Ngemanahka Agi Pengelandik Kitai ba Pengawa Nginjil—Chara Ngepunka Randau Ngambika Ulih Meri Saksi

Jesus ulih meri saksi ngagai seiku indu orang Samaria laban iya ngepunka randau enggau indu nya. Baka ni kitai ulih ngemanahka agi pengelandik kitai ba pengawa ngepunka randau enggau orang ti enda dikelala?

• Tunjukka diri deka begulai sereta bejaku enggau orang. Taja pan Jesus berasai lelak, iya ngepunka randau enggau minta ai aja. Nya alai, nuan ulih berengkah enggau nanyaka berita orang nya lalu berandau pasal gaya hari tauka utai ti nyadi ba kandang endur kita diau. Kingatka, juluk ati ti keterubah iya nya ngepunka randau. Nya alai, nuan ulih berandauka sebarang topik ti ulih narit minat orang nya. Nadai ngawa enti iya enda nyaut nuan. Nuan ulih berandau enggau orang bukai. Pinta meh pemerani ari Jehovah.—Neh. 2:4; SKR. 4:29.

• BGiga peluang bekunsika berita manah, tang anang beguai. Enti nuan majak deka berandau pasal pengarap nuan, orang nya engka enda nyamai ati lalu enggai berandau agi. Nya alai, tejuka randau nya belubah-lubah nyadi randau pasal pemendar. Anang asa ati enti randau nya abis sebedau nuan ulih nginjil ngagai iya. Enti nuan takut deka bekunsika berita manah, nuan ulih belatih chara ngepunka randau dulu. [Mainka lalu berandauka video 1.]

• Gaga peluang meri saksi enggau nyebut sekeda utai pasal pengarap nuan ti ulih meransang orang betanyaka pekara nya. Jesus nyebut pasal pekara ti ngalitka ati lalu tu meransang indu Samaria betanyaka nya. Ke penudi iya, lebuh Jesus berengkah berandauka berita manah enggau indu Samaria nya, Jesus semina nyaut tanya indu nya aja. [Mainka lalu berandauka video 2, udah nya mainka lalu berandauka video 3.]