Kemaya Pengujung Dunya Datai? Peratika Saut Jesus

PERATIKA UTAI KE DISEBUT JESUS PASAL PENGUJUNG DUNYA:

“Nya alai bejaga kita, laban kita enda nemu hari tauka jam.”​—MATTHEW 25:13.

“Bejaga, besedia, laban kita enda nemu kemaya hari nya deka datai.”​—MARK 13:33.

Nyadi, nadai orang ulih madah enggau nyemetak kemaya utai ke jai ba dunya tu deka dirusak. Tang Petara udah nentuka “hari tauka jam” pengujung dunya. (Matthew 24:36) Kati tu reti iya kitai enda nemu kemaya pengujung dunya tu datai? Enda. Jesus udah madahka bala murid iya tanda ba pengujung dunya.

TANDA PENGUJUNG DUNYA

Lebuh nyebut pasal tanda “pengujung dunya,” Jesus madahka: “Bansa siti deka beperang ngelaban bansa siti, lalu menua siti deka beperang ngelaban menua siti, lalu lapar pungkang enggau tanah berenyang deka nyadi ba mayuh bengkah endur.” (Matthew 24:3, 7) Jesus mega madah, mayuh penyakit sereta penyakit berampit deka nyadi. (Luke 21:11) Kati nuan bisi meda tanda-tanda ke disebut Jesus tu nyadi?

Perang, lapar pungkang, tanah berenyang sereta mayuh macham penyakit udah nyadi kemayaharitu. Chunto iya, ba taun 2004, bisi siti tanah berenyang ke balat nyadi ba Lautan Hindi, lalu ngujungka Tsunami ti udah nabanka dalam urung 225,000 iku nyawa. Dalam tiga taun, penyakit berampit iya nya COVID-19, udah munuh dalam urung 6.9 juta nyawa ba serata dunya. Jesus madah, semua utai ke nyadi tu nunjukka pengujung dunya nyau semak.

“HARI TI PENUDI”

Bup Kudus madahka, timpuh sebedau “pengujung dunya” datai, disebut “hari ti penudi.” (2 Peter 3:3, 4) Ba 2 Timoti 3:1-5 nerangka, mayuh orang ba hari ti penudi enda beradat. (Peda kutak, “Sebedau Pengujung Dunya.”) Kati nuan setuju, kemayaharitu orang semina berundingka diri empu aja, amu, mangah, sereta nadai pengerindu? Semua bukti tu nunjukka, pengujung dunya udah semak.

Ni pengelama timpuh “hari ti penudi”? Bup Kudus madahka, timpuh tu “nyau deka abis.” Enda lama da agi, Petara deka “ngerusak sida ke nyadi pengerusak dunya!”—Pemandang 11:15-18; 12:12.

DUNYA PARADAIS NYAU SEMAK!

Petara udah nentuka hari enggau jam Iya kena ngakim dunya ke jai tu. (Matthew 24:36) Tang, “Iya enggai nejuka indah siku kita dirusak.” (2 Peter 3:9) Iya deka kitai diselamatka lebuh dunya tu diakim, lalu idup ba dunya Paradais. Nya alai, Iya meri kitai peluang belajar lalu ngasika pesan Iya.

Kena ngereja nya, Petara udah ngatur program ngajar orang ba serata dunya, ngambika sida ulih idup ba dunya baru ke dipegai Perintah Iya. Jesus madah, Berita Manah pasal Perintah Petara deka ditusui “di serata dunya.” (Matthew 24:14) Ba serata dunya, Saksi-Saksi Jehovah ngena bejuta jam ba pengawa nginjil enggau ngajar orang pasal pengadang ke bisi dalam Bup Kudus. Jesus madahka, pengawa tu deka digaga ba serata dunya sebedau pengujung dunya datai.

Perintah mensia deka nadai agi. Tang, bisi berita manah: Nuan ulih diselamatka maya pengujung dunya, sereta idup ba dunya Paradais ke disemayaka Petara. Artikel pengudah tu deka nerangka utai ke patut digaga nuan, ngambika bulih berekat tu.