Nama Udah Digaga Petara?

Enti deka ngelala seiku-seiku orang, endang manah enti nuan nemu utai ti udah dijapai iya sereta penanggul ti udah diputarka iya. Pia mega, enti deka ngelala Petara, nuan patut nemu utai ti udah digaga Iya. Lalu nuan engka enda nyangka utai ti digaga Iya suba mai penguntung ngagai kitai diatu sereta ke jemah ila.

PETARA NEMPA SEMUA UTAI KE PENGUNTUNG KITAI

Petara Jehovah nya Penempa semua utai, lalu “kualiti Iya ti enda ulih dipeda, udah ditemu sereta dipeda mensia ari utai ti digaga Iya.” (Rome 1:20) “TUHAN [Jehovah] ngaga dunya ngena kuasa Iya Empu. Ulih penemu-dalam Iya, Iya ngaga dunya sereta mintarka langit.” (Jeremiah 10:12) Utai ti ngalitka ati ke digaga Petara mega nunjukka Iya ibuhka kitai.

Uji peratika baka ni Jehovah ngasuh pengidup kitai manah agi lebuh Iya nempa mensia ngambika ulih “neladan gamal Iya Empu.” (Pemungkal 1:27) Reti nya, kitai digaga Iya ngambika ulih neladan sekeda kualiti Iya ti nadai banding. Iya ngaga kitai ngambika bisi penau meretika runding sereta standard moral Iya. Enti kitai ngembuan utai tu, pengidup kitai deka lantang agi sereta bisi tuju. Lalu Iya mega meri kitai penau ngamansangka kaul enggau Iya.

Lebuh kitai meda utai ti ditempa Petara ba Bumi, kitai ulih nemu asai ati Iya pasal kitai. Ari jaku rasul Paul kitai nemu, Petara “enda nejuka Diri nadai saksi ke utai ti manah ti dikereja Iya—Iya meri [kitai] ujan, ngasuh utai ti ditanam [kitai] bebuah lebat nitihka musin, lalu ngemuaska [kitai] ngena pemakai lalu ngemenuhka ati [kitai] enggau pengaga.” (Kereja Rasul 14:17) Petara ukai semina meri kitai utai ti patut dikena idup. Iya meri kitai enggau belimpah-limpah sereta bemacham-macham ngambika kitai ulih gaga ati enggau pengidup. Tang bisi mayuh agi utai ti deka digaga Iya ke kitai.

Jehovah nempa bumi ngambika mensia ulih diau dia belama iya. Bup Kudus madahka: “Iya meri dunya ngagai kitai mensia,” lalu Iya “nadai ngaga dunya nyadi endur ti sunyi nadai mensia, tang nyadi endur alai mensia diau.” (Masmur 115:16; Isaiah 45:18) Orang ke baka ni diau dia lalu berapa lama? “Orang ke lurus deka bempu menua tu lalu diau ditu belama iya.”—Masmur 37:29.

Jehovah nempa lelaki enggau indu ti keterubah, Adam seduai Hawa, lalu ngengkahka seduai iya ba paradais di bumi ‘ngambika gawa dia lalu nyaga kebun nya.’ (Pemungkal 2:8, 15) Petara meri seduai iya dua kali lipat pengawa ti ngerinduka ati: “Beranak betelesak lalu ngemenuhka dunya meh kita sereta bekuasa atas iya.” (Pemungkal 1:28) Nyadi Adam seduai Hawa bisi peluang idup belama iya ba bumi. Tang seduai iya milih enggai ngasika Petara lalu ketegal nya lenyau peluang nyadi “orang ke lurus” ti “deka bempu menua tu.” Taja pia, pengawa seduai iya enda ngubah tuju Jehovah bekaul enggau kitai tauka bumi. Keterubah, aram kitai beratika utai bukai ti udah digaga Petara.

PETARA MERI BUP KUDUS

Bup Kudus mega dikumbai Jaku Petara. Nama kebuah Jehovah meri kitai Bup Kudus? Ngambika ulih belajar pasal Iya. (Jaku Dalam 2:1-5) Amat, Bup Kudus enda nyaut tiap iti utai ti deka ditemu kitai pasal Petara. Indah nadai bup bukai ke ulih ngereja nya. (Pengajar 3:11) Taja pia, tiap iti utai ke bisi ba Bup Kudus nulung kitai ngelala Petara. Kitai nemu sapa Iya ari chara Iya ngintu orang. Kitai nemu orang ke baka ni dikerindu sereta dipegedika Iya. (Masmur 15:1-5) Kitai mega nemu runding Iya pasal sembah, standard moral, enggau reta. Lalu Bup Kudus nulung kitai nemu personaliti Iya nengah jaku sereta pengawa Anak Iya, Jesus Kristus.—John 14:9.

Siti agi kebuah Jehovah meri kitai Bup Kudus, iya nya ngambika kitai nemu baka ni ulih idup lantang sereta bisi tuju. Nengah Bup Kudus, Jehovah madahka baka ni tau bulih ruang bilik ti lantang, ngembuan ati ti puas, sereta mutarka pengirau ba ati. Lalu baka ke deka diterangka ba majalah tu, Bup Kudus ngundan saut ngagai utai ti suah ditanya bekaul enggau pengidup baka: Nama kebuah bisi mayuh pemerinsa? Nama deka nyadi jemah ila? Majalah tu mega nerangka utai ti udah digaga Petara kena ngamatka tuju asal Iya.

Bisi utai bukai ke ngasuh Bup Kudus nya ngalitka ati. Iya datai ari Petara. Bup Kudus ditulis kira 40 iku orang dalam kandang lebih 1,600 taun. Taja pia, tema iya agi sama laban Pengarang iya Petara. (2 Timoti 3:16) Enda baka bup kelia menya, utai ti ditulis dalam Bup Kudus agi dijaga manah datai ke seharitu. Tu udah ditentuka ngena beribu-ribu iti manuskrip Bup Kudus kelia. Kelebih agi, Bup Kudus meruan bisi taja pan orang bebendar nagang iya ari disalin, disadung, enggau dibacha. Kemayaharitu, iya bup ti pemadu mayuh disadung sereta disalin. Bup Kudus meruan bisi datai ke seharitu nunjukka ‘jaku Petara kitai, tan belama iya.’—Isaiah 40:8.

PETARA MERI JAMIN DEKA NGAMATKA TUJU IYA

Kena nentuka tuju Iya bekaul enggau kitai dikeamatka, Iya nyediaka siti agi utai ti ngalitka ati. Baka ke udah dipadah ba pun tadi, Petara deka mensia idup belama iya ba bumi. Tang, lebuh Adam milih enggai ngasika Petara lalu bedosa, iya ukai semina ngelenyauka peluang idup belama iya ke iya empu tang mega ke bala anak iya jemah ila. “Dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.” (Rome 5:12) Ketegal enda ngasika Petara, Adam bedosa. Tu ngasuh tuju Petara bekaul enggau bumi baka ke enda ulih dikeamatka. Nama digaga Petara kena mutarka pekara tu?

Utai ti digaga Jehovah sejalai enggau kualiti Iya. Iya deka Adam seduai Hawa betanggungjawapka pengawa diri. Tang Iya enggau siru ngintu bala anak seduai iya. Jehovah ngena penemu-dalam Iya mutarka penanggul nya, lalu madahka chara mutarka iya. (Pemungkal 3:15) Pengelepas ari dosa enggau pemati deka disediaka nengah Anak Petara, Jesus Kristus. Tu nyengkaum nama?

Kena ngelepaska mensia ari penusah ke datai ari pengawa Adam ti ngelaban, Jehovah nganjung Jesus ke bumi ngambika ngajarka orang chara idup ti patut lalu ‘nyerahka nyawa diri kena nebus orang mayuh.’a (Matthew 20:28; John 14:6) Jesus ulih nyadi tebus laban iya sempurna baka Adam. Tang enda baka Adam, Jesus mengkang ngasi nyentuk ke iya mati. Ketegal Jesus enda patut mati, Jehovah ngangkatka iya idup baru ke serega. Jesus ulih ngereja utai ke enda ulih digaga Adam, iya nya meri pengidup ti meruan belama iya ngagai mensia ke ngasi. “Laban baka orang siku ke enda ngasi nya mai mayuh orang bedosa, baka nya mega mayuh orang deka digaga lurus laban orang siku ngasi.” (Rome 5:19) Nengah genselan tebus Jesus, Petara deka ngamatka semaya Iya ti dekaka mensia idup belama iya ba bumi.

Mayuh utai ulih dipelajarka kitai pasal Jehovah ari chara Iya mutarka penanggul ke datai ari pengawa Adam ti enda ngasi. Kitai ulih meda, nadai utai ke ulih nagang Jehovah ari nembuka utai ti udah dipunka Iya. Iya deka “ngereja” jaku ti pansut ari mulut Iya. (Isaiah 55:11) Kitai mega beterima kasih ke pemesai pengerindu Petara ke kitai. ‘Baka tu ku jalai pengerindu Petara udah dipandangka ngagai kitai: Iya udah ngirumka Anak Tunggal Iya ngagai dunya, ngambika kitai tau idup ulih iya. Tu meh pengerindu, ukai reti nya kitai udah rinduka Petara, tang Iya udah rinduka kitai, lalu udah ngirumka Anak Iya nyadika [pemeri] kena muai dosa kitai.’—1 John 4:9, 10.

Petara ‘enda ngalau Anak Iya Empu, tang nyerahka iya ke kitai semua,’ nya alai kitai pechaya Petara deka “meri kitai semua utai bukai” ke udah disemaya Iya. (Rome 8:32) Nama deka digaga Petara ke kitai? Terus meh macha.