Kati Nuan “Sedia Deka Ngasi”?

1. Nama kebuah kitai kekadang tusah deka ngasi?

KATI nuan kekadang tusah deka ngasi? Raja David kala berasai baka nya. Nyadi, iya besampi ngagai Petara: “Asuh aku rajin [‘keran,’ NWT] ngasika Nuan.” (Mas. 51:12) David rinduka Jehovah. Taja pia, bisi maya iya David tusah deka ngasi. Engka nuan mega kala berasai baka nya. Nama kebuah? Kesatu, kitai enda sempurna. Nyadi, kitai bisi pengingin deka ngelaban. Kedua, Sitan suah nguji ngasuh kitai angkat ngelaban Jehovah, baka ke udah digaga iya. (2 Kor. 11:3) Ketiga, kitai dikelingi mayuh orang ke udu ngelaban. Tu “runding enggau ulah ke benung nguasa orang ke enda ngasi.” (Eps. 2:2) Nya alai, kitai mesti bebendar belaban enggau diri kitai ti enda sempurna, Sitan, sereta dunya tu, ngambika kitai ulih ngasika Jehovah enggau orang ke udah diberi Iya kuasa.

2. Nama reti “sedia deka ngasi”? (James 3:17)

² Bacha James 3:17. James, siku ari penulis Bup Kudus madahka, orang ke bepenemu-dalam “sedia deka ngasi.” Nama reti utai ku iya? Kitai patut keran sereta deka ngasika sida ke diberi Jehovah sekeda kuasa. Taja pia, enti sida ngasuh kitai ngelanggar pesan Jehovah, Jehovah enggai kitai ngasika sida.—SKR. 4:​18-20.

3. Nama kebuah nya penting ba Jehovah enti kitai ngasika orang ke bisi kuasa atas kitai?

³ Kitai engka ngasaika senang agi ngasika Jehovah ari ke ngasika mensia. Nama kebuah? Laban Jehovah seruran meri iring ti sempurna. (Mas. 19:7) Tang mensia ke bisi kuasa enda sempurna. Taja pia, Apai kitai Jehovah udah meri sekeda kuasa ngagai apai indai, bala pegawai perintah, sereta bala tuai gempuru. (J-lam. 6:20; 1 Tes. 5:12; 1 Pet. 2:​13, 14) Kebendar iya, lebuh kitai ngasika sida, kitai benung ngasika Jehovah. Aram kitai beratika chara kitai ulih ngasika orang ke udah diberi Jehovah kuasa, taja pan kitai kekadang ngasaika tusah deka nerima sereta nitihka iring ari sida.

NGASIKA APAI INDAI NUAN

4. Nama kebuah mayuh bala anak enggai ngasika apai indai sida?

⁴ Bala nembiak dikelingi orang ke serambau enggau sida, ke “enda ngasika apai indai.” (2 Tim. 3:​1, 2) Nama kebuah mayuh ari sida enggai ngasika apai indai? Sekeda apai indai ngasuh bala anak sida ngereja sesiti utai, tang sida empu enda ngereja nya. Ketegal nya, bala anak sida ngumbai tu enda adil. Bala nembiak ke bukai ngasaika jaku lalau ari apai indai sida enda ulih dikena, laban gaya dunya tu udah berubah. Bisi mega ngasaika apai indai sida kelalu terit. Kita ke nembiak, kati kita kala ngasaika utai ti sama? Mayuh orang ngasaika tusah deka nitihka pesan ari Jehovah: “Ngasika apai indai kita baka ke dikedekaka Tuan, laban nya utai ti lurus.” (Eps. 6:1) Nama ulih nulung nuan nitihka pesan tu?

5. Nama kebuah Jesus teladan ti pemadu manah ke bala nembiak bekaul enggau ngasika apai indai? (Luke 2:​46-52)

⁵ Nuan ulih belajar ngasi ari teladan ti pemadu manah, iya nya Jesus. (1 Pet. 2:​21-24) Taja pan iya sempurna, tang apai indai iya enda sempurna. Lebuh apai indai iya ngaga penyalah sereta kekadang salah faham ngagai iya, Jesus agi bebasaka seduai iya. (P-sut. 20:12) Peratika utai ti nyadi ba Jesus lebuh iya beumur 12 taun. (Bacha Luke 2:​46-52.) Jesus enggau apai indai iya ngagai Jerusalem. Tang lebuh sida sebilik dalam pejalai pulai ke rumah, apai indai iya enda nemu iya agi tinggal ba Jerusalem. Endang amat, Josep enggau Maria patut nentuka semua bala anak seduai iya bisi enggau sida ba pejalai pulai ke rumah pengudah pengerami nya. Tang, lebuh Josep enggau Maria tetemuka Jesus, Maria nganu Jesus laban Jesus enda enggau sida pulai. Jesus engka ulih nyebut: ‘Ukai salah aku nya!’ Tang iya enda ngereja nya. Iya nyaut apai indai iya enggau chara ti bebasa. Tang seduai iya, “enda nemu reti utai ku iya.” Taja pia, Jesus “mengkang ngasika seduai iya.”

6-7. Nama ulih nulung bala nembiak ngasika apai indai sida?

⁶ Bala nembiak, kati nuan kala ngasaika tusah deka ngasika apai indai nuan lebuh seduai iya ngaga penyalah, tauka lebuh seduai iya salah faham ngagai nuan? Nama ulih nulung nuan? Kesatu, perundingka asai ati Jehovah. Bup Kudus madahka, lebuh nuan ngasika apai indai nuan, “nya ngelantangka ati Tuan.” (Kol. 3:20) Jehovah nemu, kekadang apai indai nuan enda entu faham pasal asai ati tauka runding nuan. Lalu, Iya mega nemu kekadang apai indai nuan ngaga atur ke tusah dititihka nuan. Tang lebuh nuan milih deka terus ngasika apai indai nuan, nya deka ngagaka ati Jehovah.

⁷ Kedua, perundingka asai ati apai indai nuan. Lebuh nuan ngasika apai indai nuan, nuan deka ngagaka ati seduai iya. Kelimpah ari nya, seduai iya mega deka arap agi ke nuan. (J-lam. 23:​22-25) Kaul nuan enggau apai indai nuan mega deka majak rapat. Alexandre, siku menyadi lelaki ari Belgium madahka: “Lebuh aku ngereja utai ti diasuh apai indai aku, kaul kami majak rapat, lalu kami gaga agi ati.”b Ketiga, enti nuan belajar ngasika apai indai nuan, nya deka mulaika penguntung ke nuan dudi hari. Paulo, ke diau ba Brazil madahka: “Lebuh aku belajar ngasika apai indai aku, nya nulung aku ngasika Jehovah sereta orang bukai ke bisi kuasa.” Jaku Petara meri nuan kebuah ti penting nuan patut ngasika apai indai nuan. Iya madahka: “Ngambika nuan mujur sereta panjai umur ba dunya.”—Eps. 6:​2, 3.

8. Nama kebuah mayuh bala nembiak milih deka ngasika apai indai sida?

⁸ Mayuh bala nembiak udah ngasaika penguntung lebuh sida ngasika apai indai sida. Peratika utai ke nyadi ba Luiza, ke mega ari Brazil. Terubah iya, Luiza tusah deka faham kebuah apai indai iya enda ngasuh iya ngena handphone pengelama sesiti timpuh. Iya berunding, mayuh bala nembiak ke serambau enggau iya bisi handphone. Tang udah nya, iya sedar, apai indai iya benung nyaga iya. Diatu iya madahka: “Aku nemu, lebuh aku ngasika apai indai aku, atur ke digaga seduai iya ukai deka ngawal aku, tang atur nya endang utai ke diguna aku.” Elizabeth, siku menyadi indu ke beumur 18 taun ari Amerika Serikat madahka: “Kekadang aku agi tusah deka ngasika apai indai aku. Bisi maya iya, aku enda faham kebuah seduai iya netapka sekeda atur. Tang lebuh utai nya nyadi, aku berunding baru pasal baka ni atur seduai iya udah nyaga aku.” Monica, ke diau ba Armenia madahka: “Aku berasai gaga agi ati lebuh aku ngasika apai indai aku.”

NGASIKA PIAK BEKUASA

9. Nama asai ati mayuh orang pasal ngasika undang-undang?

⁹ Bup Kudus ngumbai perintah mensia nya “orang ke bisi kuasa merintah kitai.” (Rom. 13:1) Mayuh orang setuju, endang manah enti bisi perintah. Lalu, sida mega engka ngasika sekeda undang-undang ke digaga perintah nya. Taja pia, sida enggai ngasika undang-undang ke enda dikerinduka sida tauka undang-undang ke dikumbai sida enda adil. Ambika chunto, undang-undang pasal mayar chukai. Ba siti menua di Eropah, mayuh orang pechaya sida enda ibuh mayar chukai enti sida ngasaika chukai nya enda adil. Nya kebuah ba menua nya, rayat iya semina mayar kira-kira 65 peratus ari chukai ke patut dibayar ngagai perintah.

10. Nama kebuah kitai ngasika undang-undang, indah undang-undang ke enda dikerinduka kitai?

¹⁰ Bup Kudus madahka, perintah mensia mai mayuh pemerinsa. Sida mega di baruh kuasa Sitan, lalu deka dirusak enda lama da agi. (Mas. 110:​5, 6; P-jar. 8:9; Luk. 4:​5, 6) Tang Bup Kudus mega madahka: “Enti kitai ngelaban sida, kitai ngelaban Petara.” Ke diatu, Jehovah ngemendarka perintah mensia merintah kena nentuka semua utai teratur, lalu Iya deka kitai ngasika sida. Nya alai, kitai mesti ‘meri ngagai tiap iku orang utai ke patut diterima sida.’ Tu nyengkaum chukai, basa, sereta ngasika sida. (Rom. 13:​1-7) Kitai engka ngumbai sesiti atur nya ngenusahka, enda adil, tauka mar dititihka. Tang kitai ngasika sida laban Jehovah ngasuh kitai ngereja nya seagi-agi sida enda ngasuh kitai ngelanggar pesan Jehovah.—SKR. 5:29.

11-12. Nama digaga Josep enggau Maria kena ngasika siti atur ari raja Rome, lalu nama asil iya? (Luke 2:​1-6) (Peda mega gambar.)

¹¹ Kitai ulih belajar ari teladan Josep enggau Maria. Seduai iya sedia deka ngasi piak bekuasa taja pan nya tusah. (Bacha Luke 2:​1-6.) Lebuh kandung Maria udah semilan bulan, iya enggau Josep patut ngereja siti utai ti tusah. Maya nya, raja Rome Augustus meri atur ngasuh semua orang ba serata Rome ngerejister nama diri ba nengeri diri empu. Josep enggau Maria patut mupuk ngagai Betlehem. Pejalai nya kira-kira 150 kilometer nengah jalai ti bebukit. Pejalai nya tentu tusah, kelebih agi ke Maria. Seduai iya engka bisi pengirau. Baka ni enti Maria beranak maya dalam pejalai? Kati Maria enggau anak ke dalam kandung nya deka selamat? Seduai iya tentu berasai irau laban anak ke dalam kandung nya Messiah ke dianti sida. Kati nya ulih nyadika alasan ngambika seduai iya enda ibuh ngasika atur ari perintah?

¹² Taja pan Josep enggau Maria bisi kebuah irau, seduai iya tetap ngasika atur nya. Jehovah gaga ati laban seduai iya ngasi, lalu Iya nyaga sida. Maria datai enggau selamat ba Betlehem, lalu iya ngadaka siku anak lelaki ti gerai. Iya indah nulung ngamatka jaku benabi dalam Bup Kudus!—Mik. 5:2.

13. Baka ni ulah kitai ti ngasi ulih meri kesan ngagai bala menyadi Kristian kitai?

¹³ Lebuh kitai ngasika piak bekuasa, kitai mai penguntung ngagai diri empu sereta ngagai orang bukai. Ambika chunto, ketegal kitai ngasika undang-undang, kitai ulih nyeliahka diri ari diukum. (Rom. 13:4) Pia mega, lebuh kitai ngasika piak bekuasa, sida deka ngembuan runding ti manah pasal Saksi-Saksi Jehovah. Tu meh utai ti nyadi ba Nigeria betaun-taun suba. Bala soldadu tama ngagai Palan Gempuru lebuh gempuru benung dipejalaika. Sida ngiga orang ke ngelaban pengawa mayar chukai. Tang tuai soldadu nya ngasuh bala soldadu iya mupuk. Iya madah: “Saksi-Saksi Jehovah seruran mayar chukai.” Endang amat, tiap kali nuan ngasika undang-undang, nuan deka nulung ngemansangka reputasi Saksi-Saksi Jehovah. Lalu, bisi maya nya ila, reputasi tu deka nyaga bala menyadi Kristian nuan.—Mat. 5:16.

14. Nama nulung siku menyadi indu “sedia deka ngasi” piak bekuasa?

¹⁴ Taja pia, bisi maya iya kitai engka enggai ngasika piak bekuasa. Joanna, siku menyadi indu ba Amerika Serikat ngaku utai tu. Iya madah: “Aku amat tusah deka ngasika sida, laban sekeda ari diri sebilik aku napi utai ti enda adil ketegal piak bekuasa.” Tang Joanna berusaha ngubah runding iya. Nama digaga iya? Kesatu, iya badu agi macha utai ba media sosial ke ngasuh iya ngembuan runding ti enda manah pasal piak bekuasa. (J-lam. 20:3) Kedua, iya besampi minta tulung ari Jehovah. Ari ke minta Jehovah nukar perintah mensia, iya besampi ngambika ulih arap agi ke Jehovah. (Mas. 9:​9, 10) Ketiga, iya macha artikel dalam litaricha kitai pasal pengawa mengkang neutral. (Jhn. 17:16) Diatu, Joanna madahka, ketegal iya bebasa sereta ngasika piak bekuasa, iya berasai lantang agi.

NGASIKA IRING ARI GEREMPUNG JEHOVAH

15. Nama kebuah kitai kekadang tusah deka ngasika iring ari gerempung Jehovah?

¹⁵ Jehovah ngasuh kitai ngasika bala menyadi ke ngiring dalam raban gempuru. (Heb. 13:17) Ketuai kitai, Jesus Kristus, sempurna. Tang bala menyadi lelaki ke dipilih iya ngiring kitai enda sempurna. Kitai engka tusah deka ngasika sida, kelebih agi enti sida ngasuh kitai ngereja utai ke dikenggaika kitai. Bisi sekali, Rasul Peter diasuh ngereja siti utai. Terubah iya, iya tusah deka ngasika iring nya. Siku melikat ngasuh iya makai jelu ti enda tuchi di baruh Adat Moses. Tang Peter enggai nitihka iring nya. Iya nulak ukai sekali aja, tang tiga kali! (SKR. 10:​9-16) Nama kebuah iya enggai? Iring ti baru nya enda masuk akal ba iya. Iring nya amat nyelai ari utai ke biasa dikereja iya. Enti Peter tusah deka nitihka iring ari siku melikat ti sempurna, kitai mega engka tusah agi nitihka iring ari mensia ti enda sempurna!

16. Taja pan Rasul Paul ulih ngumbai iring ke diterima iya enda masuk akal, tang nama utai ti dikereja iya? (Surat Kereja Rasul 21:​23, 24, 26)

¹⁶ Rasul Paul “sedia deka ngasi,” indah lebuh iya nerima iring ke engka dikumbai iya enda masuk akal. Orang Kristian ke bebansa Judah bisi ninga cherita pasal Paul. Kenu ku cherita, Paul ngasuh orang Judah “ninggalka Adat Moses,” lalu iya mega dituduh enda bebasaka Adat nya. (SKR. 21:21) Bala tuai orang Kristian ba Jerusalem ngasuh Paul mai empat iku lelaki ngagai Rumah Sembiang, lalu nuchi diri nitihka Adat. Sida ngasuh iya ngereja nya kena nunjukka diri agi nitihka Adat. Tang Paul nemu, orang Kristian ukai agi di baruh Adat. Lalu iya nadai ngereja penyalah. Taja pia, Paul agi ngasika utai ti diasuh sida. “Nya alai, hari siti, Paul mai sida empat nya, lalu sida sama nuchi diri nitihka adat.” (Bacha Surat Kereja Rasul 21:​23, 24, 26.) Ketegal Paul ngasika iring nya, iya nulung ngetanka penyerakup entara bala menyadi Kristian.—Rom. 14:​19, 21.

17. Nama ulih dipelajarka nuan ari pengalaman Stephanie?

¹⁷ Siku menyadi indu ke benama Stephanie, tusah deka nerima pemutus ke digaga pampang opis ba menua iya. Iya enggau laki iya gaga ati nulung ba raban ke ngena bansa jaku bukai. Tang udah nya, pampang opis nutup raban nya, lalu seduai iya diasuh pulai baru ngagai raban gempuru ke ngena jaku asal seduai iya. Ku Stephanie ngaku: “Aku amat pedis ati. Aku enda ngasaika raban gempuru ke ngena jaku asal aku begunaka bantu.” Taja pia, iya tetap nyukung iring ti baru nya. Ku iya agi: “Nyau kelama aku nemu, pemutus ke digaga bala menyadi lelaki nya manah. Ba raban gempuru kami ti baru, mayuh bala menyadi kediri dalam pemendar. Kami nyadi apai indai rohani ke sida. Aku benung belajarka Bup Kudus enggau siku menyadi indu ke nyadi aktif baru. Lalu diatu, aku bisi mayuh agi awak belajarka Bup Kudus kediri empu.” Ku iya nampung: “Ati aku beresi laban aku nemu, aku udah enggau naka ulih ngasika iring nya.”

18. Nama penguntung ke diulih lebuh kitai ngasi?

¹⁸ Kitai ulih belajar ngayanka ulah ti ngasi. Jesus belajar ngasi ari “pemerinsa ke ditapi iya.” (Heb. 5:8) Baka Jesus, kitai suah belajar ngasi lebuh napi situasi ti tusah. Ambika chunto, lebuh pandemik COVID-19 baru berengkah, kitai diasuh ngetu begempuru ba Palan Gempuru sereta ngetu nginjil ari rumah ke rumah. Maya nya, kati nuan tusah deka ngasika iring nya? Tang, ketegal nuan ngasi, nya udah nyaga nuan sereta nulung raban gempuru beserakup. Jehovah tentu gaga ati enggau ulah nuan. Ketegal nya, semua kitai besedia agi deka ngasi sebarang iring ke diterima maya Penusah ti Besai. Lebuh kitai ngasika iring ba maya nya, kitai deka selamat!—Jop 36:11.

19. Nama kebuah nuan deka ngasi?

¹⁹ Dalam artikel tu, kitai udah belajar, ulah ti ngasi mai mayuh berekat. Tang kebuah ti pemadu penting kitai ngasika Jehovah, iya nya ketegal kitai rinduka Iya sereta deka ngelantangka ati Iya. (1 Jhn. 5:3) Kitai enda ulih malas semua pemanah ke udah diayanka Jehovah ke kitai. (Mas. 116:12) Tang kitai ulih ngasika Iya sereta sida ke bisi kuasa atas kitai. Lebuh kitai ngasi, kitai nunjukka diri bepenemu-dalam. Lalu lebuh kitai bepenemu-dalam, kitai ngagaka ati Jehovah.—J-lam. 27:11.