“Pilih meh . . . Ni Bagi Petara ke Deka Disembah Kita”

1. Nama patut digaga kitai ngambika ngembuan pengaga ati ti bendar, lalu nama kebuah? (Isaiah 48:​17, 18)

APAI kitai, Jehovah, amat sayauka kitai. Iya dekaka kitai ngembuan pengidup ti ngagaka ati diatu sereta ke jemah ila. (P-jar. 3:​12, 13) Iya ngaga kitai ngambika bisi penau ngereja utai ti ngalitka ati. Taja pia, Iya nadai meri kitai penau kena merintah atas diri empu, tauka kena mutuska ke diri empu utai ti betul enggau salah. (P-jar. 8:9; Jer. 10:23) Iya nemu, ngambika kitai ulih ngembuan pengaga ati ti bendar, kitai mesti nyembah Iya sereta ngasika Iya.—Bacha Isaiah 48:​17, 18.

2. Sitan deka kitai pechayaka nama, lalu nama utai ke udah digaga Jehovah?

² Sitan deka kitai pechaya, kitai agi ulih gaga ati taja pan kitai enda nyembah Jehovah. Sitan mega madah, kitai ulih merintah diri empu enggau mujur. (P-kal. 3:​4, 5) Kena nunjukka Sitan nya pemula, Jehovah udah nejuka mensia merintah diri empu pengelama sesiti timpuh. Kitai ulih meda asil iya enggau terang, mensia enda ulih merintah ke diri empu. Taja pia, Bup Kudus bisi nyebut pasal bala lelaki enggau indu ke gaga ati laban sida nyembah Jehovah. Entara sida nya, Jesus Kristus meh ke pemadu gaga ati. Dalam artikel tu, kitai deka belajar kebuah Jesus milih nyembah Jehovah. Udah nya, kitai deka beratika kebuah kitai patut nyembah Apai kitai, Jehovah. Ke penudi iya, kitai deka meda sekeda kebuah kitai milih nyembah Jehovah.

NAMA KEBUAH JESUS MILIH NYEMBAH JEHOVAH?

3. Nama utai ke dipadah Sitan ngagai Jesus, lalu nama pemutus ke digaga Jesus?

³ Lebuh Jesus ba dunya, iya seruran nunjukka iya deka nyembah Jehovah. Enda lama pengudah Jesus dibaptisa, Sitan madahka iya deka meri semua perintah ba dunya ngagai Jesus enti Jesus besugang lalu nyembah iya sekali aja. Ku Jesus nyaut Sitan: “Rari nuan Sitan! Laban endang udah ditulis: ‘Nuan patut besugang ngagai Petara nuan, Jehovah, lalu patut nyembah Iya siku aja.’” (Mat. 4:​8-10) Nama kebuah Jesus ngaga pemutus nya? Peratika sekeda kebuah iya.

4-5. Nama sekeda kebuah Jesus milih nyembah Jehovah?

⁴ Kebuah utama Jesus milih deka nyembah Jehovah iya nya ketegal iya amat rinduka Apai iya. (Jhn. 14:31) Kelimpah ari nya, Jesus nyembah Jehovah laban nya utai ti endang patut digaga iya. (Jhn. 8:​28, 29; Pem. 4:11) Jesus nemu Jehovah udah meri kitai pengidup. Jesus mega nemu Jehovah ulih dikearapka sereta amat gerah jari. (Mas. 33:4; 36:9; Jas. 1:17) Jehovah seruran nyebut utai ti bendar ngagai Jesus, lalu semua utai ke dikembuan Jesus datai ari Jehovah. (Jhn. 1:14) Tang Sitan amat bebida ari Jehovah. Sitan udah ngasuh mensia bedosa lalu mati. Sitan nya pemula ke amu sereta semina berundingka diri empu. (Jhn. 8:44) Ketegal Jesus amat ngelala Jehovah enggau Sitan, iya enggai nyadi baka Sitan, ke angkat ngelaban Jehovah.—Plp. 2:​5-8.

⁵ Siti agi kebuah Jesus milih deka nyembah Jehovah iya nya ketegal pemayuh utai ti manah ke deka nyadi enti iya mengkang setia. (Heb. 12:2) Iya nemu, enti iya mengkang setia, iya ulih nguduska nama Apai iya, lalu muka jalai ngambika dosa enggau pemati nadai agi.

NAMA KEBUAH KITAI PATUT NYEMBAH JEHOVAH?

6-7. Nama kebuah mayuh orang kemayaharitu enda nyembah Jehovah, tang nama kebuah kitai patut nyembah Iya siku aja?

⁶ Mayuh orang kemayaharitu enda nyembah Jehovah laban sida bedau nemu pasal sifat Iya sereta utai ti manah ke udah digaga Iya ke sida. Lebuh Rasul Paul nginjil ba Atens, orang ba din pan enda nemu pasal Petara.—SKR. 17:​19, 20, 30, 34.

⁷ Nyadi, Paul madah ngagai sida pasal Petara ti bendar, ke “meri pengidup enggau seput sereta semua utai ngagai mensia.” Paul mega madah: “Kitai idup, engkebut, sereta bisi ba ditu, ketegal Iya.” Petara udah ngaga mayuh utai, lalu “ari siku mensia, Iya ngaga semua bansa.” Nya alai, semina Iya siku aja ke patut disembah kitai.—SKR. 17:​25, 26, 28.

8. Nama utai ke enggai digaga Jehovah, lalu baka ni Iya nunjukka Iya amat rinduka kitai?

⁸ Ketegal Jehovah udah ngaga semua utai, sereta ti Pemadu Tinggi ba dunya raya, Iya ulih ngereja nama-nama utai ti dikedekaka Iya. Iya ulih mejal kitai nyembah Iya. Tang Jehovah enggai ngereja nya. Iya udah meri kitai mayuh bukti ke nunjukka Iya endang bisi sereta amat rinduka tiap iku kitai. Enti ulih, Iya dekaka semua orang nyadi kaban Iya belama iya. (1 Tim. 2:​3, 4) Nya kebuah Jehovah udah ngelatih kitai ngambika ngajar orang pasal tuju Iya sereta utai ti manah ke deka digaga Iya ke mensia. (Mat. 10:​11-13; 28:​19, 20) Lalu Iya mega udah meri kitai raban gempuru ngambika kitai ulih nyembah Iya sereta nerima tulung ari bala tuai gempuru ti bepengerindu.—SKR. 20:28.

9. Baka ni Jehovah udah ngayanka pengerindu Iya ngagai semua orang?

⁹ Jehovah mega ngayanka pengerindu Iya lebuh Iya meri utai ti manah ngagai sida ke enggai pechayaka Iya. Peratika sekeda utai tu: Pengelama beribu taun, mayuh orang udah milih idup nitihka utai ti dikumbai sida betul enggau salah, ari ke ngasika Jehovah. Taja pia, Jehovah udah meri sida utai ti diguna sida ngambika ulih idup sereta gaga ati. (Mat. 5:​44, 45; SKR. 14:​16, 17) Ketegal pengerindu Jehovah, sida tau ngembuan kaul ti bepengerindu enggau bala kaban sereta diri sebilik. Sida ulih ngembuan ruang bilik diri empu, lalu lantang ati lebuh sida bagas gawa. (Mas. 127:3; P-jar. 2:24) Semua utai tu enggau terang nunjukka, Apai kitai ti ba serega rinduka semua orang. (P-sut. 34:6) Diatu, aram kitai ngingatka sekeda kebuah kitai milih nyembah Jehovah sereta baka ni Iya merekatka sida ke milih nyembah Iya.

NAMA KEBUAH KITAI MILIH NYEMBAH JEHOVAH?

10. (a) Nama kebuah utama kitai nyembah Jehovah? (Matthew 22:37) (b) Baka ni nuan udah bulih penguntung ari ampun Jehovah? (Masmur 103:​13, 14)

¹⁰ Baka Jesus, kebuah utama kitai nyembah Jehovah, iya nya ketegal kitai amat rinduka Iya. (Bacha Matthew 22:37.) Lebuh kitai belajar pasal sifat Jehovah, kitai deka majak semak enggau Iya. Ambika chunto, Jehovah sanggup ngampunka kitai. Taja pan orang Israel bekali-kali enda ngasika Jehovah, tang Iya minta sida: “Badu agi bedosa.” (Jer. 18:11) Lalu, taja pan kitai ngereja mayuh penyalah, tang Jehovah ngampunka kitai laban Iya nemu kitai enda sempurna. (Bacha Masmur 103:​13, 14.) Lebuh nuan ngenang ngagai maya alai Jehovah udah ngampunka nuan, endaka tu ngasuh nuan deka nyembah Iya belama iya?

11. Nama agi kebuah bukai kitai milih deka nyembah Apai kitai, Jehovah?

¹¹ Kitai mega nyembah Jehovah laban kitai nemu nya meh utai ke patut dikereja kitai. (Mat. 4:10) Kitai mega nemu, enti kitai setia ngagai Jehovah, mayuh utai manah deka nyadi. Lebuh kitai nyembah Jehovah enggau setia, kitai ulih nulung nguduska nama Jehovah, nunjukka Sitan nya pemula, sereta ngagaka ati Apai kitai, Jehovah. Lalu enti kitai milih nyembah Jehovah diatu, kitai bisi peluang nyembah Iya belama iya!—Jhn. 17:3.

12-13. Nama ulih dipelajarka kitai ari pengalaman Jane enggau Pamela?

¹² Lebuh kitai agi biak, kitai ulih belajar rinduka Jehovah, lalu pengerindu nya deka majak dalam seraya kitai mansang tuai. Peratika pengalaman dua iku diri menyadi ke benama Jane enggau Pamela.a Jane beumur 11 taun lalu Pamela beumur 10 taun lebuh seduai iya berengkah belajarka Bup Kudus. Taja pan apai indai seduai iya enda beminat deka belajar, tang apai indai Jane enggau Pamela ngemendarka seduai iya belajarka Bup Kudus enggau Saksi-Saksi Jehovah, asal ga seduai iya nitihka sida sebilik ngagai gerija maya ujung minggu. Ku Jane madah: “Utai ke diajar bala Saksi ari Bup Kudus nulung aku ngelaban tekanan ari orang ke serambau enggau aku, ke makai dadah sereta ngereja ulah seks ti kamah.”

¹³ Pengudah beberapa taun, seduai iya nyadi penginjil. Udah nya, seduai iya nyadi pengerintis, lalu ba maya ti sama nyaga apai indai seduai iya ke majak tuai. Ku Jane madahka asai ati iya pasal semua utai ke udah digaga Jehovah ke sida: “Aku belajar Jehovah seruran nyaga bala kaban Iya. Baka ke dipadah ba 2 Timoti 2:​19, ‘Jehovah ngelala sida ke enggi Iya.’” Amat, Jehovah seruran nyaga sida ke milih deka rindu sereta nyembah Iya!

14. Baka ni kitai ulih nulung ngetanka reputasi Jehovah? (Peda mega gambar.)

¹⁴ Kitai deka orang nemu pemendar pasal Jehovah. Perundingka situasi tu: Nuan bisi siku kaban rapat ti amat manah, gerah jari, sereta rindu ngampun. Tang bisi sekali, nuan ninga orang nuduh kaban nuan nya jai sereta enda jujur. Nama deka digaga nuan? Nuan tentu deka ngetanka reputasi kaban nuan. Baka nya mega, Sitan enggau sida ke di baruh kuasa iya, nguji deka ngenyaika reputasi Jehovah. Sida ngerembaika pemula pasal Jehovah. Nama deka digaga kitai? Kitai deka ngetanka reputasi Jehovah lalu nyebut utai ti bendar pasal Iya. (Mas. 34:1; Isa. 43:10) Au, kitai nunjukka kitai deka nyembah Jehovah enggau pengabis ati ari jaku sereta ulah kitai.

15. Nama sekeda utai ti manah ke nyadi ngagai Rasul Paul pengudah iya ngaga ubah ti besai ba pengidup? (Pilipi 3:​7, 8)

¹⁵ Kitai sanggup ngaga ubah ba pengidup ngambika ulih ngelantangka ati Jehovah tauka ngereja mayuh agi ke Iya. Ambika chunto, Rasul Paul bisi penuduk ti penting ba pengarap orang Judah. Tang iya sanggup ngelengkaka nya ngambika ulih nyadi murid Kristus sereta nyembah Jehovah. (Gal. 1:14) Asil iya, pengidup iya penuh enggau berekat lalu iya deka merintah enggau Kristus ba serega. Paul nadai kala nesal enggau pemutus iya ke deka nyembah Jehovah. Lalu enti kitai mega milih deka nyembah Jehovah, kitai tentu enda nesal enggau pemutus nya.—Bacha Pilipi 3:​7, 8.

16. Nama ulih dipelajarka kitai ari pengalaman Julia? (Peda mega gambar.)

¹⁶ Enti kitai ngenuluka pengawa sembah kitai ke Jehovah ba pengidup, Iya deka merekatka kitai diatu sereta jemah ila. Peratika pengalaman siku menyadi indu ke benama Julia. Lebuh Julia agi mit, iya enggau koir gerija. Ketegal iya amat landik belagu, iya nerima latih ngambika ulih nyadi siku penyanyi. Nyau kelama, Julia nyadi amat tebilang, lalu iya belagu ba mayuh endur ti tebilang. Lebuh iya benung belajar ba sekula musik ti tebilang, siku nembiak ke sama kelas enggau iya berengkah berandau enggau iya pasal Petara, lalu nerangka Petara bisi nama, iya nya Jehovah. Pengudah nya, Julia berengkah belajarka Bup Kudus dua kali seminggu. Nyau kelama, iya ngaga pemutus deka ngena awak sereta pengering iya nyembah Jehovah ari ke nyadi siku penyanyi. Pemutus nya enda senang. Ku iya madah: “Mayuh orang madah aku beli laban badu belagu ketegal deka nyembah Jehovah. Tang aku amat deka ngena pengidup aku nyembah Jehovah.” Nama asai ati iya diatu pasal pemutus ke udah digaga iya lebih ari 30 taun suba? Iya madah: “Aku amat gaga ati laban udah milih nyembah Jehovah. Aku nemu, Iya deka meri semua utai ti dikinginka aku jemah ila.”—Mas. 145:16.

TERUS NYEMBAH JEHOVAH

17. (a) Nama patut digaga sida ke bedau agi nyembah Jehovah, lalu nama kebuah? (b) Nama utai ke ditemu sida ke udah milih nyembah Jehovah?

¹⁷ Kitai amat semak enggau pengujung dunya ti jai tu. Rasul Paul nulis: “Laban ‘enda lama da agi,’ ‘iya ke deka datai nya, sigi datai, lalu iya enda laun datai.’” (Heb. 10:37) Nama reti tu? Sida ke bedau milih deka nyembah Jehovah nadai mayuh agi awak. Nyadi, sida patut ngaga pemutus enggau lengkas. (1 Kor. 7:29) Lalu enti kitai udah ngaga pemutus nyembah Jehovah, kitai nemu taja pan kitai patut tan napi penguji, tang nya semina “enda lama” aja.

18. Jehovah enggau Jesus dekaka kitai ngereja nama?

¹⁸ Jesus meransang orang nyadi murid iya, lalu enda ngetu nitihka iya. (Mat. 16:24) Nyadi, enti kitai udah betaun-taun nyembah Jehovah, anang meh ngetu ngereja nya diatu. Kitai mesti berusaha ngambika ulih terus nyembah Jehovah. Tu enda senang. Tang kitai nemu, enti kitai nyembah Jehovah, kitai deka gaga ati sereta bulih mayuh berekat indah diatu!—Mas. 35:27.

19. Nama ulih dipelajarka kitai ari pengalaman Gene?

¹⁹ Sekeda orang ngasaika enti sida nyembah Jehovah, sida patut ngelengkaka mayuh utai. Enti nuan siku nembiak, kati nuan ngasaika nya amat tusah deka nyembah Jehovah? Siku menyadi lelaki ti biak ke benama Gene madahka: “Aku ngasaika diri enda ulih enjoy laban aku siku ari Saksi-Saksi Jehovah. Mayuh nembiak ke serambau enggau aku gaga ati ngereja utai baka parti, dating, tauka main video game ti ganas. Tang aku patut ngena awak aku datai begempuru sereta nginjil.” Baka ni runding tu ngachau Gene? Iya madah: “Aku berengkah ngembuan pengidup ti pepura, lalu belalai ngereja utai ti jai baka ke digaga bala nembiak ke bukai. Terubah iya, aku amat gaga ati. Tang udah nya, utai nya enda meri aku pengaga ati ti bendar. Aku berengkah berundingka penguntung enti aku ngasika pesan Bup Kudus, lalu aku ngaga pemutus deka nyembah Jehovah enggau pengabis ati. Kenyau ari nya, aku ulih ngasaika Jehovah bisi nyaut tiap iti sampi aku.”

20. Nama utai ti keran digaga kitai?

²⁰ Siku pemasmur belagu ngagai Jehovah: ‘Beberekat meh orang ke dipilih Nuan, orang ke dibai Nuan diau dalam rumah Nuan.’ (Mas. 65:4) Nyadi, arapka kitai keran deka terus nyembah Jehovah. Baka Josua, kitai madah: “Tang aku enggau kami sebilik, kami sigi deka nyembah Jehovah.”—Jos. 24:15.