
11 Meri jaku puji ari ati. Giga peluang kena muji orang bukai. Semua kitai nemu, jaku puji nya “manah kena ngemansangka” pangan diri. (Eps. 4:29) Tang kitai deka nentuka utai ti disebut kitai nya ari ati lalu ukai jaku ke dikena ngelangkung orang bukai. Kitai enda nyebut utai ke enda patut tauka nyeliahka tanggung pengawa ari meri jaku lalau. (J-lam. 29:5) Kitai tentu orang ke pepura enti kitai muji orang bukai tang udah nya bejai sida ari belakang. Pengerindu rasul Paul nya amat. Lebuh iya nulis surat ngagai orang Kristian di Korint, iya muji pengawa manah ke digaga sida. (1 Kor. 11:2) Tang lebuh sida begunaka jaku lalau, iya nerangka kebuah nya enggau manah sereta terang ngagai sida.—1 Kor. 11:20-22.
8-14 SEPTEMBER
RETA ARI BUP KUDUS JAKU-DALAM 30
“Anang Ngasuh Aku Miskin tauka Kaya”
Nama Bansa Pengerindu ke Mai Pengelantang ti Bendar?
10 Semua kitai endang begunaka duit. Duit meri kita pengelikun. (P-jar. 7:12) Tang ulih kitai lantang ati enti sema kitai semina bisi mimit aja duit? Ulih! (Bacha Pengajar 5:12.) Agur anak Jakeh nulis: “Awakka aku ukai kaya tauka seranta. Nya alai, beri ngagai aku pemakai umbas ke guna aku.” Kitai ulih meretika kebuah lelaki tu enggai kelalu seranta. Iya madahka diri enggai bisi pengingin deka ngenchuri, laban ngenchuri ulih ngemaluka Petara. Tang nama kebuah iya enggai nyadi kaya? Ku iya nulis: “Enti aku diberi lebih ari nya, enggai ke aku ngumbai diri enda begunaka Nuan.” (J-lam. 30:8, 9) Nuan engka nemu bagi orang ke manggaika pengarap ba pengaya, ukai ba Petara.
11 Orang ke angkunka duit enda ulih ngelantangka ati Petara. Jesus madahka: ‘Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Petara enggau duit.’ Iya mega madahka: “Anang nyimpan pengaya ke diri empu di dunya, alai indu gegat enggau tegar deka ngerusak, lalu perumpak tama lalu ngenchuri, tang simpan pengaya ke diri empu di serega, alai indu gegat, enggau tegar enda ngerusak, lalu perumpak enda tama lalu ngenchuri.”—Mat. 6:19, 20, 24.
12 Mayuh ari nembiak Petara nguji deka ngembuan pengidup ti pengumbas iya. Sida nemu, ngereja nya meri sida mayuh agi awak gawa ke Jehovah sereta mega ngasuh sida lantang agi ati. Jack, ke diau di Amerika Serikat, nyual bisnis sereta rumah iya ti besai ngambika ulih ngerintis enggau bini iya. Ku iya nerangka: “Kami tusah deka ninggalka tanah sereta rumah kami ti manah ba menua kami.” Tang betaun-taun iya pulai ke rumah enggau ati ti lebu ketegal penanggul ba endur gawa. Ku iya madah: “Bini aku ke nyadi pengerintis biasa seruran lantang ati. Ku bini aku madahka, ‘Aku bisi tuke ti pemadu badas!’ Diatu aku mega nyadi pengerintis, kami duai gawa ke Orang ti sama, iya nya Jehovah.”
“Kati Nuan Rinduka Aku Lebih Ari Utai Tu?”
15 Mayuh orang kemaya hari tu ngasaika diri enda tau enda ngembuan gari, telefon, komputer, sereta utai bukai ti pemadu baru. Sida dikuingka pengingin angkunka reta, iya nya siti chara pengidup ke alai reta sereta duit nya beguna agi ari utai bukai. Ketegal nyadi orang Kristian, nama utai ti pemadu beguna ba nuan? Tanya diri empu: ‘Kati aku ngena mayuh agi jam berunding pasal kerita tauka pisin ti pemadu baru ari ke nyediaka utai ti dikena begempuru? Kati aku balat kisuk enggau pengawa besehari-hari nyentukka aku nadai mayuh awak dikena besampi tauka macha Bup Kudus?’ Enti kitai enda bejimat, pengerindu ke reta deka lebih agi ari pengerindu kitai ke Kristus. Kitai patut mikirka jaku Jesus: “Jaga diri ari semua macham pengamu.” (Luk. 12:15) Nama kebuah iya madah munyi nya?
16 Jesus madahka “nadai orang ulih betuaika dua iku tuan.” Ku iya agi: ‘Kita enda ulih betuaika Petara enggau duit [pengaya].’ Enti kitai betumpu ba reta, kitai enda ulih meri utai ti pemadu manah ke Jehovah. Jesus madahka, kitai deka “begedika siku, lalu rinduka siku, tauka angkunka siku.” (Mat. 6:24) Ketegal kitai enda sempurna, kitai enda tau enda terus ngelaban “pengingin tubuh,” nyengkaum angkunka reta.—Eps. 2:3.
17 Mayuh orang balat betumpu ba pengingin sereta pengelantang nyentukka sida ngasaika diri tusah deka ngembuan runding ti patut pasal reta. (Bacha 1 Korint 2:14.) Ketegal sida enda ulih berunding enggau manah, sida tusah deka nemu bida entara betul enggau salah. (Heb. 5:11-14) Pengingin sida ke reta majak balat-sebalat. Lalu mayuh agi reta ke diulih sida, bendar agi sida deka nambahka reta nya. (P-jar. 5:10) Tang bisi utai ke ulih digaga kitai kena ngelaban runding ke baka tu. Seruran macha Bup Kudus deka ngeringka kitai ngambika ulih nyeliah ari angkunka reta. (1 Pet. 2:2) Jesus belematika penemu-dalam ari Jehovah, lalu nya nulung iya nyeliahka penguji ke datai ari Sitan. (Mat. 4:8-10) Kemaya hari tu mega, enti kitai deka nyeliah ari angkunka reta, kitai patut nitihka penemu-dalam ari Jehovah. Tu deka nunjukka kitai rinduka Jesus lebih agi ari reta.
w11-E 6/1 10 ¶4
Baka Ni Nuan Ulih Bebelanja enggau Pintar?
Ngumpul duit dulu sebedau meli. Taja pan baka ke ketinggalan zaman, tang ngumpul duit dulu sebedau meli barang nya chara ti pemadu manah kena nyeliah ari penanggul ba duit. Mayuh orang udah ngereja tu. Ketegal nya, sida ulih nyeliah ari berutang sereta penusah ke bukai ke datai ari utang nya, baka bungai ti tinggi ke ulih ngujungka utai ti dibeli nya mar agi rega. Ba Bup Kudus, semut dikumbai “pintar” laban sida nemu “ngumpul pemakai maya musin ngetau” ngambika ulih dikena dudi hari.—Jaku-Dalam 6:6-8; 30:24, 25.
Nyadi meh Temuai Jehovah Belama Iya!
18 Endang manah enti kitai ulih meresa runding diri pasal duit. Tanya meh diri empu: ‘Kati aku selalu berunding pasal duit sereta utai ke ulih dibeli aku enggau duit nya? Enti aku minjau duit, kati aku lubah-lubah deka mayar utang nya laban aku ngumbai orang ke nyali duit ngagai aku enda begunaka duit nya? Kati aku ngumbai diri manah agi ari orang bukai ketegal aku bisi duit? Kati aku tusah deka ngayanka pengerah jari ngagai orang bukai? Kati aku ngumbai bala menyadi ke bisi mayuh duit rinduka duit lebih agi ari sida rinduka Jehovah? Kati aku semina bekaban enggau sida ke kaya, lalu enggai bekaban enggau sida ke miskin?’ Semua kitai udah nerima peluang ti spesial nyadi temuai Jehovah. Ngambika kitai ulih mengkang nyadi temuai Jehovah, kitai patut nentuka diri bibas ari pengerindu ke duit. Enggau nya, Jehovah enda sekali-kali ninggalka kitai!—Bacha Hebrew 13:5.
Penemu Bup Kudus ti Berega
g05-E 9/8 4 ¶1-2
Kerejasama—Utai ti Penting ba Alam Semulajadi
Tu semina sekeda ari mayuh chunto utai ba alam semulajadi ke bekerejasama. Endang amat, kitai ulih meda semua utai idup nyukung pangan diri, nyengkaum ari mikrob nyentuk ngagai mensia sereta spesis utai idup ti sama tauka ti bebida. Beribu taun kelia, Raja Solomon belajar pasal utai idup ba alam semulajadi. Iya beratika semut lalu madahka: “Orang ke ngelusu patut beratika chara semut idup. Sida nadai kepala, nadai pengulu, nadai raja, tang sida besimpanka pemakai lebuh musin panas, nyendiaka bekal nyadika penabat musin chelap.”—Jaku-Dalam 6:6-8.
Semut nya chunto ti manah ke nunjukka sifat kerejasama, rajin, teratur, sereta besaup mai utai ti besai agi ari tubuh sida. Sekeda semut indah nulung semut ti bakal tauka lelak pulai ngagai sarang sida. Ketegal semua sifat tu, nya meh kebuah Solomon ngasuh kitai neladan semut.
15-21 SEPTEMBER
RETA ARI BUP KUDUS JAKU-DALAM 31
Utai ke Ulih Dipelajar ari Jaku Lalau Siku Indai
Betul enggau Salah: Iring ke Ulih Nulung Kitai
4. Seks
Mayuh orang bisi runding ke enda sebaka pasal seks.
BUP KUDUS MADAH: ‘Seliahka ulah seks ti kamah. Tiap iku kita patut nemu nagang tubuh diri, ngambika kita mengkang kudus sereta dipebasa orang. Kita enda patut baka orang bansa bukai ke enda ngelala Petara, ke enda nemu puas nurutka pengingin seks ti enda ditagang.’—1 Tesalonika 4:3-5.
RETI IYA: Bup Kudus bisi natak chara kitai ulih ngayanka pengingin seks. Rambai jaku “ulah seks ti kamah” mega nyengkaum butang, nyundal, seks sebedau kawin, homoseksual, sereta seks enggau jelu. (1 Korint 6:9, 10) Pengawa seks siti pemeri ari Petara ke semina ngagai siku lelaki enggau siku indu ke udah jadi enggau pangan diri.—Jaku-Dalam 5:18, 19.
IRING ARI BUP KUDUS ULIH NULUNG: Ku siku indu ke asal ari Australia iya nya Kylie madahka, “Maya aku dara, aku berunding enti aku bisi hubungan seks sebedau kawin, nya ulih ngasuh aku berasai dikesayau sereta likun. Tang runding aku salah. Aku tusah ati sereta enda berasai likun.”
Udah nya, Kylie belajar lalu nitihka utai ke diajar Bup Kudus pasal seks. Iya madah, “Aku ulih meda standard Petara kena nyaga kitai ari penusah enggau pemedis. Diatu, aku berasai likun sereta dikesayau ketegal ngereja utai ke dikedekaka Jehovah ari kitai. Nitihka iring Bup Kudus udah nulung aku nyeliahka diri ari penusah ati.”
Berandau Pasal Ai Bisa enggau Bala Anak
Giga awak berandau enggau anak nuan. “Topik pasal ai bisa enda senang ba bala anak,” ku Mark, seiku apai ba Inggris. “Aku nanya anak aku ke beumur lapan taun, ba penemu iya, kati ngirup ai bisa nya salah? Aku nyadika randau kami nya enda kelalu tusah tauka terit, nya kebuah anak aku senang agi terus terang pasal penemu iya.”
Anak nuan ulih ingat pasal randau nya enti nuan suah berandauka topik nya. Tu tepulai ngagai umur anak nuan. Maya nuan berandauka topik bukai, baka pasal pemaik tauka pasal seks, nuan ulih nyelitka topik tu dalam randau kita.
Nyadika teladan ti manah ke sida. Baka span, anak mit senang sereta jampat nginsap tauka nitihka utai ke ngelingi sida. Nitihka pansik, bala anak jampat nitihka utai ke suah dikereja apai indai sida. Nya kebuah, enti nuan selalu ngirup ai bisa lebuh nuan benung tusah ati, anak nuan ngumbai ngirup ai bisa nya meh chara mutarka penanggul sida. Beri meh teladan ti manah ke bala anak nuan. Tentuka nuan enda kelalu mayuh ngirup ai bisa.
g17.6-E 9 ¶5
Ajar Anak Nuan Baruh Ati
Meransang sida meri. Ayanka ngagai anak nuan, “orang ke meri deka gaga agi ati ari orang ke nerima.” (Surat Kereja Rasul 20:35) Baka ni nuan ulih ngereja nya? Engka seduai ulih begulai ngaga siti lis pasal orang ke begunaka bantu bebelika barang, beranjung, tauka tulung kena ngerepair utai. Udah nya, bai meh anak nuan seraya nuan nulung sekeda ari sida ke dalam lis nya. Awakka anak nuan meda pengaga ati sereta pemuas ati nuan lebuh nuan nulung sida. Enggau chara nya, nuan ulih ngajar anak nuan pemaruh ati enggau chara ti pemadu manah, iya nya nengah teladan nuan.—Prinsip Bup Kudus: Luke 6:38.
Penemu Bup Kudus ti Berega
Kita ke Laki, Bebasaka meh Bini Kita
16 Padah ngagai bini nuan, iya amat berega ba nuan. Laki ke bebasaka bini deka madahka utai ti dikerinduka iya pasal bini iya sereta meransang bini iya. Siti chara iya ulih ngereja tu, iya nya madahka terima kasih ngagai bini iya ke udah mayuh nulung iya. (Kol. 3:15) Lebuh laki madah utai ti dikerindu iya pasal bini iya, bini deka berasai dikesayau sereta dipebasa.—J-lam. 31:28.
22-28 SEPTEMBER
RETA ARI BUP KUDUS PENGAJAR 1-2
Terus Ngelatih Generasi ke Nangkanka Tu
Serahka Tanggung Pengawa Ngagai Orang ke Tetap Ati
3 Kitai rindu gawa ke Jehovah sereta beterima kasih ke pengawa kitai. Mayuh ari kitai rinduka pengawa teokratik nyentukka kitai ngarapka diri ulih terus ngereja pengawa nya seagi-agi kitai ulih ngereja iya. Tang lebuh orang mansang tuai, sida enda ulih ngereja semua utai ke kala dikereja sida lebuh sida agi biak. (P-jar. 1:4) Tu nyadi penanggul ba nembiak Jehovah. Kemaya hari tu, pengawa nginjil majak mansang, lalu gerempung Jehovah ngena teknologi moden ngenataika berita manah ngagai mayuh agi orang. Tang kekadang, sida ke tuai tusah deka belajarka chara baru ngereja pengawa. (Luk. 5:39) Pia mega, lebuh orang mansang tuai, sida deka lenyau pengering. (J-lam. 20:29) Nya alai, sida ke tuai mandangka pengerindu sereta meri bantu ti beguna enti sida ngelatih sida ke biak megai mayuh agi tanggung pengawa ba gerempung Jehovah.—Bacha Masmur 71:18.
4 Endang enda senang ba orang ke ngembuan kuasa meri pengawa ngagai bala lelaki ke biak. Tu ulih ngasuh menyadi Kristian ke lelaki tusah ati mikirka pasal diri ke ngelengkaka pengawa ti balat dikerinduka sida. Sida mega berasai tusah ati ngenang pasal ngelepaska pengawa spesial ti dikerindu sida. Tauka sida irau enti sida enda ngulu ba pengawa nya, pengawa nya enda ulih mujur. Sida engka ngasaika diri nadai awak ngelatih orang bukai. Pia mega, bala lelaki ke biak patut sabar enti sida enda diberi mayuh agi tanggung pengawa.
Penemu Bup Kudus ti Berega
Kita ke Biak, Penempa Deka Kita Gaga Ati
14 Solomon nya seiku ari orang ke pemadu kaya sereta bekuasa. Iya nguji deka nemu siti utai. Ku iya: “Aku keran deka nemu utai ti dikumbai pengelantang.” (P-jar. 2:1-10) Nya alai Solomon nirika rumah ti besai, ngaga kebun sereta taman ti manah, lalu ngereja sebarang utai ti dikedekaka iya. Kati iya berasai puas sereta gaga? Lebuh Solomon ngenang pasal semua utai ti dikemisi iya, ku iya madah: “Aku nemu, utai nya nadai reti sekali-kali.” Ku iya agi: “Sigi nadai guna sekali-kali.” (P-jar. 2:11) Kati nuan ulih belajar ari utai ti deka ditemu Solomon?
29 SEPTEMBER–5 OKTOBER
RETA ARI BUP KUDUS PENGAJAR 3-4
Tegapka meh Tikah Nuan
Tentuka Teknologi Ukai Utai Dikemeratka
● Ngena teknologi enggau chara ti manah ulih meri penguntung ba tikah. Ngambika chunto, sekeda laki-bini ulih begigaka pangan diri lebuh sida ba endur bukai.
“Mesej ke pandak ti madah, ‘Aku sayauka nuan’ tauka, ‘Aku enda betah nuan’ ulih ngasuh nuan enggau kaling nuan semak agi.”—Jonathan.
● Enti teknologi dikena enggau chara ti salah, nya ulih ngerusak tikah. Ngambika chunto, sekeda orang kelalu mayuh awak ngena perengka elektronik lalu masau jam tauka maya ke patut dikena sida enggau kaling pengidup.
“Tentu bisi maya lebuh laki aku ka agi bejaku enggau aku enti aku enda ngena talipun.”—Julissa.
● Sekeda orang ngumbai, sida ulih berandauka utai ti beguna enggau kaling pengidup ba maya ti sama maya sida meda perengka elektronik. Orang ke baka nya ngumbai, sida ulih ngereja utai lebih ari siti ba maya ti sama enggau manah. Tang, nitihka pakar sosial ke benama Sherry Turkle, nya enda ulih dikereja. Taja pan orang ngumbai ‘pengelandik’ nya manah, tang penemu nya salah. Ku iya, iya ke amat, ‘mayuh agi utai ti dikereja kitai ba maya ti sama, mayuh agi penyalah ke digaga kitai.’
“Nyamai amat berandau enggau laki aku, tang ukai maya iya ngereja mayuh utai bukai. Lebuh iya ngereja mayuh utai, nya ngasuh aku ngasaika iya enda ibuh sekalika aku bisi tauka nadai ba dia.”—Sarah.
Batang ajar: Chara nuan ngena teknologi ulih nulung tauka ngerusak tikah nuan.
Tentuka “Daun Api Jehovah” Mengkang Mau
12 Baka ni laki bini ulih neladan Akuila enggau Prisila? Perundingka pasal mayuh utai ke patut digaga nuan enggau kaling pengidup nuan. Kati seduai ulih ngereja nya begulai ari ke ngereja nya kediri? Ambika chunto, Akuila enggau Prisila nginjil begulai. Kati nuan suah ngaga pelan ngambika ulih nginjil begulai mega? Akuila enggau Prisila mega gawa begulai. Nuan enggau kaling pengidup nuan engka bisi kereja sekular ti bebida, tang kati seduai ulih ngaga kereja ba rumah begulai? (P-jar. 4:9) Lebuh seduai nulung pangan diri nembuka sesiti pengawa, seduai deka ngasaika diri baka siti tim lalu bisi peluang bejaku enggau pangan diri. Robert enggau Linda udah kawin lebih ari 50 taun. Ku Robert madah: “Kebendar iya, kami duai nadai mayuh awak begulai ba pengawa rekreasi. Tang lebuh aku nuchi pinggai lalu bini aku ngelap pinggai, tauka lebuh aku gawa ba kebun lalu Linda datai nulung aku, aku berasai amat gaga ati. Lebuh kami ngereja utai begulai, kaul kami rapat agi. Pengerindu kami duai ke pangan diri majak dalam.”
13 Taja pia, kingatka, lebuh laki bini begulai enggau pangan diri, nya enda seruran mai reti seduai iya deka majak rapat enggau pangan diri. Siku bini ari Brazil madahka: “Kemayaharitu, pengidup kitai amat sibuk, kitai senang ngumbai kitai benung begulai enggau pangan diri laban kitai diau ba rumah ti sama. Tang aku belajar bisi mayuh agi utai ke patut dikereja ari ke semina diau begulai. Aku mega patut meri perhatian ngagai utai ke diguna kaling pengidup aku.” Peratika baka ni Bruno enggau bini iya, Tays, nentuka diri meri perhatian ngagai pangan diri. Ku Bruno madahka: “Lebuh kami ngena awak begulai, kami enda meda telefon tang kami ngena awak nya begulai enggau pangan diri.”
14 Taja pia, baka ni enti nuan enggau kaling pengidup nuan enda rindu ngereja utai begulai? Seduai engka bisi minat ti enda sama, tauka seduai mega engka bisi ngereja utai ti enda entu dikerinduka pangan diri. Nama ulih digaga nuan? Peratika baru api ti disebut ba pun tadi. Lebuh api nya diidupka, iya enda terus mau. Nuan patut belubah-lubah nepu kayu ti besai agi ngagai api nya. Baka nya mega, nuan ulih ngena mimit awak ninting hari ngereja utai begulai enggau pangan diri. Kereja meh utai ti ngerinduka ati seduai, ukai utai ke ngasuh siku ari seduai ringat ngagai pangan diri. (Jas. 3:18) Lebuh seduai berengkah ngena mimit awak ke pangan diri, nyau kelama seduai ulih meda pengerindu seduai ke pangan diri deka majak dalam baru.
Tentuka “Daun Api Jehovah” Mengkang Mau
3 Ngambika “daun api Jehovah” mengkang mau, laki bini patut bebendar ngembuan kaul ti tegap enggau Jehovah. Baka ni kaul ti tegap enggau Jehovah nulung laki bini? Lebuh laki bini ngumbai kaul seduai iya enggau Jehovah amat penting, seduai iya deka keran nitihka jaku lalau ari Iya. Tu deka nulung laki bini nyeliah sereta mutarka penanggul ke ulih ngasuh pengerindu seduai iya nyadi chelap. (Bacha Pengajar 4:12.) Sida ke bisi kaul ti tegap enggau Jehovah mega deka bebendar neladan Iya sereta ngemansangka sifat ke diayanka Iya baka pemanah ati, penyabar, sereta sanggup ngampun. (Eps. 4:32–5:1) Lebuh laki bini ngayanka sifat ke baka tu, pengerindu seduai iya deka senang agi mau. Lena, siku menyadi indu ke udah kawin pengelama lebih ari 25 taun, madahka, “Senang agi deka rindu sereta bebasaka orang ke bisi kaul ti tegap enggau Jehovah.”
Penemu Bup Kudus ti Berega
Terus Nyembah Jehovah Taja Pan Ditagang Perintah
14 Bejimat lebuh bekunsika penerang. Lebuh pengawa kitai ditagang, kitai patut nemu ni “maya enda bemunyi.” (P-jar. 3:7) Kitai patut ngelindung penerang ti patut dilalaika baka nama bala menyadi Kristian kitai, endur begempuru, chara nginjil, sereta chara kitai nerima utai ti ngeringka pengarap. Kitai tentu enggai madahka utai tu ngagai piak bekuasa tauka bekunsika nya enggau bala bakih tauka kaban belayan ba menua kitai tauka ba menua bukai. Enti kitai enda nitihka atur tu, kitai deka ngenusahka bala menyadi Kristian kitai.—Bacha Masmur 39:1.
6-12 OKTOBER
RETA ARI BUP KUDUS PENGAJAR 5-6
Baka Ni Kitai Ngayanka Basa ti Besai ngagai Petara Kitai ti Pemadu Bekuasa
Nama Kebuah Gari enggau Chara Kitai Begari Nya Beguna
1. Nama sekeda prinsip ke ulih nulung kitai ngaga pemutus bekaul enggau gari sereta chara kitai begari?
Bup Kudus madahka, kitai patut “begari penumbas iya sereta menyana, ngena gari ti patut,” sereta seruran beresi ngambika orang ulih meda nuan nya ‘nangika Petara.’ (1 Timoti 2:9, 10) Aram kitai meda empat iti prinsip ari ayat tu: (1) Baka ke dipeda nuan ba gempuru, semua kitai bisi chara begari ti bebida, tang kitai patut nentuka gari sereta gaya buk kitai “menyana” sereta nunjukka basa ngagai Petara Jehovah. (2) Chara begari ti “penumbas iya” mai reti kitai nyeliah ari ngena gari tauka gaya gari ti seksi, tauka minta diri dipeda orang. (3) Enti kitai ngena gari ti menyana, kitai enda nitihka tiap iti gaya tauka ngena pisin ti dikerinduka orang kemayaharitu. (4) Chara kitai begari nunjukka kitai semina nyembah Petara ti bendar.—1 Korint 10:31.
Beterima Kasihka Peluang Nuan ti Ulih Besampi
18 Seiku menyadi lelaki engka diasuh besampi ba gempuru sebedau nginjil tauka ba gempuru kebukai ba eklisia. Bala menyadi lelaki ke bisi peluang ngereja nya patut ingat nama tuju gempuru nya. Sampi enda patut dikena ngemetulka tauka ngajar eklisia, tauka ngaga jaku gerah. Ba mayuh gempuru, timpuh lima minit udah diatur ke lagu enggau sampi. Nyadi, menyadi lelaki ke besampi nya enda ibuh ngena “mayuh macham leka jaku,” kelebih agi enti nya sampi pemuka ke gempuru.—Mat. 6:7.
“Kereja Aja Utai ti Disemaya Nuan”
12 Lebuh nuan dibaptisa, nuan besemaya enggau Jehovah deka ngena pengidup nuan gawa ke Iya sereta enggau naka ulih nitihka standard Iya. Tang baptisa nya semina pun aja. Nyau kelama, semua kitai patut meresa diri empu. Kitai tau nanya: ‘Baka ni pemansang kaul aku enggau Jehovah pengudah aku dibaptisa? Kati aku agi gawa ke Iya enggau pengabis ati? (Kol. 3:23) Kati aku suah besampi? Kati aku macha Bup Kudus ninting hari? Kati aku datai begempuru enggau tetap? Kati aku enggau naka ulih nginjil enggau tetap? Tauka kati aku nyau enda entu ransing ba semua pekara tu?’ Rasul Peter nangkan kitai nyeliahka diri ari enda aktif ba pengawa ke Jehovah. Kitai ulih nyeliahka tu enti kitai bebendar mansang ba pengarap, ba penemu, ngembuan ati ti tan sereta ati ti nangika Petara.—Bacha 2 Peter 1:5-8.
Penemu Bup Kudus ti Berega
Tanya Ari Pemacha
Ayat ba bup Pengajar 5:8 madah pasal perintah ti enda lurus sereta nekan pengidup orang ke seranta. Taja pia, pemesai nya patut ingat, bisi orang ke tinggi pangkat tauka bekuasa agi ke benung meratika pengawa iya. Lalu, engka mega agi bisi orang bukai ke tinggi agi pangkat. Tang sayau amat, ba perintah mensia, nyauka semua pemesai makai suap sereta enda lurus. Ketegal nya orang biasa suah merinsa.
Tang enda ngira pemalat utai ke nyadi, kitai ulih berasai lantang laban nemu “genap iku pemesai endang dijaga” tauka diberatika Jehovah. Kitai ulih minta saup ari Petara lalu nyerahka penusah kitai ngagai Iya. (Mas. 55:22; Plp. 4:6, 7) Kitai nemu ‘Jehovah ngemataka semua dunya, lalu meri pengering ngagai orang ke taluk ngagai Iya.’—2 Ban. 16:9.
Nya alai, Pengajar 5:8 ngingatka kitai pemendar pasal perintah mensia, iya nya seruran deka bisi orang ke bekuasa agi. Tang ke pemadu beguna, ayat nya nulung kitai nemu Jehovah nya Pemadu Tinggi. Diatu Iya merintah nengah Anak Iya, Jesus Kristus, Raja ba Perintah Petara. Jehovah, Petara ti Pemadu Bekuasa, beratika semua utai, lalu Iya lurus sereta enda bepilih mata. Anak Iya mega deka ngereja utai ti sama.
13-19 OKTOBER
RETA ARI BUP KUDUS PENGAJAR 7-8
“Ngagai Rumah Orang ke Balat Tusah Ati”
“Nyabak Enggau Orang ke Nyabak”
12 Orang ke tusah ati mega tau bulih pengelantang ba ati dalam eklisia Kristian. (Bacha 1 Tesalonika 5:11.) Baka ni nuan ulih ngering sereta ngelantangka ati orang ke ngembuan “ati ti selalu tusah”? (J-lam. 17:22) Kingatka, bisi “maya enda bemunyi enggau maya bejaku.” (P-jar. 3:7) Seiku indu balu ke benama Dalene madahka, orang ke tusah ati patut mantaika runding sereta asai ati diri. Nya alai, utai ti pemadu beguna ke ulih digaga nuan iya nya mending dulu lalu anang guai bejaku. Junia, ke mati menyadi lelaki ti tuai ari iya ketegal munuh diri, madahka, “Taja pan nuan enda entu ulih amat meretika penusah ba ati sida, utai ti beguna iya nya nuan deka meretika asai ati sida.”
Nulung Sida ke Napi Penusah ba Pengidup
15 Bini William udah nadai beberapa taun ti udah. Ku William madahka: “Aku rindu ninga lebuh orang bukai ngenang utai ti manah pasal bini aku. Tu nulung aku nemu, iya dikerindu sereta dipebasa orang. Tulung ke baka tu amat beguna ba aku. Jaku sida balat ngelantangka ati aku laban bini aku berega ba aku lalu besai reti ba pengidup aku.” Seiku indu balu ke benama Bianca madahka: “Aku bulih pengelantang lebuh orang bukai besampi tauka bekunsika ayat Bup Kudus enggau aku. Aku mega bulih pengelantang lebuh sida ngenang pasal laki aku sereta lebuh sida mendingka aku maya aku ngenang iya.”
“Nyabak Enggau Orang ke Nyabak”
16 Sampi kitai ulih nulung bala menyadi Kristian kitai ke benung tusah ati. Kitai ulih besampi ke sida tauka besampi enggau sida. Taja pan tusah deka ngereja nya laban nuan engka ngasaika diri deka nyabak, sampi nuan ke ari ati amat ulih ngelantangka ati. Ku Dalene ngenang: “Kekadang lebuh menyadi Kristian indu datai ngelantangka ati aku, aku nanya sekalika sida deka besampi. Lebuh berengkah besampi, sida tusah deka nyebut leka sampi, tang tiap kali pengudah beberapa ayat, munyi nyawa sida majak inggar lalu nyebut sampi ti amat ari ati. Pengarap, pengerindu, sereta pengibuh sida ti teguh amat ngeringka pengarap.”
“Nyabak Enggau Orang ke Nyabak”
17 Tusah deka nemu enggau nyemetak ni pengelama seiku-seiku orang mengkang tusah ati. Lebuh orang ti dikesayauka mati, terubah iya mayuh bala pangan sereta kaban belayan bisi ngelantangka ati. Tang pengudah sida nyau berengkah kisuk enggau pengidup besehari-hari, orang ke benung tusah ati agi begunaka pengelantang ba ati. Nya alai sedia meh nulung. “Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?” (J-lam. 17:17) Kitai patut ngelantangka ati orang ke tusah seagi-agi sida begunaka kitai.—Bacha 1 Tesalonika 3:7.
18 Anang enda ingat, orang ulih ngenyit berasai tusah ati ba sebarang maya. Tu engka ketegal ulang taun pengawa jadi melaki-bini, sekeda musik, gambar, pengawa, tauka bau, bunyi, tauka musin ba taun nya. Lebuh bini tauka laki ke udah mati kaling pengidup ngereja siti-siti utai kediri keterubah iya, baka datai ngagai gempuru besai tauka Ngingatka Pemati Jesus, tu amat ulih ngasuh berasai merinsa. Ku seiku menyadi Kristian lelaki ke udah mati bini madahka: “Aku ngumbai ulang taun keterubah pengawa jadi melaki-bini nya utai ti balat ngenusahka ati sereta enda senang. Tang beberapa iku bala menyadi Kristian ngatur siti pengawa beserumpu makai ti enda besai enggau bala pangan ke pemadu rapat enggau aku ngambika aku enda berasai sunyi.”
19 Kingatka, orang ke tusah ati ukai semina begunaka jaku peransang ba siti-siti maya aja. Junia madahka: “Kesuah agi bantu sereta kaul ke diberi taja pan ukai ba maya siti-siti ulang taun, lebih agi beguna. Pengawa ke enda diatur nya deka berega agi sereta ngenataika mayuh agi pengelantang ba ati.” Amat, kitai enda ulih muai semua penusah ba ati tauka asai ati ti sunyi ba sida, tang kitai ulih ngelantangka ati sida ke tusah enti ngereja utai ke sida. (1 Jhn. 3:18) Gaby madahka: “Aku amat beterima kasih ngagai Jehovah laban bala tuai gempuru ke ngembuan pengerindu nulung napi tiap iti penanggul. Sida amat ngasuh aku ngasaika Jehovah nulung aku.”
Penemu Bup Kudus ti Berega
“Semua Orang Deka Nemu Kita meh Murid Aku”
18 Kekadang kitai engka ngasaika diri patut bejaku enggau siku menyadi Kristian ke udah ngemediska ati kitai. Tang keterubah iya, kitai patut nanya diri empu sekeda tanya tu: ‘Kati aku nemu semua utai ke nyadi?’ (J-lam. 18:13) ‘Kati iya sengaja deka ngemediska ati aku?’ (P-jar. 7:20) ‘Kati aku kala ngereja penyalah ti sama?’ (P-jar. 7:21, 22) ‘Enti aku bejaku enggau iya pasal utai tu, kati penanggul nya deka nyadi balat agi?’ (Bacha Jaku Dalam 26:20.) Lebuh kitai ngena awak berundingka tanya tu, kitai engka sedar pengerindu ulih meransang kitai badu agi berunding pasal utai ke udah nyadi.
20-26 OKTOBER
RETA ARI BUP KUDUS PENGAJAR 9-10
Ngembuan Runding ti Betul pasal Penguji Nuan
Jehovah Benung Nulung Nuan Mujur
4 Bup Kudus madahka: “Utai ti jai endang tau nyadi ba genap iku orang.” (P-jar. 9:11) Kitai kekadang napi penanggul “ke biasa ditapi orang.” (1 Kor. 10:13) Tauka kitai engka napi penanggul ketegal kitai nyadi murid Jesus. Ambika chunto, kitai engka disakal, dipechat, tauka diperinsa ketegal pengarap kitai. (2 Tim. 3:12) Enda ngira nama penanggul ke ditapi nuan, Jehovah ulih ngasuh nuan mujur. Iya mega bisi ngereja utai tu ke Josep. Baka ni chara iya?
Jehovah Rinduka Nembiak Iya ti Baruh Ati
10 Ulah ti baruh ati mega ngasuh pengidup kitai lantang. Kadang-kadang kitai meda tauka napi utai ke enda lurus. Raja Solomon ke bepenemu-dalam madahka: “Aku bisi udah tepedaka ulun nepan kuda, tang orang ke tinggi pangkat bejalai kaki baka ulun.” (P-jar. 10:7) Kadang-kadang orang ke bisi pengelandik enda bulih puji. Tang orang ke nadai tentu bisi pengelandik bulih mayuh puji. Taja pia Solomon nemu, kitai patut nerima utai ke nyadi ba kitai lalu anang kelalu irau ke utai nya. (P-jar. 6:9) Enti kitai baruh ati, kitai deka senang agi nerima utai ke nyadi ba pengidup taja pan kitai enda tentu rindu enggau utai nya.
Belematika Pengerindu Jehovah ti Meruan
4 Lebuh kitai meda utai ti digaga Jehovah, kitai nemu Iya balat rinduka kitai. (Rom. 1:20) Chunto, Jehovah ngaga dunya ukai semina endur kitai diau aja. Iya udah meri kitai semua utai ti diguna kena idup enggau lantang. Jehovah udah meri mayuh macham pemakai ke diempa kitai. Tu amat ngagaka ati kitai! (P-jar. 9:7) Seiku menyadi Kristian indu ke benama Catherine rindu ati meda utai ti digaga Jehovah, kelebih agi maya musin bungai ba menua Kanada. Ku iya: “Endang amat ngalitka ati meda semua utai pulai baru baka selama—bungai nyumbuk baru ari tanah, lalu burung pulai ari endur sida ke mindah, nyengkaum burung mit ke dikumbai hummingbird pulai baru ngagai endur pemakai iya ke ba luar jenila dapur aku. Jehovah endang rinduka kitai laban Iya meri mayuh utai ti ngerinduka ati.” Apai kitai rinduka utai ti digaga Iya, lalu Iya mega deka kitai rindu ati enggau utai ti digaga Iya.—SKR. 14:16, 17.
Penemu Bup Kudus ti Berega
Nama Nyadi Pengudah Kitai Mati?
1. Nama nyadi lebuh kitai mati?
Jesus nyemaka orang ke udah mati baka orang ke tinduk jenak. Lebuh orang tinduk jenak, iya enda nemu pasal utai ke nyadi ngelingi iya. Pia mega Bup Kudus madah, “Orang ke mati nadai nemu utai.” (Bacha Pengajar 9:5.) Sida enda sunyi tauka ngasaika pemedis.
27 OKTOBER–2 NOVEMBER
RETA ARI BUP KUDUS PENGAJAR 11-12
Idup enggau Lantang sereta Gerai
Kena Utai ti Ditempa Ngajar Anak Nuan pasal Jehovah
16 Utai ti ditempa Jehovah nyediaka chara ngambika ruang bilik ulih rileks sereta gaga ati. Enggau nya, sida ulih rindu agi ke pangan diri. Bup Kudus madahka, bisi “maya gaga” sereta “maya betanda.” (P-jar. 3:1, 4) Jehovah udah nempa mayuh endur ti manah ba dunya tu alai kitai ngereja utai ti dikerinduka kitai. Mayuh ruang bilik rindu begulai ngagai gua, sungai, tauka tebing tasik. Sekeda bala anak rindu belanda tauka bemain ba taman, meda jelu, tauka mandi ba sungai, tasik, tauka ai wong. Kitai bisi mayuh peluang ngelantangka ati diri enggau alam semula jadi, sereta utai bukai ke ditempa Jehovah!
Beterima Kasihka Pemeri Pengidup ti Diberi Petara
6 Taja pan Bup Kudus ukai bup ke madah pasal chara nyaga pengerai tauka nama utai ti patut diempa, tang iya bisi madah mayuh utai pasal runding Jehovah bekaul enggau utai tu. Ambika chunto, Bup Kudus meransang kitai enda “nejuka sebarang utai . . . ngemediska” pengerai kitai. (P-jar. 11:10) Bup Kudus madahka kitai enda patut kelalu mayuh makai tauka ngirup kelalu mayuh ai bisa. Utai tu ulih ngachau pengerai kitai, indah munuh kitai. (J-lam. 23:20) Jehovah ngarapka kitai ulih nagang diri lebuh milih nama utai ti deka diempa tauka diirup, sereta penyampau utai nya.—1 Kor. 6:12; 9:25.
7 Kitai ulih ngena runding kitai ti bepenemu-dalam kena ngaga pemutus ti nunjukka kitai amat beterima kasihka pemeri pengidup ke diberi Petara. (Mas. 119:99, 100; bacha Jaku Dalam 2:11.) Ambika chunto, kitai deka ngaga pemutus ti manah bekaul enggau utai ti deka diempa kitai. Enti kitai rinduka sesiti pemakai, tang pemakai nya ngasuh kitai sakit, kitai patut nentuka diri enda makai pemakai nya. Kitai mega nunjukka diri nemu berunding lebuh kitai tinduk enggau chukup, suah eksesais, sereta nyaga pemeresi ba tubuh sereta rumah kitai.
Kereja Utai Nitihka Jaku Petara
2 Bala nembiak Jehovah orang ti gaga ati. Nama kebuah? Kitai bisi mayuh kebuah gaga ati. Tang siti kebuah ti penting, iya nya kitai seruran macha Jaku Petara sereta bebendar ngena utai ti dipelajar ba pengidup.—Bacha James 1:22-25.
3 Bisi sekeda penguntung ke diulih kitai lebuh kitai ngereja utai nitihka Jaku Petara. Ambika chunto, lebuh kitai nitihka utai ti dipelajar ari Jaku Petara, kitai ngagaka ati Jehovah. Lalu nya mega deka ngasuh kitai gaga ati. (P-jar. 12:13) Pia mega, lebuh kitai nitihka jaku lalau dalam Bup Kudus, kitai ulih ngemanahka agi kaul kitai enggau diri sebilik sereta bala menyadi ba raban gempuru. Engka nuan empu udah ngasaika penguntung tu. Kelimpah ari nya, kitai mega ulih nyeliah ari penanggul ke ditapi orang ke enda ngasika pesan Jehovah. Nya meh utai ke dipadah Raja David. Pengudah nyebut pasal adat enggau atur Jehovah, David madahka: “Aku diupah ketegal ngasika utai nya.”—Mas. 19:7-11.
Penemu Bup Kudus ti Berega
Jehovah Rinduka Sida ke “Bebuah Enggau Ati ti Liat Sereta Tan”
16 Kitai patut ingat pengawa nginjil kitai ulih meri ubah ti besai ba orang, taja pan orang nya baka ke enggai ninga. (Bacha Pengajar 11:6 ari nota kaki.) Orang beratika kitai. Sida meda kitai begari enggau kemas, kitai bisi basa sereta deka begulai enggau orang. Tu ulih narit ati sida, lalu nyau kelama, indah orang ke kala bisi runding ti enda manah pasal kitai nyau bisi runding ti manah. Sergio seduai Olinda ngasaika tu amat.
17 Ku Sergio madahka: “Sekumbang ke enda tentu dapat, kami duai nadai ngagai padang enda lama. Lebuh kami duai nginjil baru, orang ke mansa nanya, ‘Kini penunga seduai. Kami lelengauka seduai.’” Olinda nyaut enggau tuchum: “Bala ke deriba bas ngepaika jari ngagai kami duai lalu sekeda nya nyebut enggau nyawa ti inggar ari endur sida deriba. ‘Gaga ati meda seduai datai baru!’ Sida mega minta majalah kitai.” Sergio seduai Olinda amat tekenyit lebuh seiku lelaki datai ngagai troli pemandang litaricha seduai iya, meri bungai, lalu beterima kasih ke pengawa seduai iya.
18 Seagi-agi nuan ‘enda belelak’ madah pasal Perintah Petara ngagai orang, nuan bisi ungkup ti besai dalam meri “saksi ngagai semua bansa.” (Mat. 24:14) Kelebih agi, nuan deka bulih pengaga ti besai laban nemu diri ngagaka ati Jehovah. Iya rinduka semua orang ke “bebuah enggau ati ti liat sereta tan”!