Pemansut
35 Moses lalu ngempuruka semua orang Israel lalu madah ngagai sida: “Tu meh utai ke diasuh Jehovah kereja kitai: 2 Kita ulih gawa dalam enam hari, tang hari ketujuh nya hari ti kudus ke kita, lalu nya hari kita ulih berehat. Hari nya Hari Sabat ke Aku, Jehovah. Enti bisi orang ke gawa ba hari nya, orang nya mesti diukum bunuh. 3 Kita enda tau ngidupka api ba endur alai kita diau maya Hari Sabat.”
4 Moses lalu madah ngagai semua orang Israel: “Tu meh utai ke dipadahka Jehovah: 5 ‘Gumpul pemeri ke deka diberi ngagai Aku, Jehovah, ari bala kita. Awakka orang ke bisi pengingin ati deka meri, mai pemeri sida ngagai Aku, Jehovah. Bai emas, pirak, temaga, 6 ubung biru, ubung ungu ke digaga ari bulu bedus, ubung mirah, kain linin ke alus, bulu kambin, 7 kulit bedus ti lelaki ke udah digaga nyadi warna mirah, kulit anjing laut, kayu akasia, 8 minyak lampu, balsam ke dikena ngaga minyak ti kudus sereta dikena ngaga menyan ti bebau rengut, 9 enggau batu oniks, sereta batu berega ti bukai ke dipasang ba epod enggau penutup dada.
10 “‘Semua pekereja ke landik mesti datai lalu ngaga semua utai tu ke udah dipadahka Aku, Jehovah: 11 Langkau Sembiang, kain enggau tudung langkau, pengait, langkar langkau, palang, tiang enggau pelasar tiang nya; 12 peti lampang batu Adat, kayu kena ngesan iya, penutup peti nya, sereta tirai ke digantung ba depan peti nya; 13 mija, kayu kena ngesan mija nya, semua pekekas ke mija nya, sereta roti ti diberi ngagai Aku; 14 penuduk lampu, pekekas iya, lampu kelita, sereta minyak ke lampu kelita; 15 alta endur alai nunu menyan sereta kayu dikena ngesan alta nya; minyak ti kudus sereta menyan ti bebau rengut; tirai ke pintu penama Langkau Sembiang; 16 alta pemeri tunu, gelegar* temaga, kayu kena ngesan alta nya, sereta semua pekekas ke alta nya; bisin enggau kaki iya; 17 tirai ke laman Langkau Sembiang, tiang ke tirai nya, sereta pelasar ke tiang nya; tirai ke pintu penama laman Langkau Sembiang; 18 paku Langkau Sembiang; paku enggau tali ba laman langkau; 19 gari ke ditenun enggau lawa ke dikena bejalaika pengawa ba Langkau Sembiang, gari ti kudus ke Imam Aron, sereta gari ke bala anak lelaki iya ke gawa nyadi imam.’”
20 Udah nya, semua orang Israel pan mupuk. 21 Tiap iku orang lalu datai meri pemeri sida ngagai Jehovah, laban ati sida diperansang ngereja nya. Semua utai nya deka dikena ngaga langkau gempuru enggau gari ti kudus, sereta dikena bejalaika pengawa ti kudus. 22 Semua orang ke bisi pengingin ati deka meri majak datai, enda ngira sida nya lelaki tauka indu. Sida mai kerongsang, antin, tinchin, enggau barang bukai kena ngias diri, sereta semua macham barang emas, lalu nyerahka semua pemeri* nya ngagai Jehovah. 23 Semua orang mega mai utai ke dikemisi sida, iya nya ubung biru, ubung ungu ke digaga ari bulu bedus, ubung mirah, kain linin ke alus, bulu kambin, kulit bedus ti lelaki ke udah digaga nyadi warna mirah, enggau kulit anjing laut. 24 Semua sida ke deka meri pirak enggau temaga datai meri pemeri nya ngagai Jehovah, pia mega enggau semua sida ke deka meri kayu akasia ke dikena bejalaika pengawa nya.
25 Semua indu ke landik ngaga ubung mai utai ke udah digaga sida, iya nya ubung biru, ubung ungu ke digaga ari bulu bedus, ubung mirah, enggau kain linin ke alus. 26 Semua indu ke landik mega mintal ubung ari bulu kambin, laban ati sida diperansang deka ngereja nya.
27 Bala tuai orang Israel mai batu oniks sereta batu berega ti bukai ke dipasang ba epod enggau penutup dada. 28 Sida mega mai balsam enggau minyak kena ngidupka lampu, kena ngaga minyak ti kudus sereta kena ngaga menyan ti bebau rengut. 29 Semua lelaki enggau indu mai pemeri sida ngagai Jehovah, laban ati sida diperansang deka ngereja nya. Sida meri pemeri nya kena nyukung pengawa ke patut dipejalaika. Nengah Moses, Jehovah udah ngasuh sida ngereja pengawa nya.
30 Udah nya, Moses madah ngagai orang Israel: “Jehovah udah milih Bezalel ari raban bansa Judah. Iya anak Uri, lalu iya mega uchu Hur. 31 Petara udah meri Bezalel kuasa kudus Iya, ngambika Bezalel bepenemu-dalam, ulih meretika utai, sereta bisi penemu pasal semua macham pengawa betukang. 32 Enggau nya, iya ulih ngaga bemacham reka bentuk, ngaga utai ari emas, pirak, enggau temaga, 33 netak enggau masang batu ti berega, sereta ngaga semua macham utai ti lawa ari kayu. 34 Petara udah meri Bezalel enggau Oholiab anak Ahisamak ke ari raban bansa Dan, pengelandik kena ngajar orang bukai. 35 Petara udah meri seduai iya pengelandik kena ngereja semua macham pengawa, ngambika seduai iya ulih ngereja pengawa betukang, lalu pia mega ulih nyulam enggau nenun ngena ubung biru, ubung ungu ke digaga ari bulu bedus, ubung mirah, enggau kain linin ke alus. Seduai iya deka ngereja semua macham pengawa sereta nyediaka semua macham reka bentuk.