Andal meh Jehovah Deka Nulung Nuan lebuh Nuan Bisi Penanggul

1-2. Nama utai ti sama entara situasi kitai enggau situasi orang Judah ke pulai ngagai Jerusalem? (Peda mega kutak “Maya Jeman Hagai, Sekariah, enggau Esra.”)

KATI nuan kekadang irau pasal utai ke deka nyadi dudi hari? Nuan engka udah lenyau kereja, lalu irau pasal chara deka melanja kita sebilik. Nuan engka irau pasal pengelikun kita sebilik laban bisi penyarut nyadi ba menua alai kita diau. Tauka kita sebilik engka disakal lebuh nginjil tauka diperinsa. Tu engka ngasuh nuan irau. Kati nuan benung napi penanggul ke baka tu? Enti pia, peratika meh chara Jehovah nulung orang Israel maya jeman kelia, ke napi penanggul ti sama. Tu deka meransang nuan.

² Orang Judah ke diau ba Babilon sepemanjai pengidup sida, begunaka pengarap ti tegap. Nama kebuah? Laban sida patut ninggalka pengidup ti selesa ba Babilon lalu pindah ngagai menua ke enda entu ditemu sida. Lebuh sida datai ba endur nya, sida nyau tusah deka ngintu diri sebilik. Pia mega, bisi penyarut nyadi dalam perintah Persia, lalu sida mega disakal menua ke ngelingi sida. Ketegal nya, sekeda ari sida tusah deka ngenuluka pengawa nirika baru Rumah Sembiang Jehovah. Nyadi, kira-kira ba taun 520 S.M., Jehovah nganjung Nabi Hagai enggau Nabi Sekariah kena nulung bala nembiak Iya ransing baru ba pengawa nya. (Hag. 1:1; Sek. 1:1) Baka ke deka diperatika kitai, peransang ke diberi dua iku nabi tu mai asil ti amat manah. Taja pia, kira-kira 50 taun pengudah nya, bala orang Judah nya begunaka peransang baru. Nyadi, Esra, siku tukang ngupi Adat ti landik, datai ngagai Jerusalem ari Babilon kena meri peransang ngagai nembiak Petara, ngambika sida ngenuluka sembah ti bendar.—Esr. 7:​1, 6.

3. Nama tanya ke deka dikerandauka kitai? (Jaku-Dalam 22:19)

³ Utai ke ditulis Hagai enggau Sekariah udah nulung nembiak Petara terus arapka Jehovah, taja pan disakal. Kemayaharitu, utai ke ditulis seduai iya mega ulih nulung kitai terus arapka Jehovah, enda ngira nama utai ke ditapi kitai. (Bacha Jaku-Dalam 22:19.) Kitai deka beratika pesan Petara ti dikenataika Hagai enggau Sekariah, sereta meresa teladan Esra. Lebuh kitai ngereja nya, kitai deka nyaut tanya tu: Baka ni penanggul nya mai empas ngagai pengidup orang Judah? Nama kebuah kitai patut terus ngenuluka peneka Petara, taja pan napi penanggul? Lalu, baka ni kitai ulih ngemansangka agi pengarap kitai ngagai Jehovah lebuh napi penanggul?

PENANGGUL NGASUH ORANG JUDAH LENYAU PENGERANSING

4-5. Nama utai ke engka ngasuh orang Judah lenyau pengeransing nirika baru Rumah Sembiang?

⁴ Lebuh orang Judah datai ba Jerusalem, sida bisi mayuh pengawa ke patut digaga. Sida enggau jampat nirika baru alta Jehovah, sereta nudukka batu pemun Rumah Sembiang. (Esr. 3:​1-3, 10) Tang sida napi mayuh penanggul nyentukka sida lenyau pengeransing. Sida ukai aja patut nirika baru Rumah Sembiang, tang sida mega patut ngaga rumah ke diri empu, betanam, sereta ngulihka pemakai ke diri sebilik. (Esr. 2:​68, 70) Kelimpah ari nya, sida mega napi sakal ari bala munsuh ke nguji deka ngasuh sida ngetu nirika baru Rumah Sembiang Jehovah.—Esr. 4:​1-5.

⁵ Sida mega nerima empas ketegal penyarut ba menua sereta penanggul ba ekonomi. Menua sida diatu dipegai perintah Persia. Pengudah raja orang Persia, ke benama Sairus, mati ba taun 530 S.M., raja baru ke nganti iya, Kambises, deka nyerang lalu nguasa Ejip. Ba pejalai sida nuju ngagai Ejip, bala soldadu Kambises engka bisi minta pemakai, ai, enggau endur alai diau ari orang Israel. Tu tentu ngasuh pengidup orang Judah tusah agi! Lalu, lebuh raja ke nganti Kambises, iya nya Raja Darius I berengkah merintah, menua nya agi bisi mayuh penanggul. Maya nya, orang angkat ngelaban lalu ngujungka penyarut nyadi ba perintah Persia. Semua utai ke nyadi tu tentu ngasuh orang Judah irau pasal chara sida ulih ngintu diri sebilik. Ketegal nya, sekeda orang Judah ngasaika nya ukai maya ti sesuai alai nirika baru Rumah Sembiang Jehovah.—Hag. 1:2.

6. Nitihka Sekariah 4:​6, 7, nama utai bukai ke ditapi orang Judah? Nama utai ke dipadah Sekariah ngagai sida?

⁶ Bacha Sekariah 4:​6, 7. Kelimpah ari napi penanggul ba ekonomi sereta penyarut ba menua, orang Judah mega patut tan napi perinsa. Ba taun 522 S.M., bala munsuh sida mujur ngasuh perintah Persia ngetuka pengawa nirika baru Rumah Sembiang Jehovah. Tang Sekariah nulung sida yakin, Jehovah deka ngena kuasa kudus Iya nulung sida neruska pengawa nya, taja pan napi penanggul. Ba taun 520 S.M., Raja Darius ngemendarka sida neruska pengawa nya. Iya indah meri sida duit kena ngereja nya. Iya mega ngasuh sekeda gabenor ba menua nya nulung sida.—Esr. 6:​1, 6-10.

7. Baka ni Jehovah merekatka orang Judah lebuh sida ngenuluka pengawa Iya?

⁷ Nengah Hagai enggau Sekariah, Jehovah besemaya ngagai orang Judah, Iya deka nulung sida enti sida ngenuluka pengawa nirika baru Rumah Sembiang. (Hag. 1:​8, 13, 14; Sek. 1:​3, 16) Ketegal sida berasai diperansang, orang Judah nyambung baru pengawa nirika baru Rumah Sembiang ba taun 520 S.M. Sida nembuka pengawa nya kurang ari lima taun. Ketegal sida ngenuluka pengawa Jehovah taja pan napi mayuh penanggul, Jehovah merekatka sida. Iya meri sida utai ke diguna sida kena beridup, lalu nulung sida mengkang semak ngagai Iya. Asil iya, sida ulih nyembah Jehovah enggau gaga ati.—Esr. 6:​14-16, 22.

TERUS FOKUS NGEREJA PENEKA PETARA

8. Baka ni Hagai 2:4 nulung kitai terus fokus ngereja peneka Petara?

⁸ Seraya Penusah ti Besai majak semak, kitai nemu tu meh maya iya kitai patut majak agi ngasika pesan ke ngasuh kitai enggau pengawa nginjil. (Mrk. 13:10) Taja pia, kitai engka tusah deka fokus ba pengawa nginjil enti kitai napi penanggul ba penatai pemisi tauka disakal lebuh nginjil. Nama ulih nulung kitai ngenuluka peneka Jehovah? Andal meh Jehovah bisi enggau kitai. Iya deka nulung kitai enti kitai terus ngenuluka Perintah Iya. Nyadi, kitai nadai kebuah takutka sebarang utai.—Bacha Hagai 2:4.

9-10. Baka ni sepasang laki bini ngasaika pengamat jaku Jesus ba Matthew 6:33?

⁹ Peratika pengalaman Oleg enggau Irina,b sepasang laki bini ke nyadi pengerintis. Seduai iya pindah kena nulung raban gempuru ba endur bukai. Tang, ketegal penanggul ekonomi ba menua nya, seduai iya lenyau kereja. Seduai iya enda tetemuka kereja ti tetap pengelama kira-kira setaun. Taja pia, seduai iya seruran ngasaika sukung ari Jehovah, lalu kekadang seduai iya mega nerima bantu ari bala menyadi Kristian. Nama nulung seduai iya lebuh seduai iya napi penanggul tu? Terubah iya, Oleg berasai asa ati. Tang iya madah: “Kami duai nguji ngena mayuh awak ba pengawa nginjil. Tu nulung kami fokus ba utai ke pemadu penting ba pengidup.” Seduai iya terus ngiga kereja. Taja pia, ba maya ti sama, seduai iya mengkang kisuk ba pengawa nginjil.

¹⁰ Bisi sekali, pengudah seduai iya pulai ari pengawa nginjil, seduai iya nerima dua iti beg ke penuh enggau pemakai. Seduai iya nyau nemu, siku kaban rapat udah bejalai kira-kira 160 kilometer kena nganjung dua iti beg pemakai nya. Ku Oleg madah: “Ba hari nya, kami duai sekali agi ngasaika pengibuh Jehovah ke kami. Kami mega ulih ngasaika pengibuh bala menyadi ke kami. Kami yakin, Jehovah enda sekali-kali ninggalka bala nembiak Iya, taja pan situasi sida baka ke nadai harapan.”—Mat. 6:33.

11. Nama ulih dikeandalka kitai enti kitai terus fokus ngereja peneka Petara?

¹¹ Jehovah deka kitai fokus ba pengawa nyelamatka orang. Kitai ulih ngereja tu lebuh kitai ngaga orang nyadi murid. Baka ke udah dipadah ba genteran 7, Hagai meransang orang Judah berengkah baru nirika Rumah Sembiang Jehovah. Enti sida ngereja nya, Jehovah besemaya Iya tentu “deka merekatka” sida. (Hag. 2:​18, 19) Kitai mega ulih yakin, Jehovah deka merekatka usaha kitai enti kitai ngenuluka pengawa ke diasuh Iya kereja kitai.

CHARA NGEMANSANGKA PENGANDAL KITAI NGAGAI JEHOVAH

12. Nama kebuah Esra enggau sida ke enggau iya begunaka pengarap ti tegap?

¹² Ba taun 468 S.M., Esra enggau seraban agi orang Judah mupuk ngagai Jerusalem ari Babilon. Sida begunaka pengarap ti tegap kena ngereja tu. Nama kebuah? Laban raja udah meri sida mayuh emas enggau pirak kena nirika baru Rumah Sembiang. Lalu jalai ke ditengah sida nya amat bahaya. Enti bala perumpak nemu, sida tentu deka dirumpak! (Esr. 7:​12-16; 8:31) Nambahka nya, sida nyau sedar Jerusalem pan enda selamat! Nadai mayuh orang diau ba dia, lalu dinding sereta pintu penama kuta nya patut diaduka baru. Nama ulih dipelajarka kitai ari Esra pasal ngemansangka pengandal kitai ngagai Jehovah?

13. Baka ni Esra ngemansangka pengandal iya ngagai Jehovah? (Peda mega nota kaki.)

¹³ Esra udah meda baka ni Jehovah nulung bala nembiak Iya maya sida napi penusah. Betaun-taun sebedau nya, iya nya ba taun 484 S.M., Esra engka diau ba Babilon lebuh Raja Serses ngasuh orang Judah dibunuh ba serata perintah Persia. (Est. 3:​7, 13-15) Nyawa Esra enggau semua orang Judah dalam bahaya! Lebuh sida ninga pasal utai tu, sida amat tusah ati nyentukka sida bepasa sereta nyabak lebuh sida minta tulung ari Jehovah. (Est. 4:3) Gambarka asai ati Esra enggau bala orang Judah lebuh orang ke ngaga pelan ti jai nya dibunuh! (Est. 9:​1, 2) Utai ti nyadi maya nya tentu udah nyediaka Esra ke penusah ti deka datai dudi hari. Pia mega, nya nulung iya andal agi Jehovah ulih nyaga bala nembiak Iya.c

14. Nama utai ke dipelajarka siku menyadi indu lebuh iya nerima tulung ari Jehovah ba maya ti tusah?

¹⁴ Lebuh kitai nerima tulung ari Jehovah ba maya ti tusah, kitai deka majak agi andal ngagai Iya. Peratika pengalaman Anastasia ke diau ba Eropah Timur. Iya badu kereja ngambika iya ulih mengkang neutral ba isu politik. Ku iya madah: “Tu meh keterubah kali ba pengidup aku, aku langsung nadai duit. Tang, aku besampi ngagai Jehovah, lalu meda chara Iya nyaga aku. Enti sema aku lenyau kereja baru, aku enda takut. Enti Jehovah nyaga aku saritu, Iya tentu mega deka nyaga aku pagila.”

15. Nama nulung Esra mengkang arapka Jehovah? (Esra 7:​27, 28)

¹⁵ Esra udah meda chara Jehovah udah nulung iya. Lebuh Esra berundingka pasal chara Jehovah udah bekali-kali nulung iya suba, tu nulung iya mengkang arapka Jehovah. Iya madahka: ‘Jehovah, Petara aku udah meri aku pemerani.’—Bacha Esra 7:​27, 28.

16. Ni maya kitai amat ulih ngasaika tulung ari Jehovah? (Peda mega gambar.)

¹⁶ Jehovah ulih nulung kitai lebuh kitai napi situasi ti tusah. Ambika chunto, kitai engka minta chuti ari tuke ngambika ulih datai ngagai konvensyen. Tauka, kitai engka minta tuke ngubah jadual kereja kitai ngambika kitai ulih datai ngagai semua gempuru. Ba maya nya, kitai ulih meda chara Jehovah amat nulung kitai. Asil iya engka manah agi ari ke dijangka kitai. Lalu tu deka nulung kitai majak agi arapka Jehovah.

17. Baka ni Esra ngayanka pemaruh ati lebuh napi penanggul? (Peda gambar ba mua majalah.)

¹⁷ Esra enggau baruh ati besampi minta tulung ari Jehovah. Tiap kali iya berasai irau pasal tanggung pengawa ke dipegai iya, Esra enggau baruh ati besampi ngagai Jehovah. (Esr. 8:​21-23; 9:​3-5) Ketegal Esra bepanggai ba Jehovah, orang bukai ke ngelingi iya mega nyukung iya, lalu neladan pengarap iya. (Esr. 10:​1-4) Lebuh kitai berasai irau pasal utai ke diguna kitai tauka pasal pengelikun diri sebilik, kitai deka besampi ngagai Jehovah, lalu yakin Iya deka nyaut sampi kitai.

18. Nama ulih nulung kitai majak agi arapka Jehovah?

¹⁸ Enti kitai enggau baruh ati minta tulung ari Jehovah sereta nerima tulung ari bala menyadi Kristian, pengandal kitai ngagai Petara deka majak tegap. Tu meh utai ke diasaika Erika. Iya bisi tiga iku anak. Erika seruran andal Jehovah deka nyaga iya, indah lebuh iya dituntung penusah. Dalam timpuh ti pandak, iya lenyau anak ke agi dalam kandung sereta laki ti dikesayau. Bekaul enggau semua utai ke udah nyadi, iya madah: “Kitai enda nemu baka ni Jehovah deka nulung kitai. Iya ulih ngena chara ti enda disadang kitai. Aku udah meda chara Jehovah ngena bala kaban aku nyaut sampi aku. Sida ngereja nya ari utai ke disebut sida tauka ari pengawa ke dikereja sida. Enti aku bekunsi enggau sida pasal utai ke benung nyadi ba pengidup aku, sida senang agi deka nulung aku.”

MENGKANG ANDALKA JEHOVAH NYENTUKKA UJUNG

19-20. Nama ulih dipelajarka kitai ari orang Judah ke enda ulih pulai ngagai Jerusalem?

¹⁹ Kitai mega ulih belajar ari teladan orang Judah ke enda ulih pulai ngagai Jerusalem. Sekeda enda ulih pulai ketegal sida udah tuai, sakit, tauka bisi tanggung pengawa ba ruang bilik. Taja pia, sida gaga ati nyukung orang ke pulai ngagai Jerusalem. Sida meri mayuh utai ke dikena nirika Rumah Sembiang. (Esr. 1:​5, 6) Semilan belas taun pengudah raban orang Judah ti keterubah pulai ngagai Jerusalem, sida ke ba Babilon engka agi nganjung pemeri ngagai Jerusalem.—Sek. 6:10.

²⁰ Taja pan kitai enda ulih ngereja semua utai ke dikedekaka kitai ke Jehovah, tang kitai yakin, Iya beterima kasihka usaha kitai ke deka ngelantangka ati Iya. Baka ni kitai nemu tu? Ba jeman Sekariah, Jehovah ngasuh nabi iya ngaga siti makota. Makota nya digaga ari emas enggau pirak ke diberi orang Judah ke agi ba Babilon. (Sek. 6:11) “Makota” nya digaga kena “ngingatka” pasal pengerah jari sida. (Sek. 6:14) Kitai ulih yakin, Jehovah deka mengkang ingatka usaha kitai ti bebendar deka nyembah Iya, taja pan napi penusah.—Heb. 6:10.

21. Nama deka nulung kitai mengkang andalka Jehovah enda ngira nama utai ke nyadi dudi hari?

²¹ Ba hari ti penudi tu, kitai deka terus napi penanggul, lalu situasi nya deka nyadi balat agi dudi hari. (2 Tim. 3:​1, 13) Taja pia, kitai enda ibuh kelalu irau. Ingat meh jaku Jehovah ngagai bala nembiak Iya maya jeman Hagai: “Aku bisi enggau kita. . . . Anang takut.” (Hag. 2:​4, 5) Kitai mega ulih yakin, Jehovah deka enggau kitai seagi-agi kitai enggau naka ulih ngereja peneka Iya. Kena meh utai ke udah dipelajarka kitai ari jaku benabi Hagai enggau Sekariah sereta ari teladan Esra. Enggau nya, kitai deka mengkang andalka Jehovah, enda ngira nama penusah ke ditapi kitai dudi hari.