Awakka Penyiru Meransang Nuan

KU Lisaa madahka: “Penyiru ke diayan bala menyadi Kristian amat negu ati aku.” Iya benung bejaku pasal utai ke narit ati iya ngagai pemendar. Nya utai ti sama ke diasaika Anne. Ku iya madah: “Kebendar iya, penyiru ke diayan bala Saksi ke narit aku ngagai pemendar, ukai utai ti diajar sida.” Diatu, dua iku menyadi Kristian indu tu rindu macha Bup Kudus sereta belematika nya. Tang, penyiru meh ke balat negu ati sida.

Baka ni kitai ulih ngayanka penyiru kena meransang orang ke ngelingi kitai? Aram berandauka dua iti chara: jaku kitai enggau ulah kitai. Pengudah nya, kitai deka berandauka ngagai sapa kitai patut ngayanka penyiru.

AYANKA PENYIRU NENGAH JAKU NUAN

Bini ti manah ke disebut ba Jaku Dalam bagi 31 ngayanka penyiru nengah jaku iya. (J-lam. 31:26) Iya nejuka penyiru nentuka nama utai ti deka disebut iya sereta chara nyebut utai nya. Bala apai mega patut ngayanka penyiru nengah jaku. Mayuh apai indai nemu, enti sida ngena jaku ti kasar, nya ulih ngemediska anak sida, lalu anak sida engka enggai ningaka jaku sida. Lebuh apai indai bejaku enggau siru, bala anak sida deka agi ninga sereta ngasi.

Enda ngira nuan nya apai indai tauka enda, baka ni nuan ulih ngayan penyiru nengah jaku? Kitai tetemuka chara iya ba Jaku Dalam 31:26: ‘Iya pintar mansutka jaku.’ Reti iya, kitai patut milih leka jaku sereta chara bejaku enggau manah. Kitai engka ulih nanya diri empu, ‘Kati utai ke disebut aku deka ngasuh orang ringat tauka ngemansangka pemaik?’ (J-lam. 15:1) Au, manah agi berunding sebedau bejaku.

Siti agi ayat Bup Kudus madahka: “Leka jaku ti disebut enggau enda berunding, ngasuh ati balat telih baka [diachuk] pedang.” (J-lam. 12:18) Enti kitai nemu jaku kitai sereta chara kitai bejaku bisi kaul enggau asai ati orang, nya deka meransang kitai bejimat enggau utai ti dipadah kitai. Lebuh kitai bejaku enggau siru, kitai enda bejaku enggau kasar tauka ngena jaku ti ngemediska ati orang. (Eps. 4:31, 32) Kitai deka nganti runding sereta jaku ti negatif enggau jaku ti manah sereta nelap. Jehovah netapka teladan senentang tu lebuh Iya bejaku ngagai nembiak Iya Elijah ke benung berasai takut. Melikat ke ngarika Jehovah bejaku ngena nyawa ti nelap. (1 Ra. 19:12) Taja pia, penyiru ukai semina diayanka ba jaku. Kitai mega patut ngayanka penyiru nengah ulah. Baka ni?

AYANKA PENYIRU NENGAH ULAH ULIH MERANSANG ORANG BUKAI

Kitai neladan Jehovah lebuh kitai bejaku enggau manah sereta ngayanka penyiru nengah ulah. (Eps. 4:32; 5:1, 2) Lisa, ke disebut tadi, bejaku pasal penyiru ke diayan bala Saksi. Iya madah: “Lebuh ruang bilik aku diasuh pindah enggau jampat, dua pasang laki bini ari eklisia ngambi chuti kena nulung kami bekemaska utai. Maya nya, aku bedau belajarka Bup Kudus!” Penyiru ke baka nya meransang Lisa berunding baru pasal pemendar.

Anne ke dipadah tadi mega, beterima kasihka penyiru ke diayan bala Saksi ngagai iya. Ku iya madah: “Orang ba dunya tu ke enda nyembah Jehovah, enda manah enggau aku. Ketegal nya, aku tusah deka pechayaka orang.” Ku iya agi: “Lebuh aku betemu enggau bala Saksi, aku mega enda pechayaka sida. Aku berunding, ‘Nama kebuah sida beminat ngagai aku?’ Tang, penyiru ti bendar ke diayanka pengajar Bup Kudus aku meransang aku pechayaka iya.” Nama asil iya? “Ketegal nya, aku berengkah berunding enggau dalam agi pasal utai ti dipelajarka aku.”

Ati Lisa enggau Anne amat ditegu ketegal penyiru ke diayan bala menyadi ba eklisia, lalu nya nulung sida deka agi belajarka Bup Kudus. Penyiru ke diayan bala menyadi ba eklisia mega nulung sida berengkah pechayaka Jehovah sereta nembiak Iya.

AYANKA PENYIRU NGAGAI ORANG BUKAI BAKA PETARA

Sekeda orang engka senang agi tuchum sereta ngena jaku ti manah ketegal chara sida dibesaika tauka endur sida diau. Endang manah lebuh sekeda orang ngayanka basa ketegal adat tauka personaliti sida. Tang enti kitai ngayanka penyiru semina ketegal adat tauka personaliti kitai, kitai engka ukai neladan Petara.—Banding SKR. 28:2.

Penyiru ti bendar nya sebagi ari buah roh kudus Petara. (Gal. 5:22, 23) Reti iya, kitai begunaka roh kudus Petara kena nulung kitai ngayanka penyiru ti bendar. Nya sejalai enggau pengeran kitai ke deka neladan Jehovah enggau Jesus. Pia mega, baka Jesus, kitai ngayanka minat ngagai orang bukai. Nya alai, pengerindu ngagai Jehovah sereta orang bukai deka meransang kitai. Ketegal nya, penyiru ke diayanka kitai datai ari ati lalu ngelantangka ati Petara.

KITAI PATUT NGAYANKA PENYIRU NGAGAI SAPA?

Kitai engka senang deka ngayanka penyiru ngagai orang ke dikelala kitai tauka ngagai orang ke kala ngayanka penyiru ngagai kitai. (2 Sam. 2:6) Siti ari chara kitai ulih ngayanka penyiru nya, madahka terima kasih ngagai sida. (Kol. 3:15) Tang baka ni enti kitai ngasaika orang nya enda layak nerima penyiru ari kitai?

Perundingka tu: Jehovah netapka teladan ti pemadu manah lebuh ngayanka penyiru. Lalu, jaku Iya dalam Bup Kudus ngajar kitai siti utai ti penting pasal ngayanka kualiti tu. Baka ni Petara ngayanka penyiru ngagai kitai?

Jehovah udah ngayanka penyiru ngagai semua orang ke kala idup, lebuh Iya meri sida utai ke diguna ngambika sida ulih idup. (Mat. 5:45) Kebendar iya, indah sebedau kitai ngelala Jehovah, Iya udah ngayanka penyiru ngagai kitai. (Eps. 2:4, 5, 8) Ambika chunto, Iya meri utai ti pemadu manah, Anak Tunggal Iya, ngambika mati ke semua kitai. Rasul Paul madahka, Jehovah nyediaka tebus “nitihka pemesai pengasih Iya.” (Eps. 1:7) Nambahka nya, taja pan kitai bedosa sereta ngasaka ati Jehovah, tang Iya terus ngiring sereta ngajar kitai. Sama baka “ujan” ke belubah-lubah labuh ngagai rumput, ajar sereta jaku ari Jehovah mega belubah-lubah ngiring kitai. (U-dat. 32:2) Kitai tentu enda ulih malas semua penyiru ke udah diayanka Iya ngagai kitai. Kitai mega nemu, enti Jehovah enda ngayanka penyiru ngagai kitai, kitai nadai harapan agi.—Banding 1 Peter 1:13.

Endang amat, penyiru Jehovah meransang kitai sereta ngasuh kitai rindu agi ke Iya. Ketegal nya, ari ke semina ngayanka penyiru ngagai sekeda orang aja, kitai patut neladan Jehovah enggau ngayanka penyiru ngagai orang bukai ninting hari. (1 Tes. 5:15) Lebuh kitai seruran ngayanka penyiru, kitai baka api ke ngangatka tubuh maya hari ti chelap. Kitai ulih ngelantangka ruang bilik kitai, bala menyadi kitai, orang ke sama gawa tauka sekula enggau kitai, sereta orang ke diau berimbai enggau kitai.

Perundingka pasal ruang bilik nuan tauka bala menyadi ba eklisia ke deka bulih penguntung ketegal penyiru ke diayanka nuan nengah ulah sereta jaku. Engka bisi orang dalam eklisia nuan ke begunaka tulung ba rumah tauka ngereja utai biasa baka meli barang. Nambahka nya, lebuh nuan betemu enggau orang ba pengawa nginjil ke beguna tulung, kati nuan ulih nulung sida?

Awakka kitai neladan Jehovah lalu seruran ngayanka penyiru nengah jaku sereta ulah kitai.