Kitai Enda Kala Kediri

1-2. (a) Nama kebuah kitai yakin kitai enda kala kediri lebuh napi penusah? (b) Nama deka dikerandauka kitai dalam artikel tu?

GAMBARKA nuan kediri aja ba utan, lalu nuan enda tetemuka jalai pansut. Baka nya mega, lebuh nuan napi penusah ti balat lalu enda nemu chara mutarka nya, nuan engka ngumbai diri kediri aja. Tang nya enda amat! Apai kitai, Jehovah, meda penusah ke ditapi kitai, lalu Iya besemaya deka nulung kitai. Jehovah enggau bepengerindu madah ngagai kitai: ‘Aku deka nulung kita.’—Isa. 41:10.

² Artikel tu deka berandauka baka ni Jehovah nulung kitai nengah empat iti chara: (1) Iya ngiring kitai, (2) Iya nyediaka utai ke diguna kitai, (3) Iya nyaga kitai, sereta (4) Iya ngelantangka ati kitai. Jehovah ngasuh kitai yakin, enda ngira nama penanggul ke ditapi kitai ba pengidup, Iya deka seruran ingat kitai. Kitai enda kala kediri laban Iya enda sekali-kali ninggalka kitai.

JEHOVAH NGIRING KITAI

3-4. Baka ni Jehovah ngiring kitai? (Masmur 48:14)

³ Bacha Masmur 48:14. Jehovah nemu kitai enda ulih ngiring diri empu, lalu kitai begunaka tulung ari Iya. Baka ni Iya ngiring bala nembiak Iya ti setia kemayaharitu? Siti chara iya nya nengah Bup Kudus. (Mas. 119:105) Jehovah ngena Bup Kudus nulung kitai ngaga pemutus ti manah sereta neladan Iya ari chara kitai berunding sereta ulah kitai. Lebuh kitai ngasika utai ke diajar Iya ari Bup Kudus, kitai ulih ngembuan pengidup ti lantang agi diatu sereta bisi harapan idup belama iya jemah ila.a Ambika chunto, Iya ngajar kitai ngampunka orang bukai sereta badu agi ringat ngagai sida. Iya mega ngajar kitai seruran jujur ba semua utai ke digaga kitai, sereta bebendar rinduka orang ari ati. (Mas. 37:8; Heb. 13:18; 1 Pet. 1:22) Lebuh kitai ngayanka sifat-sifat ke baka tu, kitai ulih nyadi apai indai, kaling pengidup, sereta kaban ti manah agi.

⁴ Kelimpah ari nya, dalam Bup Kudus, Jehovah mega madah pasal pengalaman orang ke napi penusah sereta ngembuan asai ati baka kitai. (1 Kor. 10:13; Jas. 5:17) Lebuh kitai macha pasal pengidup sida sereta ngena utai ke dipelajarka kitai ari sida ba pengidup, kitai bulih sekeda penguntung. Kesatu, kitai sedar ukai kitai aja ke napi penusah ba pengidup. Orang bukai mega bisi napi penusah ti sama, lalu ulih tan enggau mujur ketegal tulung ari Jehovah. (1 Pet. 5:9) Kedua, kitai belajar utai ke ulih nulung kitai tan napi penusah nya sereta mengkang gaga ati.—Rom. 15:4.

5. Sapa ke dikena Jehovah ngiring kitai?

⁵ Jehovah mega ngena bala menyadi Kristian ngiring kitai.b Ambika chunto, tuai ti ngabas seruran ngabas raban gempuru kena meransang kitai. Cheramah ke diberi tuai ti ngabas nulung negapka pengarap kitai sereta nulung kitai beserakup. (SKR. 15:40–16:5) Bala tuai gempuru mega bebendar nulung tiap iku kitai ngambika mengkang semak enggau Jehovah. (1 Pet. 5:​2, 3) Bala apai indai ngajar anak sida rinduka Jehovah, sereta ngajar sida chara ngaga pemutus sereta ngembuan tebiat ti manah. (J-lam. 22:6) Bala menyadi indu ti matang ulih nulung bala menyadi indu ke biak agi lebuh sida netapka teladan ti manah, meri nasihat sereta jaku peransang.—Tit. 2:​3-5.

6. Nama patut digaga kitai ngambika bulih penguntung ari iring Jehovah?

⁶ Jehovah udah meri kitai iring ngambika kitai ulih ngaga pemutus ti manah sereta ngembuan pengidup ti lantang. Tang nama patut digaga kitai ngambika bulih penguntung ari iring Jehovah? Jaku-Dalam 3:​5, 6 madahka: ‘Panggaika diri ba Jehovah enggau pengabis ati nuan. Anang manggaika diri ba penemu diri empu.’ Lebuh kitai ngereja nya, “Iya deka nunjukka jalai ti ngena ngagai [kitai].” Reti iya, Jehovah deka nulung kitai nyeliah ari mayuh penanggul sereta ngembuan pengidup ti lantang agi. Kitai amat beterima kasih laban Jehovah ngelala kitai enggau manah sereta balat rinduka kitai nyentukka Iya meri tiap iku kitai nasihat ke diguna kitai.—Mas. 32:8.

JEHOVAH NYEDIAKA UTAI KE DIGUNA KITAI

7. Baka ni Jehovah nulung kitai? (Pilipi 4:19)

⁷ Bacha Pilipi 4:19. Kelimpah ari ngiring kitai, Jehovah mega nulung kitai seraya kitai bebendar gawa ngulihka pemakai, gari, sereta endur diau. (Mat. 6:33; 2 Tes. 3:12) Taja pan enda salah kitai bisi pengirau ke utai ke baka tu, tang Jehovah enggai kitai kelalu irau pasal pekara nya. (Mat. 6:25) Nama kebuah? Laban Apai kitai enda sekali-kali deka ninggalka kitai. (Mat. 6:8; Heb. 13:5) Au, kitai ulih pechaya enggau pengabis ati lebuh Iya madah, Iya deka nyediaka utai ke diguna kitai.

8. Baka ni Jehovah nulung David?

⁸ Perundingka baka ni Jehovah udah nulung David. Lebuh David benung ngerarika diri ari Raja Saul pengelama betaun-taun, Jehovah nyediaka utai ke diguna David enggau bala iya kena beridup. Lebuh David ngenang baru pasal baka ni Jehovah udah nulung iya ba timpuh nya, iya nulis: ‘Lebuh aku agi biak, enggau lebuh aku nyau tuai, aku nadai kala meda orang ke lurus ditinggalka Jehovah, tauka meda bala anak sida nyanda pemakai.’ (Mas. 37:25) Baka David, nuan engka udah ngasaika baka ni Jehovah nyediaka utai ke diguna nuan tauka meda chara Iya nyediaka utai ke diguna bala menyadi nuan.

9. Baka ni Jehovah nyediaka utai ke diguna bala nembiak Iya kemayaharitu lebuh sida ditinggang penusah? (Peda mega gambar.)

⁹ Jehovah mega nyediaka utai ke diguna bala nembiak Iya lebuh sida ditinggang penusah. Ambika chunto, ba abad keterubah, lapar pungkang nyadi ba Jerusalem. Bala menyadi ari endur bukai nganjung utai ke diguna bala menyadi ba Jerusalem. (SKR. 11:​27-30; Rom. 15:​25, 26) Kemayaharitu, bala nembiak Petara mega nulung bala menyadi ke begunaka tulung. Lebuh penusah nyadi, Jehovah meransang bala nembiak Iya nyediaka utai ke diguna, baka pemakai, ai, gari, sereta ubat ngagai sida ke ditinggang penusah nya. Tim nirika bengunan ngaduka baru rumah sereta Palan Gempuru ti udah rusak. Lalu bala nembiak Jehovah mega enggau lengkas ngelantangka ati sereta meri jaku peransang ari Bup Kudus ngagai sida ke udah lenyau endur diau tauka orang ke dikesayauka sida.c

10-11. Nama ulih dipelajarka nuan ari pengalaman Borys?

¹⁰ Jehovah mega enggau gerah jari nyediaka utai ke diguna sida ke bedau agi nyembah Iya. Nyadi, kitai ulih neladan Jehovah lalu ngiga chara ngambika ulih ngayanka pemanah ngagai sida ke enda sepengarap enggau kitai. (Gal. 6:10) Lebuh kitai ngereja tu, kitai engka ulih nulung sida nemu mayuh agi pasal kitai sereta pasal Jehovah. Peratika pengalaman Borys, siku pengetua sekula ke diau ba Ukraine. Taja pan iya ukai Saksi-Saksi Jehovah, tang iya seruran ngintu bala murid iya ke Saksi enggau manah. Ketegal perang ke nyadi, iya mutuska deka ngerarika diri ngagai endur ke selamat agi ba menua nya. Lalu bala menyadi kitai nulung iya. Pengudah nya, Borys enggau pengawa Ngingatka Pemati Jesus. Lebuh iya ngenang baru pasal utai ke digaga bala menyadi ke iya, Borys madahka: “Bala Saksi ngintu aku enggau amat manah. Aku amat beterima kasih ngagai Saksi-Saksi Jehovah!”

¹¹ Semua kitai ulih neladan Apai kitai ti pengasih lebuh kitai ngayanka pengerindu ngagai sida ke begunaka bantu, enda ngira sida bala menyadi Kristian kitai tauka enda. (Luk. 6:​31, 36) Kitai ngarapka pengerindu ke diayanka kitai ngagai sida deka meransang sida bisi pengingin deka nemu mayuh agi pasal Jehovah lalu nyembah Iya. (1 Pet. 2:12) Enda ngira sekalika sida milih deka nyembah Jehovah tauka enda, kitai deka gaga ati laban “orang ke meri deka gaga agi ati.”—SKR. 20:35.

JEHOVAH NYAGA KITAI

12. Jehovah besemaya deka nyaga bala nembiak Iya ari segi nama? (Masmur 91:​1, 2, 14)

¹² Bacha Masmur 91:​1, 2, 14. Kemayaharitu, Jehovah besemaya deka nyaga bala nembiak Iya ari sebarang utai ti ulih ngerusakka kaul sida enggau Iya. Iya enda sekali-kali nejuka Sitan ngerusakka sembah ti tuchi. (Jhn. 17:15) Lalu ba maya “Penusah ti Besai,” kitai ulih yakin Jehovah deka ngamatka semaya Iya, iya nya Iya deka nulung kitai mengkang tegap ba pengarap sereta nyelamatka kitai.—Pem. 7:​9, 14.

13. Baka ni Jehovah nyaga kitai siku-siku?

¹³ Baka ni Jehovah nyaga kitai siku-siku? Jehovah udah meri kitai Bup Kudus ngambika kitai nemu utai ti betul enggau utai ti salah. (Heb. 5:14) Lebuh kitai nitihka utai ke dipelajar kitai ari Bup Kudus, tu nulung kitai nyaga kaul kitai enggau Jehovah. Pia mega, kitai ulih ngaga pemutus ti manah, ke ulih nulung kitai bisi pengerai ti manah sereta gaga agi ati. (Mas. 91:4) Nambahka nya, Jehovah nyaga kitai nengah raban gempuru. (Isa. 32:​1, 2) Bala menyadi Kristian kitai rinduka Jehovah sereta ngasika Iya. Lebuh kitai begulai enggau sida ba gempuru, ba pengawa nginjil, sereta ba maya bukai, tu deka meransang kitai sereta meri kitai pengering ngambika enda ngereja utai ti jai.—J-lam. 13:20.

14. (a) Nama kebuah Jehovah nejuka kitai napi penguji? (b) Baka ni Masmur 9:10 ngelantangka ati kitai? (Peda mega nota kaki.)

¹⁴ Ba jeman kelia, kekadang Jehovah nyelamatka bala nembiak Iya ari dikemediska tauka dibunuh. Tang, Iya enda seruran ngereja nya. Bup Kudus madahka: “Utai ti jai endang tau nyadi ba genap iku orang.” (P-jar. 9:11) Pia mega, Jehovah udah ngemendarka sekeda ari bala nembiak Iya diperinsa, indah dibunuh kena nunjukka Sitan nya pemula. (Jop 2:​4-6; Mat. 23:34) Utai tu mega ulih nyadi ngagai kitai kemayaharitu. Taja pan Jehovah engka enda muai penguji ke ditapi kitai, tang kitai ulih yakin, Iya enda sekali-kali ninggalka sida ke rinduka Iya.d—Mas. 9:10.

JEHOVAH NGELANTANGKA ATI KITAI

15. Baka ni sampi, Bup Kudus, sereta gempuru ulih ngelantangka ati kitai? (2 Korint 1:​3, 4)

¹⁵ Bacha 2 Korint 1:​3, 4. Kekadang kitai balat tusah ati tauka irau. Engka nuan diatu benung napi situasi ke ngasuh nuan berasai kediri. Kati bisi sapa-sapa ke faham asai ati nuan? Jehovah faham. Iya ukai aja ngasaika pemedis kitai, tang Iya mega “ngelantangka ati kitai lebuh kitai napi semua macham penguji.” Baka ni Iya ngereja nya? Lebuh kitai mantaika asai ati kitai ngagai Iya nengah sampi, Iya meri kitai “pengelantang ari Petara ke ngelui ari utai ke ulih dimeretika kitai.” (Plp. 4:​6, 7) Kitai mega bulih pengelantang lebuh kitai macha jaku Jehovah dalam Bup Kudus. Dalam Bup Kudus, Jehovah madahka pemesai pengerindu Iya ke kitai, ngajar kitai ngambika bepenemu-dalam, sereta meri kitai harapan. Gempuru mega ulih ngelantangka ati kitai. Ba dia, kitai belajar utai ti meransang ari Bup Kudus sereta begulai enggau bala menyadi ke rinduka kitai.

16. Nama dipelajarka nuan ari pengalaman Nathan enggau Priscilla?

¹⁶ Kitai ulih meda baka ni Jehovah ngelantangka ati kitai sereta meransang kitai nengah Bup Kudus ari pengalaman Nathan enggau Priscilla. Seduai iya diau ba Amerika Serikat. Beberapa taun suba, seduai iya mutus deka pindah ngagai endur ke begunaka mayuh agi penginjil. Ku Nathan madah: “Kami yakin Jehovah deka merekatka pemutus kami.” Tang pengudah seduai iya datai ba endur baru nya, enda memukai seduai iya napi penanggul ba pengerai sereta ba duit. Nyau kelama, seduai iya patut pindah baru ngagai Amerika Serikat, alai seduai iya agi napi penanggul ba duit. Ku Nathan ngenang baru: “Aku berunding, nama kebuah Petara enda nulung kami baka ke dikearapka kami. Aku indah ngumbai enti aku bisi ngereja utai ti salah.” Taja pia, Nathan seduai Priscilla nyau sedar Petara enda kala ninggalka seduai iya. Ku Nathan: “Ba timpuh ti tusah nya, Bup Kudus nyadi baka kaban ti bepenemu-dalam, ke meri kami jaku peransang sereta iring. Ari ke befokus ngagai penanggul kami, kami befokus ngagai chara Jehovah udah nulung kami tan napi penanggul nya. Ketegal nya, kami yakin Jehovah deka terus nulung kami dudi hari.”

17. Baka ni Helga nerima peransang sereta pengelantang ke diguna iya? (Peda mega gambar.)

¹⁷ Jehovah mega ulih ngelantangka ati kitai nengah bala menyadi Kristian. Kitai ulih meda tu ari pengalaman siku menyadi indu ke benama Helga, ke diau ba Hungary. Betaun-taun, iya napi bemacham penanggul ke ngasuh iya balat stres sereta ngasaika diri nadai guna. Lebuh iya ngenang baru, iya sedar maya nya Jehovah udah ngena bala menyadi ngelantangka ati iya. Ku Helga: “Jehovah seruran nulung aku lebuh Iya meda aku balat stres ketegal kereja, nyaga anak aku ti sakit, sereta penanggul ke bukai. Dalam timpuh 30 taun nya, tiap hari Jehovah udah ngelantangka ati aku. Iya suah ngeringka aku nengah jaku peransang ari orang bukai. Aku selalu nerima mesej, kad, tauka jaku puji ba maya aku amat begunaka nya.”

18. Baka ni kitai ulih ngelantangka ati orang bukai?

¹⁸ Kitai bisi peluang neladan Petara lebuh kitai ngelantangka ati orang bukai. Baka ni kitai ulih ngereja nya? Kitai ulih mendingka sida enggau sabar, bejaku enggau siru, sereta nulung sida enggau chara ti praktikal. (J-lam. 3:27) Kitai bebendar deka ngelantangka ati semua orang ke benung napi penusah, nyengkaum sida ke bedau nyembah Petara. Lebuh orang ke dikelala kitai benung balat tusah ati ketegal lenyau orang ti dikesayau, sakit, tauka balat irau, kitai ulih ngabas sida, mendingka sida, sereta bekunsika ayat Bup Kudus ti ngelantangka ati. Lebuh kitai neladan Jehovah, “Petara ti ngelantangka ati kitai dalam semua pekara,” kitai ukai aja ulih nulung bala menyadi tan napi penusah, tang mega engka ulih nulung sida ke bedau nyembah Petara ngambika deka belajar pasal Iya.—Mat. 5:16.

JEHOVAH DEKA SERURAN NULUNG KITAI

19. Nama utai ke digaga Jehovah ke kitai, lalu baka ni kitai ulih neladan Iya?

¹⁹ Jehovah amat ibuhka semua orang ke rinduka Iya. Iya enda ninggalka kitai lebuh kitai bisi penusah. Baka apai indai ti bepengerindu ke ibuhka anak sida, Jehovah mega ibuhka bala penyembah Iya ti tetap ati. Iya ngiring kitai, nyediaka utai ke diguna kitai, nyaga kitai, sereta ngelantangka ati kitai. Kitai neladan Apai kitai ti bepengerindu lebuh kitai nyukung sereta meransang sida ke benung napi penusah. Taja pan kitai engka napi mayuh macham penguji sereta utai ti ngenusahka ati, tang kitai ulih yakin Jehovah bisi enggau kitai. Jehovah udah besemaya: “Anang takut, Aku bisi enggau kita!” (Isa. 41:10) Au, semaya tu nulung kitai yakin, kitai enda kala kediri!